ໃນທ້າຍອາທິດທີ່ຜ່ານມາ ທາງຄະນະນໍາຂັ້ນສູງ ນະຄອນລາວກ່າຍ ແຂວງລາວກ່າຍ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ໄດ້ເດີນທາງເຂົ້າມາພົບປະຢ້ຽມຢາມ ແລະ ເຮັດວຽກຢູ່ເມືອງໄຊ, ແຂວງອຸດົມໄຊ ເຊິ່ງນໍາໂດຍທ່ານ ມ່າຍ ດິ່ງດິ້ງ ຄະນະປະຈໍາພັກແຂວງ, ເລຂາພັກ, ປະທານສະພາປະຊາຊົນ ນະຄອນລາວກ່າຍ ໂອກາດດັ່ງກ່າວ ໄດ້ມີບັນດາການນຳເມືອງໄຊ ເຊິ່ງນຳໂດຍທ່ານ ຄຳແພງ ຂັນມະນີ, ກໍາມະການພັກແຂວງ, ເລຂາພັກເມືອງເຈົ້າເມືອງເມືອງໄຊພ້ອມຄະນະໃຫ້ການຕ້ອນຮັບຢ່າງອົບອຸ່ນ.
ການພົບປະຢ້ຽມຢາມ ເຊິ່ງກັນ ແລະ ກັນ ລະຫວ່າງ ສອງຝ່າຍໃນຄັ້ງນີ້ ກໍ່ເພື່ອປະຕິ ບັດຕາມບົດບັນທຶກຊ່ວຍຈຳລະຫວ່າງ ນະຄອນລາວກ່າຍ ກັບ ເມືອງໄຊ ກ່ຽວກັບ ການແລກປ່ຽນບົດຮຽນ ຮ່ວມກັນ ທັງເປັນການເພີ່ມທະວີການພົວພັນຮ່ວມມືຮອບດ້ານ ແລະ ຄວາມສາມັກຄີແບບພິເສດ ໃຫ້ນັບມື້ນັບແໜ້ນແຟ້ນຍິ່ງຂຶ້ນກວ່າເກົ່າ. ໃນນັ້ນ ທັງສອງຝ່າຍໄດ້ເຂົ້າຮ່ວມກອງປະຊຸມ ໂດຍຮັບຟັງການລາຍງານສະພາບລວມໃນການພັດທະນາເສດຖະກິດ-ສັງຄົມ ໃນໄລຍະຜ່ານມາ ເປັນຕົ້ນແມ່ນໄດ້ຍົກໃຫ້ເຫັນເຖິງວຽກງານສາມສ້າງ, ການທ່ອງທ່ຽວ,ອຸດສາຫະກຳ, ການຄ້າ, ຄົມມະນາຄົມຂົນສົ່ງ, ວຽກງານປ້ອງກັນຊາດ, ປ້ອງກັນຄວາມສະຫງົບ ແລະ ການພົວພັນຮ່ວມມື ທັງພາຍໃນ ແລະ ຕ່າງປະເທດ ຈາກນັ້ນ ທັງສອງຝ່າຍໄດ້ມີພິທີເຊັບບົດບັນທຶກການຮ່ວມມື ເຊິ່ງກັນ ແລະກັນ ລະຫວ່າງ ນະຄອນລາວກ່າຍ ກັບ ເມືອງ ໄຊ, ແຂວງອຸດົມໄຊ ໂດຍຝ່າຍ ລາວ ແມ່ນທ່ານ ຄໍາແພງ ຂັນມະນີ ເຈົ້າເມືອງ ເມືອງ ໄຊ ສ່ວນຝ່າຍ ຫວຽດນາມ ແມ່ນທ່ານ ມ່າຍ ດິ່ງດິ້ງ ປະທານສະພາປະຊາຊົນ ນະຄອນລາວກ່າຍ ເຊິ່ງມີຄະນະນໍາທັງສອງຝ່າຍເປັນສັກຂີພິຍານ ສຳລັບ, ເນື້ອໃນບົດບັນທຶກ ການຮ່ວມມື ແລະ ແລກປ່ຽນບົດຮຽນດັ່ງກ່າວ ປະກອບມີວຽກງານດ້ານການເມືອງ, ເສດຖະກິດ, ວັດທະນາທໍາ-ສັງຄົມ ແລະ ວຽກງານ ປກຊ-ປກສ.
ສ່ວນຕອນເຊົ້າຂອງວັນທີ 28 ມີນາ 2018 ທາງຄະນະນໍາ ນະຄອນລາວກ່າຍ ແລະ ເມືອງໄຊ ໄດ້ເຂົ້າພົບທ່ານ ສົມຈິດ ປັນຍາສັກ ຮອງເຈົ້າແຂວງ ອຸດົມໄຊ ເພື່ອລາຍງານຈຸດປະສົງຂອງການເຄື່ອນໄຫວພົບປະ, ຢ້ຽມຢາມແລະ ເຮັດວຽກຢູ່ແຂວງອຸດົມໄຊ ໃຫ້ການນຳແຂວງຮັບຊາບ. ຈາກນັ້ນ ຄະນະນຳ ນະຄອນລາວກ່າຍ ກໍໄດ້ສືບຕໍ່ເດີນ ທາງອອກຈາກແຂວງອຸດົມໄຊ ເພື່ອເຄື່ອນໄຫວວຽກງານຂອງຕົນຕາມວາລະ ເຊິ່ງມີເປົ້າຫມາຍຢູ່ທີ່ແຂວງຫຼວງພະບາງ.

Editor: ນັກຂ່າວແຂວງອຸດົມໄຊ