ໃນວັນທີ 03 ເມສາ 2018 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ສືບຕໍ່ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງສາລະວັນ ເຊິ່ງມີ ທ່ານ ສີສຸວັນ ວົງຈອມສີ ເຈົ້າແຂວງໆສາລະວັນ ພ້ອມດ້ວຍບັນດາຮອງເຈົ້າແຂວງ, ຄະນະພັກ-ຄະນະນຳແຂວງ, ພະແນກການ ແລະ ຫ້ອງການອ້ອມຂ້າງ ໃຫ້ການຕ້ອນຮັບຢ່າງອົບອຸ່ນ.
ການເຄື່ອນໄຫວຢ້ຽມຢາມຄັ້ງນີ້, ທ່ານ ບົວທອງ ຄຸນຍອດປັນຍາ ຮອງເຈົ້າແຂວງໆສາລະວັນ ໄດ້ລາຍງານໃຫ້ຊາບ ກ່ຽວກັບການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ 10 ຂອງພັກ ຕິດພັນກັບມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 5 ສະໄໝທີ 10 ມະຕິ 13 ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມຂອງແຂວງ ໃນໄລຍະ 1 ປີທີ່ຜ່ານມາ
ພ້ອມນີ້, ທ່ານ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ຍັງໄດ້ເນັ້ນໃຫ້ເອົາໃຈໃສ່ບາງບັນຫາ ຄື: ການສຸມໃສ່ຈັດຕັ້ງປະຕິບັດຄາດໝາຍສູ້ຊົນແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ່ 13 ໃນໄລຍະ 2 ປີກວ່າທີ່ຍັງເຫຼືອ ໃຫ້ປະກົດຜົນເປັນຈິງ, ເອົາໃຈໃສ່ຄຸ້ມຄອງນຳໃຊ້ລະບົບອິນເຕີເນັດ ໃຫ້ເກີດປະໂຫຍດສູງສຸດ ໂດຍສະເພາະ ນຳໃຊ້ເຂົ້າໃນການເກັບລາຍຮັບ, ການຄ້າ, ການບໍລິການ ແລະ ການລົງທຶນ; ເອົາໃຈໃສ່ເກັບກຳຂໍ້ມູນ ແລະ ຄຸ້ມຄອງທີ່ດິນ ເພື່ອເປັນຖານຂໍ້ມູນໃຫ້ແກ່ການພັດທະນາໃນຕໍ່ໜ້າ, ທ່ານ ຮອງນາຍົກລັດຖະມົນຕີ ພ້ອມຄະນະ ຍັງໄດ້ໄປຢ້ຽມຊົມແຫຼ່ງທ່ອງທ່ຽວແບບອະນຸລັກ ຖ້ຳພູຜາສຸກ ເຊິ່ງເປັນແຫຼ່ງທ່ອງທ່ຽວທີ່ຫາກໍ່ໄດ້ມີການຄົ້ນພົບ, ບຸກເບີກ ແລະ ປັບປຸງຂຶ້ນມາໃໝ່ ຫ່າງຈາກເທດສະບານແຂວງ ປະມານ 30 ກິໂລແມັດ ຊຶ່ງທາງແຂວງໄດ້ເນັ້ນໃຫ້ປົກປັກຮັກສາສິ່ງແວດລ້ອມ ໄວ້ໃຫ້ຫຼາຍທີ່ສຸດ ເພື່ອໃຫ້ກາຍເປັນແຫຼ່ງທ່ອງທ່ຽວທຳມະຊາດແບບອະນຸລັກ ແລະ ມີຄວາມຍືນຍົງ.
Editor: ກຳປານາດ ລັດຖະເຮົ້າ
