ຕອນເຊົ້າ ວັນທີ 3 ເມສາ 2018 ນີ້ ກອງບັນຊາການ ປກສ ແຂວງບໍລິຄໍາໄຊ ໄດ້ຈັດພິທີສະເຫຼີມສະຫຼອງປາຖະກະຖາລະນືກວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 57 ປີ ( 05 ເມສາ 1961–05 ເມສາ 2018, ໂດຍການເປັນກຽດເຂົ້າຮ່ວມເປັນປະທານ ແລະ ປາຖະກະຖາຂອງ ທ່ານ ພັນໂທ ຄໍາໝັ້ນ ຂຸນຈັນທະ, ວິລະຊົນແຫ່ງຊາດ, ອະດິດຮອງກອງບັນຊາການ ປກສ ແຂວງບໍລິຄໍາໄຊ ພະນັກງານອາວຸໂສບໍານານ, ມີທ່ານ ພັນເອກ ທອງໃບ ລໍວັນໄຊ ກຳມະການພັກແຂວງ ເລຂາອົງຄະນະພັກ ຫົວໜ້າກອງບັນຊາການ ປກສ ແຂວງບໍລິຄໍາໄຊ, ມີພະນັກງານອາວຸໂສບໍານານ, ມີຄະນະພັກ-ຄະນະບັນຊາ, ຄະນະຫ້ອງ, ກອງ, ໂຮງຮຽນ ປກສ ຊັ້ນຕົ້ນເລກ 4, ຕະຫຼອດຮອດພະນັກງານຫຼັກແຫຼ່ງພາຍໃນ ປກສ ແຂວງ ເຂົ້າຮ່ວມຢ່າງພ້ອມພຽງ.
ປະທານໄດ້ກ່າວວ່າ: ກໍາລັງປ້ອງກັນຄວາມສະຫງົບ ແມ່ນພາກສ່ວນໜື່ງຂອງກຳລັງປະກອບອາວຸດ, ມີຄວາມຈົ່ງຮັກພັກດີຕໍ່ອຸດົມການຂອງພັກ, ເປັນເຄື່ອງມືອັນແຫຼມຄົມ ໃຫ້ແກ່ຊົນຊັ້ນກໍາມະກອນ ແລະ ຊາວຜູ້ອອກແຮງງານ, ເຊີ່ງເປັນກໍາລັງທີ່ກໍາເນີດເຕີບໃຫ່ຍມາຈາກປະຊາຊົນ, ເຮັດໜ້າທີ່ສູ້ຮົບ ກັບບັນດາອິດທິປໍລະປັກ ແລະ ກຸ່ມຄົນບໍ່ດີ ຫວັງມ້າງເພທໍາລາຍລະບອບໃໝ່ຂອງພວກເຮົາ ແລະ ວັນທີ 05 ເມສາ 1961 ແມ່ນວັນສ້າງຕັ້ງກໍາລັງປ້ອງກັນຄວາມສະຫງົບປະຊາຊົນ ອັນເປັນປະຫວັດສາດສໍາຄັນຂອງພັກ-ຂອງຊາດ ເວົ້າລວມເວົ້າສະເພາະກໍ່ຄືຂອງກຳລັງປ້ອງກັນຄວາມສະຫງົບປະຊາຊົນບັນດາເຜົ່າ, ນັບແຕ່ໄດ້ຮັບການສ້າງຕັ້ງເປັນຕົ້ນມາກໍາລັງປ້ອງກັນຄວາມສະຫງົບໄດ້ປະກອບສ່ວນຢ່າງໃຫ່ຍຫຼວງໃນພາລະກິດປົດປ່ອຍຊາດ ແລະ ສ້າງສາພັດທະນາປະເທດຊາດ, ເປັນກຳລັງປະຈັນບານປະເຊີນໜ້າໂດຍກົງ, ເປັນກໍາລັງທີ່ມີມູນນເຊື້ອກໍ່ສ້າງຮາກຖານການເມືອງ, ຕິດພັນສະໜິດແໜ້ນກັບປະຊາຊົນ, ພ້ອມກັບການສ້າງພະນັກງານ-ນັກຮົບທຸກຮຸ່ນໃນແຕ່ລະໄລຍະໃຫ້ກາຍເປັນກໍາລັງທີ່ຈົ່ງຮັກພັກດີຕໍ່ປະເທດຊາດ ແລະ ປະຊາຊົນບັນດາເຜົ່າ, ເປັນກຳລັງທີ່ຢູ່ພາຍໃຕ້ການຊີ້ນໍາ-ນໍາພາຢ່າງເດັດຂາດໂດຍກົງ ຮອບດ້ານຂອງ ພັກປະຊາຊົນ ປະຕິວັດລາວ, ໄດ້ອຸທິດຊີວິດເລືອດເນື້ອເຫື່ອແຮງ ເພື່ອຄວາມສະຫງົບສຸກຂອງປະຊາຊົນບັນດາເຜົ່າຕະຫຼອດມາ. ມາຮອດປະຈຸບັນນີ້ ກຳລັງປ້ອງກັນຄວາມສະຫງົບ ໄດ້ຮັບການປັບປຸງຢ່າງຮອບດ້ານ, ສາມາເຮັດສໍາເລັດໜ້າທີ່ໃນການຮັກສາຄວາມສະຫງົບດ້ານການເມືອງຢ່າງໜັກແໜ້ນ ແລະ ປົກປັກຄວາມເປັນລະບຽບຮຽບຮ້ອຍໃນສັງຄົມໂດຍພື້ນຖານ, ອັນພົ້ນເດັ່ນແມ່ນການປ້ອງກັນການນໍາ ພັກ-ລັດ, ປ້ອງກັນກອງປະຊຸມລະດັບຊາດ ແລະ ສາກົນ, ປ້ອງກັນແຂກພາຍໃນ ແລະ ຕ່າງປະເທດ, ວັນບຸນສໍາຄັນຕ່າງໆຂອງຊາດ, ຂອງພັກ ແລະ ປະຊາຊົນລາວບັນດາເຜົ່າ ໃຫ້ມີຄວາມສະຫງົບສຸກ, ສົມກັບເປັນກຳລັງທີ່ມາປະຊາຊົນ ແລະ ໄດ້ຮັບຄວາມໄວ້ເນື້ອເຊື່ອໃຈຈາກປະຊາຊົນຕະຫຼອດມາ. ນອກນັ້ນ, ກຳລັງປ້ອງກັນຄວາມສະຫງົບ ຍັງໄດ້ເອົາໃຈໃສ່ປັບປຸງກໍ່ສ້າງກຳລັງໃຫ້ມີຄວາມເຕີບໃຫ່ຍ, ເຂັ້ມແຂງ ແລະ ຂະຫຍາຍຕົວທາງດ້ານປະລິມານ ແລະ ຄຸນນະພາບ, ມີຄວາມຊໍານິຊໍານານທາງດ້ານວຽກງານວິຊາສະເພາະ ແລະ ທັນສະໄໝຂື້ນເປັນກ້າວ ເຮັດໃຫ້ປະເທດຊາດມີສະຖຽນລະພາບທາງດ້ານການເມືອງ, ມີຄວາມສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍທາງສັງຄົມ. ນອກນັ້ນ ຍັງໄດ້ຍົກໃຫ້ເຫັນຜົນງານອັນຍິ່ງໃຫ່ຍຂອງກຳລັງປ້ອງກັນຄວາມສະຫງົບ ປກສ ແຂວງບໍລິຄໍາໄຊ ທີ່ໄດ້ພ້ອມກັນເອົາໃຈໃສ່ຈັດຕັ້ງເຄື່ອນໄຫວປະຕິບັດໜ້າທີ່ວຽກງານວິຊາສະເພາະຂອງຕົນໄດ້ຮັບຜົນສໍາເລັດຢ່າງຮອບດ້ານ, ເຮັດໃຫ້ແຂວງບໍລິຄໍາໄຊ ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ ຮ້ອຍສ່ວນຮ້ອຍ.
ໃນໂອກາດອັນສະຫງ່າລາສີນີ້ ໃນພິທີຍັງໄດ້ຜ່ານຂໍ້ຕົກລົງ ສະບັບເລກທີ 837/ກມປສ ລົງວັນທີ 26 ມີນາ 2018 ແລະ ຂໍ້ຕົກລົງ ສະບັບເລກທີ 1930/ປກສ.ຂ ລົງວັນທີ 02 ເມສາ 2018 ວ່າດ້ວຍການເລື່ອນຊັ້ນ ແລະ ປະດັບຊັ້ນໃຫ້ ນາຍ ແລະ ພົນຕໍາຫຼວດ ປກສ ແຂວງບໍລິຄໍາໄຊ ຈໍານວນ 93 ສະຫາຍ, ຍິງ 25 ສະຫາຍ ໃຫ້ກຽດປະດັບຊັ້ນໂດຍທ່ານ ພັນເອກ ທອງໃບ ລໍວັນໄຊ ຫົວໜ້າກອງບັນຊາການ ປກສ ແຂວງບໍລິຄໍາໄຊ ແລະ ໂອກາດດຽວ ຍັງມອບຂອງຂວັນທີ່ລະນືກ ໃຫ້ແກ່ພະນັກງານອາວຸໂສບໍໍານານ ຕື່ມອີກ.
Editor: ປກສ ແຂວງບໍລິຄຳໄຊ
