ຕົ້ນເດືອນເມສາ 2018 ຢູ່ທີ່ຫ້ອງຮັບຮອງ ແຂວງບໍລິຄໍາໄຊ, ທ່ານ ກອງແກ້ວ ໄຊສົງຄາມ ເຈົ້າແຂວງ ບໍລິຄຳໄຊ ພ້ອມດ້ວຍຄະນະປະຈໍາພັກແຂວງ ໄດ້ເປັນກຽດຕ້ອນຮັບ ທ່ານ ເຈິນ ກົງ ຖິງ ຫົວໜ້າກົງສູນໃຫຍ່ ສສ ຫວຽດນາມ ປະຈຳພາກກາງ ແຂວງສະຫັວນນະເຂດ ພ້ອມຄະນະຢ່າງອົບອຸ່ນສະໜິດສະໜົມ ເນື່ອງໃນໂອກາດທີ່ທ່ານມາພົບປະ, ອວຍພອນການນໍາຂັ້ນສູງຂອງແຂວງ ບໍລິຄໍາໄຊ ໃນບຸນປີໃໝ່ລາວ 2561 ທີ່ຈະມາເຖິງນີ້.
ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ຕາງໜ້າການນໍາຂັ້ນແຂວງ ໄດ້ສະແດງຄວາມຮູ້ສຶກ, ຕ້ອນຮັບຢ່າງອົບອູ່ນ, ຈິງໃຈ ໃນການມາອວຍພອນຂອງ ທ່ານ ເຈິນກົງຖີງ ພ້ອມທັງລາຍງານສະພາບການເຕີບໃຫຍ່ ຂະຫຍາຍຕົວທາງດ້ານເສດຖະກິດ-ສັງຄົມ ຂອງແຂວງບໍລິຄໍາໄຊ ໂດຍພາຍໃຕ້ການຊີ້ນຳ-ນຳພາຂອງອົງຄະນະພັກແຂວງຕະຫຼອດໄລຍະຜ່ານມາ, ເຫັນວ່າເສດຖະກິດມີການຂະຫຍາຍຕົວຢ່າງຕໍ່ເນື່ອງ, ສັງຄົມມີຄວາມສະຫງົບໂດຍພື້ນຖານ, ຊີວິດການເປັນຢູ່ຂອງພະນັກງານ-ລັດຖະກອນ ຕະຫຼອດຮອດ ຊີວິດການເປັນເປັນຢູ່ຂອງປະຊາຊົນບັນດາເຜົ່າ ໄດ້ຮັບການບູລະນະ. ການເຂົ້າອວຍພອນໃນຄັ້ງນີ້ ແມ່ນສະແດງເຖິງ ໄມຕີຈິດມິດຕະພາບອັນດູດດື່ມ ສະໜິດ ສະໜົມ, ຄວາມຮັກແພງສາມັກຄີແບບພິເສດ ລະຫວ່າງ ສອງຊາດລາວ-ຫວຽດນາມ, ຫວຽດນາມ-ລາວ, ເວົ້າລວມເວົ້າສະເພາະ ກໍ່ຄືແຂວງ ບໍລິຄໍາໄຊ ກັບ ກົງສູນໃຫຍ່ ສສ ຫວຽດນາມ ປະຈໍາພາກກາງ, ຍັງເປັນການເພີ່ມພູນຄູນສ້າງສາຍພົວພັນແບບພິເສດ ອັນທີ່ເປັນມູນເຊື້ອມາແຕ່ບູຮານນາການ,ຊຶ່ງຍາມໃດກໍ່ໄດ້ມີການອູ້ມຊູຊ່ວຍເຫຼືອເຊິ່ງກັນ ແລະ ກັນ ຕະຫຼອດມາ
ທີມຂ່າວ ແຂວງບໍລິຄໍາໄຊ
Editor: ກຳປານາດ ລັດຖະເຮົ້າ
