ກອງປະຊຸມໃຫ່ຍ ຄະນະໜ່ວຍພັກ ຫ້ອງການອຸດສາຫະກໍາ ແລະ ການຄ້າ ເມືອງທ່າແຕງ ແຂວງເຊກອງ ໄດ້ຈັດຂື້ນເມື່ອບໍ່ດົນຜ່ານມານີ້ ຢູ່ທີ່ຫ້ອງການດັ່ງກ່າວ ໂດຍພາຍໃຕ້ການເປັນປະທານຂອງ ສະຫາຍ ບຸນສວນ ບຸດບຸນມາ ຄະນະປະຈໍາພັກເມືອງ ປະທານກວດກາພັກ-ລັດ ເມືອງທ່າແຕງ,ມີ ສະຫາຍ ຄອນສະຫວັນ ພັນໂຊດ ກໍາມະການພັກເມືອງ ເລຂາໜ່ວຍພັກ ອຸດສາຫະກໍາ ແລະ ການຄ້າ ເມືອງທ່າແຕງ, ມີຄະນະໜ່ວຍພັກອ້ອມຂ້າງ ພ້ອມດ້ວຍສະມາຊິກພັກສົມບູນ ແລະ ສໍາຮອງເຂົ້າຮ່ວມ.
ໃນພິທີ ສະຫາຍ ຄອນສະຫວັນ ພັນໂຊດ ກໍາມະການພັກເມືອງ ເລຂາໜ່ວຍພັກອຸດສາຫະກໍາແລະການຄ້າເມືອງ ທ່າແຕງ ຊີ້ໃຫ້ເຫັນວ່າໄລຍະ 2 ປີກວ່າ (ສົກ 2015-2017) ຄະນະໜ່ວຍພັກໄດ້ຖືເອົາວຽກງານການເມືອງແນວຄິດເປັນກົກ, ເພື່ອສຶກສາອົບຮົມ ແລະ ຕໍານິສົ່ງຂ່າວຢ່າງເປັນປົກກະຕິ, ເຮັດໃຫ້ສະມາຊິກກໍາແໜ້ນນະໂຍບາຍຂອງພັກ, ມີຄຸນທາດການເມືອງໜັກແໜ້ນ, ມີຄຸນສົມບັດ-ສິນທໍາປະຕິວັດ, ມີຈັນຍາບັນທີ່ຖືກຕ້ອງ ແລະ ເປັນແບບຢ່າງໃນການເຄົາລົບປະຕິບັດລະບຽບກົດໝາຍ ດ້ວຍການເອົາບັນດາມະຕິຄໍາສັ່ງ, ຄໍາແນະນໍາ, ແຈ້ງການຕ່າງໆຂອງຂັ້ນເທິງມາເຜີຍແຜ່ໃຫ້ເຊື່ອມຊຶມ ແລະ ຈັດຕັ້ງປະຕິບັດຢ່າງກວ້າງຂວາງ, ຂະຫຍາຍສະມາຊິກພັກສົມບູນ ມີ 4 ສະຫາຍ, ສໍາຮອງ ມີ 5 ສະຫາຍ, ຍິງມີ 1 ສະຫາຍ,ເຂົ້າຮຽນສະໜັບສະໜູນ ແລະ ຮຽນກົດລະບຽບມີ 2 ສະຫາຍ, ຍິງ 1 ສະຫາຍ, ປະຈຸບັນມີສະມາຊິກພັກທັງໝົດ 18 ສະຫາຍ, ຍິງ 2 ສະຫາຍ, ສໍາຮອງມີ 2 ສະຫາຍ,ຍິງ 1 ສະຫາຍ, ນອກນີ້ ຍັງໄດ້ຮັບຮອງເອົາທິດທາງແຜນການຕໍ່ໜ້າ ເພື່ອນໍາໄປຈັດຕັ້ງປະຕິບັດໃຫ້ດີຂື້ນກວ່າເກົ່າ.
