ໃນຕອນເຊົ້າຂອງວັນທີ 30 ມີນາ ນີ້ ຄະນະພັກຄະນະບັນຊາ ກຳລັງ ປກສ ເມືອງໂພນທອງ, ແຂວງຫລວງພະບາງ ໄດ້ເຂົ້າວາງກະຕ່າດອກໄມ້ຢູ່ທີອານຸສາວະລີ ປະທານ ໄກສອນ ພົມວິຫານ ພາຍຫຼັງສຳເລັດການວາງກະຕ່າໄມ້ແລ້ວ ກໍ່ໄດ້ຈັດຕັ້ງພິທີປາຖະກະຖາເລົ່າຄືນມູນເຊື້ອວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ ຄົບຮອບ 57 ປີ (05/04/1961-05/04/2018) ທີ່ສະໂມສອນໃຫ່ຍຂອງເມືອງໂພນທອງ, ໂດຍການໃຫ້ກຽດເຂົ້າຮ່ວມຂອງທ່ານ ຄຳຜາຍ ແກ້ວລາວັນ, ຮອງເລຂາພັກເມືອງໂພນທອງ, ມີຄະນະປະຈໍາພັກເມືອງ, ກຳມະການພັກເມືອງ, ເລຂາຮອງເລຂາຄະນະພັກຮາກຖານ, ຫົວໜ້າຮອງຫົວໜ້າຫ້ອງການ, ຄະນະພັກຄະນະບັນຊາ ກອງກຳລັງ ກປຊ - ປກສ,ພະນັກງານອາວຸດໂສບໍານານ, ພະນັກງານລັດຖະກອນ ແລະ ສະມາຊິກພັກເຂົ້າຮ່ວມ ຢ່າງພ້ອມພຽງ.
ທ່ານ ຄໍາຜາຍ ແກ້ວລາວັນ ໄດ້ຍົກໃຫ້ຮູ້ເຖິງປະຫວັດແຫ່ງການກຳເນີດຂອງກຳລັງປ້ອງກັນຄວາມສະຫງົບປະຊາຊົນ ຊຶ່ງທ່ານໄດ້ຍົກໃຫ້ເຫັນວ່າ ວັນທີ 5 ເມສາ ເປັນວັນທີ່ມີຄວາມໝາຍສຳຄັນທີ່ສຸດ ສໍາລັບ ສະມາຊິກພັກ, ພະນັກງານນັກຮົບໃນກຳລັງປະກອບອາວຸດ ໂດຍສະເພາະໃນກຳລັງປ້ອງກັນຄວາມສະຫງົບ ແລະ ສຳລັບປະຊາຊົນບັນດາເຜົ່າໃນທົ່ວປະເທດ. ກຳລັງປ້ອງກັນຄວາມສະຫງົບປະຊາຊົນ ເປັນກຳລັງທີ່ໄວ້ເນື້ອເຊື່ອໃຈຂອງພັກ, ເປັນກຳລັງ ທີ່ຮັບປະກັນຄວາມໝັ້ນຄົງພາຍໃນຊາດ, ສະກັດກັ້ນ ແລະ ຕ້ານການກໍ່ອາຊະຍາກຳ, ຮັກສາຄວາມເປັນລະບຽບຮຽບຮ້ອຍຂອງສັງຄົມ. ນັບແຕ່ມື້ສ້າງຕັ້ງຂຶ້ນມາກຳລັງດັ່ງກ່າວ ໄດ້ປະກອບສ່ວນຢ່າງໃຫຍ່ຫຼວງເຂົ້າໃນພາລະກິດປົດປ່ອຍປະເທດຊາດ, ປົກປັກຮັກສາປະເທດຊາດ, ເປັນກຳລັງປະຈັນບານ, ປະເຊີນໜ້າໂດຍກົງກັບອິດ ທິກຳລັງປໍລະປັກ, ພວກຝືນປະຕິວັດ ແລະ ພວກກໍ່ອາຊະຍາກຳຕ່າງໆ. ໃນທຸກສະຖານທີ່, ທຸກເວລາ ເປັນກຳລັງທີ່ມີມູນເຊື້ອກໍ່ສ້າງຮາກຖານການເມືອງ ໃຫ້ຕິດພັນສະໜິດແໜ້ນກັບປະຊາຊົນ, ປ້ອງກັນຜູ້ນຳພັກລັດຢ່າງເດັດດ່ຽວ, ພະນັກງານນັກຮົບປ້ອງກັນຄວາມສະຫງົບທຸກຮຸ່ນ ໃນໄລຍະຜ່ານມາ ກໍຄື ໃນປະຈຸບັນ ໄດ້ເປັນກຳລັງທີ່ຈົງຮັກພັກດີຕໍ່ພັກ, ຕໍ່ປະເທດຊາດ ແລະ ຕໍ່ ພັກປະຊາຊົນ ປະຕິວັດລາວ ທີ່ມີກຽດສະຫງ່າ, ໄດ້ອຸທິດ ຊີວິດເລືອດເນື້ອເຫື່ອແຮງ ເພື່ອຄວາມສະຫງົບສຸກຂອງປະຊາຊົນບັນດາເຜົ່າຕະຫຼອດມາ, ສົມແລ້ວທີ່ເປັນກຳລັງປະກອບອາວຸດວິລະຊົນຂອງຊາດລາວວິລະຊົນ.
ຄຽງຄູ່ໃນພິທີຍັງໄດ້ຜ່ານຂໍ້ຕົກລົງຂອງທ່ານເຈົ້າເມືອງໂພນທອງ ວ່າດ້ວຍການຍ້ອງຍໍສັນລະເສີນຕໍ່ກັບຄະນະບັນຊາກອງກຳລັງ ປກສ ເມືອງໂພນທອງ ທີ່ລົງທຳລາຍການປູກຝິ່ນຢູ່ພາຍໃນເມືອງ, ກອງປະຊຸມຍັງໄດ້ມີການທາບທາມບຸກຄະລະກອນພາຍໃນກົມກອງຂອງຕົນອີກດ້ວຍ.
Editor: ເມືອງໂພນທອງ
