ວັນທີ 4 ເມສາ 2018 ຜ່ານມາ ຢູ່ທີ່ນະຄອນຫຼວງວຽງຈັນ ໄດ້ມີພິທີເຊັນສັນຍາ ສໍາປະທານໂຄງການກໍ່ສ້າງທາງດ່ວນ ນະຄອນຫຼວງວຽງຈັນ-ວັງວຽງ ລະຫວ່າງ ລາວ ແລະ ຈີນ. ລົງນາມໃນສັນສັນຍາດັ່ງກ່າວ ຝ່າຍລາວແມ່ນ ທ່ານ ສຸພັນ ແກ້ວມີໄຊ ລັດຖະມົນຕີ ກະຊວງແຜນການ ແລະ ການລົງທຶນ, ສ່ວນຝ່າຍຈີນແມ່ນ ທ່ານ ເສິນ ເຫວິນຊານ ປະທານກຸ່ມບໍລິສັດກໍ່ສ້າງ-ລົງທຶນ ແລະ ຖືຫຸ້ນຈຳກັດ ແຂວງຢຸນໜານ.

ໂດຍເປັນກຽດເຂົ້າຮ່ວມຂອງ ທ່ານ ປອ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ, ປະທານຄະນະກໍາມາທິການຮ່ວມມືລາວ-ຈີນ, ທ່ານ ປອ ບຸນຈັນ ສິນທະວົງ ລັດຖະມົນຕີ ກະຊວງໂຍທາທິການ ແລະ ຂົນສົ່ງ, ທ່ານ ຫວາງ ສີຫຸຍ ທີ່ປຶກສາເສດຖະກິດ-ການຄ້າ ເອກອັກຄະລັດຖະທູດ ສປ ຈີນ ປະຈຳ ສປປ ລາວ, ພ້ອມດ້ວຍແຂກທີ່ຖືກເຊີນ ແລະ ພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ.

ທ່ານ ສຸພັນ ແກ້ວມີໄຊ ລັດຖະມົນຕີ ກະຊວງແຜນການ ແລະ ການລົງທຶນ ກ່າວວ່າ: ເສັ້ນທາງດ່ວນນະຄອນຫຼວງວຽງຈັນ-ບໍ່ເຕັນ ເປັນເສັ້ນທາງທຳອິດຂອງ ສປປ ລາວ ເຊິ່ງມີຄວາມຍາວປະມານ 460 ກີໂລແມັດ ແລະ ມີມູນຄ່າການກໍ່ສ້າງເຖິງ 7.5 ຕື້ ໂດລາສະຫາລັດ, ໂດຍລັດຖະບານລາວ ຖືຫຸ້ນ 5% (ຫຸ້ນບູລິມະສິດ) ແລະ ບໍລິສັດກໍ່ສ້າງ-ລົງທຶນ ແຂວງຢຸນໜານ ຖືຫຸ້ນ 95%. ການກໍ່ສ້າງເສັ້ນທາງດ່ວນດັ່ງກ່າວ ຈະໄດ້ແບ່ງອອກເປັນ 4 ຊ່ວງ ຄື: ແຕ່ນະຄອນຫຼວງວຽງຈັນ - ວັງວຽງ; ວັງວຽງ-ຫຼວງພະບາງ; ຫຼວງພະບາງ-ອຸດົມໄຊ ແລະ ອຸດົມໄຊ-ຊາຍແດນບໍ່ເຕັນ ຂອງລາວ. ສຳລັບຊ່ວງທາງ ທີ່ຈະໄດ້ລົງມືປະຕິບັດກ່ອນ ແມ່ນຊ່ວງແຕ່ນະຄອນຫຼວງວຽງຈັນ-ວັງວຽງ ເຊິ່ງມີຄວາມຍາວ 109.1 ກີໂລແມັດ, ມູນຄ່າການລົງທຶນທັງໝົດ ປະມານ 1.3 ຕື້ໂດລາສະຫະລັດ. ການອອກແບບທາງດ່ວນ ແມ່ນເປັນທາງຄູ່ຂະໜານ ໄປ-ກັບ ເຊິ່ງແຕ່ລະເບື້ອງມີ 2 ເລນ. ຕາມແຜນແມ່ນຈະສ້າງໃຫ້ສຳເລັດພາຍໃນ 3 ປີ 

ພາຍຫຼັງສ້າງສຳເລັດແລ້ວ ການເດີນທາງແຕ່ນະຄອນຫຼວງວຽງຈັນ ຫາ ວັງວຽງ ຈະໃຊ້ເວລາພຽງແຕ່ 1.5 ຊົ່ວໂມງເທົ່ານັ້ນ, ເຊິ່ງສາມາດຫຼຸດເວລາເດີນທາງໄດ້ 2.5 ຊົ່ວໂມງ ຫາກທຽບກັບເວລາໄປກັບເສັ້ນທາງໃນປັດຈຸບັນ. ການກໍ່ສ້າງໂຄງການດັ່ງກ່າວ ແມ່ນມີຄວາມໝາຍສຳຄັນຢ່າງຍິ່ງ ຕໍ່ການປັບປຸງຊີວິດການເປັນຢູ່ຂອງປະຊາຊົນທີ່ຢູ່ລຽບຕາມແລວທາງດັ່ງກ່າວ, ທັງເປັນການເພີ່ມທະວີການຮ່ວມມື-ແລກປ່ຽນດ້ານເສດຖະກິດ-ການຄ້າ ແລະ ວັດທະນະທຳຂອງສອງຊາດລາວ-ຈີນ ໃຫ້ແໜ້ນແຟ້ນເລິກເຊິ່ງກວ່າເກົ່າ.

ໃນໂອກາດດ່ັງກ່າວ ທ່ານ ເສິນ ເຫວີຍຊານ ກໍ່ໄດ້ກ່າວວ່າ: ການເຊັນສັນຍາສໍາປະທານໃນຄັ້ງນີ້ ບໍລິສັດໄດ້ຕັ້ງເປົ້າໝາຍ ທີ່ຈະສ້າງທາງດ່ວນນະຄອນຫຼວງວຽງຈັນ-ວັງວຽງເສັ້ນນີ້ ໃຫ້ກາຍເປັນເສັ້ນທາງແຫ່ງມິດຕະພາບລາວ-ຈີນ, ເປັນເສັ້ນທາງສີຂຽວ, ເສັ້ນທາງແຫ່ງຄວາມຜາສຸກ ນຳເອົາຄວາມສຸກ ແລະ ຮັ່ງມີມາສູ່ປະຊາຊົນ ຂອງຊາດລາວ-ຈີນ, ເພື່ອເປັນການໃຫ້ບໍລິການ ແລະ ສອດຄ່ອງຢ່າງກົມກືນກັບການກໍ່ສ້າງ “ ໜຶ່ງແລວ-ໜຶ່ງເສັ້ນທາງ ” ຢ່າງຮອບດ້ານ, ເປັນການປະກອບສ່ວນຢ່າງຕັ້ງໜ້າເຂົ້າໃນການຂຽນໜ້າປະຫວັດສາດອັນໃໝ່ ແຫ່ງການຮ່ວມມືມິດຕະພາບຂອງສອງຊາດ ຈີນ-ລາວ.

Editor: ກຳປານາດ ລັດຖະເຮົ້າ