ຢູ່ຫ້ອງປະຊຸມ ປ.ກ.ສ ເມືອງເຊໂປນ ໄດ້ຈັດກອງປະຊຸມພົບປະແລກປ່ຽນວຽກງານ ປ້ອງກັນຄວາມສະຫງົບ 6 ເມືອງ ທີ່ມີຊາຍແດນຕິດຈອດກັນ ລະຫວ່າງ ເມືອງເຊໂປນ, ແຂວງສະຫວັນນະເຂດ ກັບ ເມືອງເຮືອງຮວາ, ແຂວງກວາງຈີ, ເມືອງນອງ ແຂວງສະຫວັນນະເຂດ ກັບ ເມືອງດຣາກົງແຂວງກວາງຈີ, ເມືອງສະມ້ວຍ, ແຂວງສາລະວັນ ກັບ ເມືອງອາເລື້ອຍ, ແຂວງເທືອທຽນເຫວ ສສຫວຽດນາມ ຂື້ນຢ່າງເປັນທາງການ,ໂດຍເປັນປະທານຂອງ ທ່ານ ພັນໂທ ຈັນທາ ແສນສຸລິວົງ ຄະນະກອງບັນຊາການ, ຮອງຫົວໜ້າກອງບັນຊາການ ປ.ກ.ສ ແຂວງສະຫວັນນະເຂດ, ມີ ທ່ານ ພັນໂທພິເສດ ເລຈິກວາງ ຮອງຫົວໜ້າຫ້ອງວີຊາສະເພາະຕໍາຫລວດກວາງຈີ ສສ ຫວຽດນາມ, ເຂົ້າຮ່ວມມີບັນດາທ່ານໃນຄະນະພັກ, ຄະນະກອງບັນຊາການ ປ.ກ.ສ ທັງ 6 ເມືອງ ພ້ອມພະນັກງານວີຊາການເຂົ້າຮ່ວມຢ່າງພ້ອມພຽງ.

ໃນທີ່ປະຊຸມຕາງໜ້າ ຈາກ 6 ເມືອງ ກໍ່ໄດ້ຜັດປ່ຽນກັນຂື້ນນໍາສະເໜີ ສະພາບຄວາມບໍ່ສະຫງົບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍພາຍໃນເມືອງຂອງຕົນ, ຈາກນັ້ນກໍ່ໄດ້ປະກອບຄໍາຄິດຄໍາເຫັນຄົ້ນຄວ້າເຈາະຈີ້ມບັນຫາຕ່າງໆ ທີ່ຄົງຄ້າງ ລະຫວ່າງ ເຂດຊາຍແດນ ຂອງແຕ່ລະເມືອງ ມາປັບປຸງແກ້ໄຂເຊີ່ງໃນກອງປະຊຸມຄັ້ງນີ້ສອງຝ່າຍ ໄດ້ເປັນເອກະພາບຕົກລົງຕິລາຄາສະພາບກ່ຽວກັບເລ້ລ່ຽມກົນອຸບາຍການເຄື່ອນໄຫວ ຂອງກໍາລັງອິດທິປໍລະປັກ ແລະ ກຸ່ມຄົນບໍ່ດີທີ່ຫວັງທໍາລາຍມ້າງເພການປະຕິວັດ ສ ປປ ລາວ - ສາທາລະນະລັດ ສັງຄົມນິຍົມ ຫວຽດນາມ, ບັນດາບັນຫາທີ່ພົ່ນເດັ່ນພົວພັນເຖີງຄວາມສະຫງົບສຸກ, ຄວາມເປັນລະບຽບຮຽບຮ້ອຍຂອງສັງຄົມ ຕາມຂອບເຂດຊາຍແດນ 6 ເມືອງ, ກ່ຽວກັບເລ້ລ່ຽມກົນອຸບາຍຂອງອິດທີກໍາລັງປໍລະປັກ ແລະ ການກະທໍາຜິດກົດໝາຍ, ການລະເມີດຕໍ່ຄວາມສະຫງົບສຸກ ແລະ ຄວາມເປັນລະບຽບຮຽບຮ້ອຍໃນຕໍ່ໜ້າ, ທັງສອງຝ່າຍເຫັນດີເປັນເອກະພາບສຶບຕໍ່ປະສານສົມທົບປົກປັກຮັກສາຄວາມສະຫງົບໃນຂອບເຂດຊາຍແດນ,ເພີ່ມທະວີສາຍພົວພັນຮ່ວມມື ມິດຕະພາບພິເສດຮອບດ້ານ ລະຫວ່າງ ປະຊາຊົນ 6 ເມືອງຊາຍແດນແລະ ສອງກໍາລັງວີຊາສະເພາະຂອງ 6 ເມືອງ ຢ່າງບໍ່ຢຸດຢັ້ງ 

