ຄະນະຫ້ອງການກວດກາພັກ-ລັດ ໄດ້ຈັດກອງປະຊຸມສະຫຼຸບວຽກງານ ກວດກາປີ 2017 ແລະ ທິດທາງແຜນການປີ 2018 ຂື້ນທີ່ສະໂມສອນສຳນັກງານປົກຄອງເມືອງຄຳ ແຂວງຊຽງຂວາງ ໂດຍການເປັນປະທານຂອງ ສະຫາຍ ວຽງໄຊ ສີວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງຄຳ, ມີ ສະຫາຍ ເພັງແກ້ວ ດວງມາລາ ຮອງປະທານກວດກາພັກ-ລັດແຂວງຊຽງຂວາງ, ມີ ສະຫາຍ ນາງ ແສງຈັນ ວົງສຸລິດ ຄະນະປະຈຳພັກເມືອງ ປະທານກວດກາພັກ-ລັດເມືອງ, ມີຄະນະປະຈຳ ພັກເມືອງ, ກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ທະຫານ, ຕຳຫຼວດ, ໂຮງຮຽນ, ໂຮງໝໍ ພ້ອມດ້ວຍຄະນະພັກຮາກຖານກຸ່ມບ້ານ 9 ບ້ານເທດສະບານ ເຂົ້າຮ່ວມຢ່າງພ້ອມພຽງ.
ສະຫາຍ ນາງ ແພງສີ ບຸນດີມີລາວົງ ຮອງປະທານກວດກາພັກ-ລັດເມືອງ ກໍ່ໄດ້ຂື້ນຜ່ານ ບົດສະຫຼຸບໃຫ້ຮູ້ວ່າ: ຜ່ານການຈັດຕັ້ງປະຕິບັດໃນໄລຍະຜ່ານມາຄະນະພັກ, ຮາກຖານພັກ ແລະ ອົງການ ຕ່າງໆກໍ່ໄດ້ພ້ອມກັນຕັ້ງໜ້າເຄື່ອນໄຫວເສີມຂະຫຍາຍບົດບາດ ການນຳພາຂອງພັກໃນການຈັດຕັ້ງປະຕິບັດຕາມມະຕິກອງປະຊຸມໃຫຍ່ຂອງຄະນະພັກຂັ້ນເທີງ ເວົ້າລວມເວົ້າສະເພາະກໍ່ຄືຂັ້ນຂອງຕົນເປັນຕົ້ນແມ່ນນຳເອົາມະຕິຄຳສັ່ງ, ນິຕິກຳຕ່າງໆຂອງພັກ, ລະບຽບແບບແຜນນຳພາ-ວິທີເຮັດວຽກຂອງຄະນະພັກ, ການປະ ຕິບັດວິໄນພັກ, ການຂະຫຍາຍພັກ, ການກໍ່ສ້າງພັກແຂວງຮູ້ນຳພາຮອບດ້ານ, ຈັດແບ່ງປະເພດສະມາຊິກພັກ, ໜ່ວຍພັກ ແລະ ການເງີນຂອງພັກລົງເຊື່ອມຊືມເຜີຍແຜ່ໃຫ້ແກ່ສະມາຊິກພັກໄດ້ຮັບຮູ້ ແລະ ເຂົ້າໃຈ ຢ່າງເລີກເຊີ່ງ, ພ້ອມນັ້ນກໍ່ຍັງໄດ້ປັບປຸງກໍ່ສ້າງພັກທາງດ້ານການຈັດຕັ້ງເປັນລະບົບຕໍ່ເນື່ອງສາມາດສ້າງໜ່ວຍພັກໄດ້ທັງໝົດ 186 ໜ່ວຍ, ມີ 14 ຄະນະພັກຮາກຖານ, ມີໜ່ວຍພັກແຂງ-ຮູ້ນຳພາຮອບດ້ານ 131 ໜ່ວຍ, ໜ່ວຍພັກແຂວງດ້ານໃດດ້ານໜຶ່ງ 21 ໜ່ວຍ ແລະ ມີສະມາຊິກພັກທັງໝົດ 2.361 ສະຫານ, ຍິງ 643 ສະຫາຍ.