ພ້ອມນີ້ ຜູ້ແທນກອງປະຊຸມ ໄດ້ພ້ອມກັນໃຊ້ສິດ ປະຊາທິປະໄຕ ຂອງຕົນປ່ອນບັດຄັດເລືອກເອົາຄະນະພັກຊຸດໃໝ່. ບົນພື້ນຖານຫຼັກການລວມສູນປະຊາທິປະໄຕ, ທັງຖືກຕ້ອງສອດຄ່ອງກັບມາດຖານເງື່ອນໄຂ ທີ່ກຳນົດໄວ້, ເຊິ່ງມີຜູ້ອອກຮັບສະໝັກເລືອກຕັ້ງ ຈໍານວນ 5 ສະຫາຍ ແລະ ໄດ້ເປັນເອກະພາບກັນ ຮັບຮອງເອົາ ເລຂາ ຮອງເລຂາ ແລະ ປະທານກວດກາ ດ້ວຍວິທີລົງປະຊາມະຕິຮັບຮອງເອົາ 3 ສະຫາຍ ຄື: ຮັບຮອງເອົາ ສະຫາຍ ຄອນສະຫວັນ ພັນໂຊດ ເປັນເລຂາໜ່ວຍພັກ,ສະຫາຍ ບຸນຫຼາຍ ບຸບຜາພັນ ເປັນຮອງເລຂາ, ສ່ວນ ສະຫາຍ ບຸນພອນ ຄູນທະວີ ເປັນປະທານກວດກາພັກ-ລັດ.
ແຫລ່ງຂ່າວ ຍັງໄດ້ລາຍງານຕື່ມອີກວ່າ ວັນດຽວກັນນີ້, ທີ່ເມືອງທ່າແຕງ ຍັງໄດ້ຈັດກອງປະຊຸມສະຫຼຸບວຽກງານປະຈໍາປີ 2017 ຂອງເຂດຈຸດສຸ່ມພັດທະນາທີ 1 ເຊິ່ງເປັນເຂດເທດສະບານຂອງເມືອງທ່າແຕງ ກອງປະຊຸມຄັ້ງນີ້ໂດຍເປັນກຽດເຂົ້າຮ່ວມຂອງ ທ່ານ ພັນໂທ ແສງມະນີ ດາລາສິນ ຄະນະປະຈໍາພັກເມືອງ, ຫົວໜ້າກອງບັນຊາການທະຫານເມືອງທ່າແຕງ, ໂດຍມີພາກສ່ວນກ່ຽວຂ້ອງເຂົ້າຮ່ວມ. ໃນກອງປະຊຸມດັ່ງກ່າວ ຜູ້ເຂົ້າຮ່ວມໄດ້ຮັບຟັງບົດສະຫຼຸບປະຈໍາປີ 2017 ພ້ອມທິດທາງແຜນການສືບຕໍ່ໜ້າ 2018 ເພື່ອບຸກບື້ນສູ້ຊົນຊຸກຍູ້ອົງການປົກຄອງບ້ານ ປະຕິບັດໜ້າທີການເມືອງຢ່າງໜັກແໜ້ນ, ເຮັດໃຫ້ແຕ່ລະບ້ານມີສະຖຽນລະພາບທາງດ້ານການເມື່ອງ, ມີເສດຖະກິດໃນທ່າກ້າວທີ່ດີ ມີການຂະຫຍາຍຕົວເທື່ອລະກ້າວ, ຖືເອົາການສຶກສາອົບຮົມການເມືອງແນວຄິດໃຫ້ແກ່ກອງຫຼອນ ແລະ ປກສ ບ້ານ, ໄດ້ຮັບຮູ້ເຊື່ອມຊືມຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ທາດແທ້ມູນເຊື້ອຂອງກອງທັບ ຕາມ 4 ແຜນງານໃຫ່ຍ ແລະ 26 ໂຄງການຂອງກະຊວງປ້ອງກັນປະເທດ ໄດ້ວາງອອກ. ກອງປະຊຸມຄັ້ງນີ້, ຍັງໄດ້ມອບໃບຢັ້ງຢືນໜ່ວຍພັກແຂງ-ຮູ້ນໍາພາຮອບດ້ານໃຫ້ 6 ບ້ານ ຄື: ບ້ານທ່າແຕງໄຕ້, ບ້ານໜອງບົວໃສ່, ບ້ານປົ່ງໃໝ່, ບ້ານປະແຫຼ່ງໄຕ້, ບ້ານປະແຫຼ່ງ ເໜືອ ແລະ ບ້ານໂກງຕາຢູນ ໃຫ້ກຽດກ່າວມອບຂອງທ່ານ ພັນໂທ ແສງມະນີ ດາລາສິນ ຄະນະປະຈໍາພັກເມືອງ, ຫົວໜ້າກອງບັນຊາການທະຫານເມືອງທ່າແຕງ ໂດຍມີບັນດາພາກສ່ວນບ້ານ ຮ່ວມເປັນສັກຂີພີຍານ. ດ້ວຍຄວາມປີຕີຍິນດີ.
ທີມຂ່າວ ເມືອງທ່າແຕງ, ແຂວງເຊກອງ
Editor: ກຳປານາດ ລັດຖະເຮົ້າ