ສຸດທ້າຍ ທ່ານ ພັນໂທ ຈັນທາ ແສນສຸລິວົງ ຄະນະກອງບັນຊາການ, ຮອງຫົວໜ້າກອງບັນຊາການ ປ.ກ.ສ ແຂວງສະຫວັນນະເຂດ ໄດ້ໃຫ້ກຽດຂື້ນໂອ້ລົມ ແລະ ໃຫ້ທິດເຍື່ອງທາງແກ່ກອງປະຊຸມດັ່ງກ່າວ ຊື່ງທ່ານໄດ້ຮຽກຮ້ອງມາຍັງຄະນະພັກ,ຄະນະກອງບັນຊາການ ປ.ກ.ສ 6 ເມືອງ ທີ່ມີຊາຍແດນຕິດຈອດກັນໃຫ້ປະສານສົມທົບກັນຕ້ານ ແລະ ສະກັດກັ້ນປະກົດການຫຍໍ້ທໍ້ສັງຄົມ ບັນຫາຢາເສບຕິດ, ສາສະໜາທີ່ຂັດຕໍ່ແນວທາງຂອງພັກ-ລັດ, ຈໍາແນກມິດສັດຕູຢ່າງຈະແຈ້ງ, ຕ້ານການແຊກແຊງຂອງກຸ່ມຄົນບໍ່ດີທີ່ຫວັງທໍາລາຍມ້າງເພການພົວພັນແບບພິເສດສອງຝ່າຍ ແລະ ບັນຫາອື່ນໆ,ຮັກສາມູນເຊື້ອແບບພິເສດ ລະຫວ່າງ ລາວ-ຫວຽດນາມ ໃຫ້ໝັ້ນຄົງທະນົງແກ່ນ, ຍົກສູງຄວາມເປັນເຈົ້າການໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມສະຫງົບປອດໄພແລະ ເປັນລະບຽບຮຽບຮ້ອຍ, ການປະຕິບັດລະບຽບກົດໝາຍ ລະຫວ່າງ ສອງຊາດໃຫ້ເຂັ້ມງວດໂດຍສະເພາະຮິດຄອງປະເພນີ, ລົງເລີກມະຕິຄໍາສັ່ງ ແລະ ລະບຽບກົດໝາຍເຜີຍແຜ່ໃຫ້ປະຊາຊົນຮັບຮູ້ຢ່າງທົ່ວເຖີງ, ຈາກນັ້ນ ກໍ່ໄດ້ເຊັນບົດບັນທຶກຊ່ວຍຈໍາລະຫວ່າງເມືອງເຊໂປນ ແລະ ເມືອງອາເລື້ອຍຊ້ອງໜ້າແຂກເຂົ້າຮ່ວມທັງໝົດເປັນສັກຂີພິຍານນໍາດ້ວຍ

ທີມຂ່າວ ເມືອງເຊໂປນ

Editor: ກຳປານາດ ລັດຖະເຮົ້າ