ພິທີມອບ-ຮັບໃບປະກາດສະນີຍະບັດ ໃຫ້ແກ່ຜູ້ສຳເລັດການສຶກສາ ທິດສະດີການເມືອງ-ການປົກຄອງ ລະບົບຊັ້ນກາງ ຮຸ່ນທີ 12 ໄດ້ຈັດຂຶ້ນໃນທ້າຍເດືອນ ມີນາ 2018 ຜ່ານມານີ້, ເປັນກຽດເຂົ້າຮ່ວມມີ ທ່ານ ພົມມາ ພັນທະລັງສີ ຄະນະປະຈຳພັກແຂວງ, ຫົວໜ້າ ຄະນະຈັດຕັ້ງແຂວງຄຳມ່ວນ, ມີບັນດາທ່ານໃນຄະນະບໍລິຫານງານພັກແຂວງ, ຄະນະນຳຂັ້ນເມືອງ, ພະແນກການອ້ອມຂ້າງ, ຄະນະພັກໂຮງຮຽນການເມືອງ-ການປົກຄອງແຂວງສະຫວັນນະເຂດ, ພະນັກງານຄູ-ອາຈານ ຕະຫຼອດເຖິງຜູ້ສຳເລັດການສຶກສາ ທິດສະດີເຂົ້າຮ່ວມ.
ທ່ານນາງ ອານົງໄຊ ສັງທອງເພັດ ອຳນວຍການໂຮງຮຽນການເມືອງ-ການປົກຄອງແຂວງຄຳມ່ວນ ໄດ້ສະຫຼຸບຜົນການຮຽນ-ການສອນ ສົກປີຜ່ານມາວ່າ: ໂຮງຮຽນການເມືອງ-ການປົກຄອງໄດ້ເອົາໃຈໃສ່ປະຕິບັດຕາມພາລະບົດບາດ, ສິດ ແລະ ໜ້າທີ່ຂອງຕົນໃນການບຳລຸງ-ກໍ່ສ້າງຖັນແຖວພະນັກງານສືບທອດປ່ຽນແທນ ຢ່າງເປັນລະບົບຕໍ່ເນື່ອງຕະຫຼອດມາ. ເຊິ່ງໂຮງຮຽນ ການເມືອງ-ການປົກຄອງແຂວງ ມີພະນັກງານຄູ-ອາຈານທັງໝົດ 23 ທ່ານ. ໃນນີ້ມີອາຈານສອນປະຈຳ 16 ທ່ານ ແລະ ອາຈານຮັບເຊີນ 12 ທ່ານ. ມີນັກຮຽນເຂົ້າຮ່ວມການຮຽນທິດສະດີໃນຮຸ່ນທີ 12 ຈຳນວນ 69 ຄົນ, ໃນນີ້ມາຈາກຂະແໜງ ການຂັ້ນເມືອງ 22 ຄົນ ແລະ ຈາກພະແນກການອ້ອມຂ້າງ 47 ຄົນ,
ສຳລັບໂຄງການ ຫຼັກສູດການຮຽນ-ການສອນແມ່ນໄລຍະ 15 ເດືອນ, ແບ່ງອອກເປັນ 3 ພາກຮຽນ, ລວມມີ 28 ວິຊາຮຽນ, 153 ບົດສອນ, ມີ 80 ໜ່ວຍກິດ ແລະ 1.280 ຊົ່ວໂມງຮຽນ.
ຜ່ານການຄົ້ນຄວ້າຮໍ່າຮຽນຂອງນັກສຶກສາແມ່ນສາມາດສະຫຼຸບໄດ້ຜົນການຮຽນຄື: ນັກສຶກສາສອບເສັງໄດ້ເກຼດ A ລວມມີ 43,18%, ເກຼດ B+ 45,14%, ເກຼດ B 11,60%, ເກຼດ C+ 2,94% ແລະ ເກຼດ C 0,8%, ປະເມີນການຮຽນ-ການສອນ ແລະ ຕີລາຄາການຈັດປະເພດຄູ-ອາຈານທີ່ມີຜົນງານການສິດສອນດີເດັ່ນປະເພດ 1 ມີ 6 ທ່ານ, ປະເພດ 2 ມີ 13 ທ່ານ, ຈັດປະເພດນັກຮຽນດີເດັ່ນ ປະເພດ 1 ມີ 5 ທ່ານ ແລະ ປະເພດ 2 ມີ 24 ທ່ານ.
ຈາກນັ້ນ ທ່ານ ພົມມາ ພັນທະລັງສີ ກໍ່ໄດ້ເປັນກຽດມອບໃບປະກາສະນີຍະບັດໃຫ້ແກ່ຜູ້ທີ່ສຳເລັດການສຶກສາ ຈຳນວນ 69 ທ່ານ, ພ້ອມທັງມອບໃບຍ້ອງຍໍຂັ້ນແຂວງ ໃຫ້ແກ່ກົມກອງລວມໝູ່ ແລະ ບຸກຄົນທີ່ມີຜົນງານປະກອບສ່ວນເຂົ້າໃນການຮຽນ-ການສອນ ຄັ້ງນີ້ ປະກອບມີ 1 ກົມກອງ ແລະ ບຸກຄົນຈຳນວນ 12 ທ່ານ, ຍ້ອງຍໍຂັ້ນໂຮງຮຽນການເມືອງ-ການປົກຄອງແຂວງ ຈຳນວນ 24 ທ່ານ ແລະ ໃນໂອກາດດຽວກັນໂຮງຮຽນການເມືອງ-ການປົກຄອງແຂວງຄຳມ່ວນ ຍັງໄດ້ສະຫຼຸບຂະບວນການຮັກຊາດ ແລະ ພັດທະນາ ໂດຍຕິດພັນກັບການຮຽນ-ການສອນ ສົກປີ 2016-2017 ແລະ ທິດທາງແຜນການ ສົກປີ 2018-2019 ຕື່ມອີກ.
Editor: ກຳປານາດ ລັດຖະເຮົ້າ