ນອກຈາກນັ້ນກໍ່ຍັງໄດ້ດຳເນີນກວດກາຕິດຕາມພາລະບົດບາດສິດຂອງເຂດ ແລະ ໜ້າທີ່ ເຊັ່ນ: ປະຕິບັດຕາມແຜນງົບປະມານການສ້າງພື້ນຖານໂຄງລ່າງ, ການຄຸ້ມຄອງ ແລະ ການນຳໃຊ້ຊັບພະຍາກອນຕ່າງໆ ລະຫວ່າງ ທີ່ດິນ, ປ່າສະຫງວນ ແລະ ຊາຍແດນບ້ານຕໍ່ບ້ານ ແລະ ວຽກງານອື່ນໆ, ເຮັດໃຫ້ພະນັກງານການນຳມີຄວາມຮັບຮູ້ເປັນເອກະພາບສູງຕໍ່ກັບວຽກງານຕິດຕາມກວດກາເປັນວຽກງານທີ່ສຳຄັນເຮັດໃຫ້ມີປະສິດທິພາບເສີມຂະຫຍາຍຢ່າງຕັ້ງໜ້າ, ແກ້ໄຂປະກົດການຫຍໍ້ທໍ້ ແລະ ແບບແຜນວິທີເຮັດ ວຽກໄດ້ຮັບການປັບປຸງມີຄວາມສາມັກຄີພາຍໃນຢ່າງແໜ້ນໜາ, ຮັບປະກັນຄວາມຊັດເຈນ, ຍຸຕິທຳທັນກຳ ນົດຕາມເວລາ ແລະ ປະຕິບັດຢ່າງເຂັ່ມງວດຕາມກົດລະບຽບພັກ ແລະ ກົດໝາຍຂອງລັດ. ນອກຈາກນີ້ ກໍ່ຍັງຈະໄດ້ແກ້ໄຂຈຸດອ່ອນ ແລະ ຂໍ້ຄົງຄ້າງ.
ຈາກນັ້ນ ສະຫາຍ ນາງ ແສງຈັນ ວົງສຸລິດ ຄະນະປະຈຳພັກເມືອງປະທານກວດກາພັກ-ລັດເມືອງ, ສະຫາຍ ວັນໄຊ ມານາວົງ ຮອງປະທານກວດກາພັກລັດເມືອງ ກໍ່ໄດ້ຜັດປ່ຽນກັນຂື້ນຜ່ານທິດທາງແຜນການ ໃນປີ 2018 ແລະ ບົດແນະນຳ, ຂໍ້ກຳນົດຕື່ມອີກ. ພ້ອມນີ້ຜູ້ແທນໃນກອງປະຊຸມກໍ່ໄດ້ພັດປ່ຽນກັນປະກອບ ຄຳຄິດຄຳເຫັນໃສ່ບົດສະຫຼຸບ. ແລະ ໃນຕອນທ້າຍ ສະຫາຍ ວຽງໄຊ ສີວິໄລ ກຳມະການພັກແຂວງ ເລຂາພັກເມືອງເຈົ້າເມືອງ-ເມືອງຄຳ ກໍ່ໄດ້ຂື້ນໂອ້ລົມມີຄຳຄິດຄຳເຫັນກ່ອນອື່ນໝົດສະຫາຍກໍ່ໄດ້ກ່າວຍ້ອງຍໍຊົມເຊີຍຕໍ່ຜົນງານທີ່ໄດ້ຈັດຕັ້ງປະຕິບັດໃນໄລຍະຜ່ານພ້ອມທັງໃຫ້ທິດຊີ້ນຳແກ່ຄະນະຫ້ອງການຈົ່ງພ້ອມກັນເອົາໃຈໃສ່ແກ້ໄຂຈຸດອ່ອນ ແລະ ຂໍ້ຄົງຄ້າງ ທີ່ຍັງຄ້າງຄາໃຫ້ໄດ້ຮັບຜົນສຳເລັດຂື້ນເທື່ອລະກ້າວ
ທີມຂ່າວ ຫ້ອງການ ຖວທ ເມືອງຄໍາ
Editor: ກຳປານາດ ລັດຖະເຮົ້າ
