ກຸ່ມບ້ານໂພນໄຊ ເມືອງຊໍາໃຕ້ ໄດ້ຈັດໃຫ້ມີກອງປະຊຸມພົບປະແລກປ່ຽນວຽກງານແນວລາວສ້າງຊາດ ລະຫວ່າງ ແນວລາວສ້າງຊາດ ກຸ່ມບ້ານໂພນໄຊ ເມືອງຊຳໃຕ້ ແຂວງຫົວພັນ ສປປ ລາວ ກັບ ຕະແສງ ມອດ ເມືອງເທືອງຊວນ ແລະ ຕະແສງ ອຽນເຄືອງ ເມືອງລ້າງແຈ້ງ ແຂວງແທັງຮວ່າ ສສ ຫວຽດນາມ ຂື້ນຢູ່ທີ່ບ້ານ-ບ້ານຫາງ ເມື່ອບໍ່ດົນຜ່ານມານີ້, ເຊີ່ງຝ່າຍເມືອງຊໍາໃຕ້ນໍາໂດຍ ທ່ານນາງ. ແສງເພັດ ລືອິນຄໍາ ຄະນະປະຈໍາພັກເມືອງ ປະທານແນວລາວສ້າງຊາດເມືອງຊໍາໄຕ້, ຝ່າຍເມືອງເທືອງຊວນ ນຳໂດຍ ທ່ານ ລາງແທັງຢວນ ແລະ ເມືອງລ້າງແຈ້ງ ນໍາໂດຍ ທ່ານ ກາວບ້າເຈົາ ຮອງປະທານແນວໂຮມ, ມີພະນັກງານວິຊາການຫ້ອງການທີ່ກ່ຽວຂ້ອງ, ເລຂາ, ຄະນະພັກກຸ່ມບ້ານ, ນາຍບ້ານ ແລະ ປະຊາຊົນທັງ 3 ເມືອງ ເຂົ້າຮ່ວມທັງໝົດ 60 ຄົນ
ໃນກອງປະຊຸມໄດ້ຜ່ານເນື້ອໃນຂໍ້ແຂ່ງຂັນ ແລະ ບົດບັນທຶກຮັບຮອງເອົາເນື້ອໃນບົດສະຫຼຸບຂໍ້ແຂ່ງຂັນເສີມສ້າງຄວາມສາມັກຄີມິດຕະພາບ ລະຫວ່າງກຸ່ມບ້ານ, ຕາແສງ ແລະ ບັນດາບ້ານທີ່ມີຊາຍແດນຕິດຈອດກັນ, ໃນນີ້ແຕ່ລະຝ່າຍໄດ້ຍົກໃຫ້ເຫັນທັງດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້ໃນຊຸມປີທີ່ຜ່ານມາ, ຮັບຮອງເອົາຂໍ້ແຂ່ງຂັນເສີມສ້າງຄວາມສາມັກຄີມິດຕະພາບ ບ້ານທີ່ມີຊາຍແດນຕິດຈອດ ລາວ-ຫວຽດນາມ, ຕົກລົງນັດໝາຍເປີດກອງປະຊຸມສະຫຼຸບເນື້ອໃນ 5 ຂໍ້ແຂ່ງຂັນ ປີ 2018 ກຸ່ມບ້ານໂພນໄຊເປັນເຈົ້າພາບ, ປີ 2021 ແນວໂຮມແຫ່ງຊາດ ຕາແສງອຽນເຄືອງ ເປັນເຈົ້າພາບ, ໃນປີ 2024 ແນວໂຮມແຫ່ງຊາດຕາແສງ ມອດ ເມືອງເທືອງຊວນ ເປັນເຈົ້າພາບ ເພື່ອສືບຕໍ່ຮ່ວມມືນຳກັນຕະຫຼອດໄປ.
ໃນກອງປະຊຸມ ທ່ານນາງ. ແສງເພັດ ລືອິນຄໍາ ຄະນະປະຈໍາພັກເມືອງ ປະທານແນວລາວສ້າງຊາດເມືອງຊໍາໄຕ້ ຍັງໄດ້ເນັ້ນຢໍ້າຕື່ມໃຫ້ກຸ່ມບ້ານ, ຕາແສງ ແລະ ບັນດາບ້ານທີ່ມີຊາຍແດນຕິດຈອດ ພ້ອມກັນເຜີຍແຜ່ມູນເຊື້ອສາມັກຄີປອງດອງ, ພົບປະແລກປຽ່ນບົດຮຽນສອງກໍ້າສອງຝ່າຍ, ໄປມາຫາສູ່ ຢຽ້ມຢາມກັນ ໃນເວລາທີ່ມີການຈັດງານບຸນປະເພນີ ຫຼື ບຸນປະຈໍາປີ ທັງນີ້ກໍເພື່ອຮັກສາມູນເຊື້ອສາມັກຄີຮັກແພງ ລະຫວ່າງ ປະຊາຊົນສອງຊາດ ລາວ-ຫວຽດນາມ ໃຫ້ນັກແໜ້ນສືບໄປໃນອະນາຄົດ ຫຼັງຈາກນັ້ນ ໃນກອງປະຊຸມຍັງໄດ້ຈັດໃຫ້ມີການມອບຂອງຂວັນ ລະຫວ່າງ ກຸ່ມບ້ານໂພນໄຊ ແລະ ບັນດາທ່ານຕາງໜ້າແນວໂຮມແຫ່ງຊາດ ສສ ຫວຽດນາມ. ກອງປະຊຸມໄດ້ດໍາເນີນໄປເປັນເວລາໜຶ່ງຕອນ ແລະ ໄດ້ປິດລົງຢ່າງຈົບງາມ
Editor: ກຳປານາດ ລັດຖະເຮົ້າ
