ພີ່ນ້ອງຮ່ວມຊາດ ແລະ ຄົນເຊື້ອຊາດລາວ ທຸກທ່ານ ທີ່ຮັກແພງທັງຫລາຍ.
ໃນບັນຍາກາດອັນຄຶກຄື້ນ ແຫ່ງ ການສົ່ງທ້າຍປີເກົ່າ ປີລະກາ ພສ 2560 ແລະ ຕ້ອນຮັບປີ ໃໝ່ ປີຈໍ ພສ 2561, ເຊິ່ງເປັນປາງບຸນໜຶ່ງ ໃນຮີດ 12 ທີ່ໄດ້ປະຕິບັດສືບທອດມາ ຢ່າງຍາວນານ ຈາກບັນ ພະບຸລຸດ ຂອງພວກເຮົາ, ຂໍຖືໂອກາດ ອັນເປັນສິລິມົງຄຸນຍິ່ງນີ້ ສົ່ງຄໍາອວຍພອນອັນປະເສີດ ໄປຍັງພີ່ ນ້ອງຮ່ວມຊາດ ແລະ ຄົນເຊື້ອຊາດລາວ ທັງພາຍໃນ ແລະ ຢູ່ຕ່າງປະເທດ, ພ້ອມທັງຊາວຕ່າງປະເທດ ທີ່ ດໍາລົງຊີວິດ, ປະຕິບັດໜ້າທີ່ ແລະ ທໍາມາຫາກິນ ຢູ່ ສປປ ລາວ; ຂໍໃຫ້ທຸກໆທ່ານ ຈົ່ງມີສຸກຂະພາບ, ພະລານາໄມສົມບູນ, ສຸກກາຍ, ສຸກໃຈ, ຮ່ວມສະຫລອງປີໃໝ່ ຕາມປະເພນີລາວ ຢ່າງເບີກບານມ່ວນຊື່ນ ແລະ ມີຜົນສໍາເລັດ ໃນການປະຕິບັດໜ້າທີ່ ຂອງຕົນຕະຫລອດປີໃໝ່ນີ້ ດ້ວຍເຖີ້ນ.
ໃນປີເກົ່າ ພສ 2560 ທີ່ພວມກ້າວລວ່ງໄປ ເປັນປີເປັນແຫ່ງ ຄວາມພະຍາຍາມບຸກບືນ ຂອງທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ ໃນການຈັດຕັ້ງປະຕິບັດ ມະຕິກອງປະຊຸມໃຫ່ຍຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງລັດ ຄັ້ງທີ 8 ຢ່າງເປັນຂະບວນ ອັນຟົດຟື້ນ, ສາມາດສ້າງຜົນງານ ອັນໃຫຍ່ຫລວງຫລາຍດ້ານ, ປະຊາຊົນເຮົາມີຄວາມສາມັກຄີ ປອງດອງເປັນປຶກແຜ່ນ, ປະເທດຊາດຂອງພວກເຮົາ ສືບຕໍ່ມີສະຖຽນລະພາບ ທາງດ້ານການເມືອງອັນໜັກແໜ້ນ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ ໂດຍພື້ນຖານ, ປະຊາຊົນເຮົາໄດ້ເຊີດຊູນໍ້າໃຈຮັກຊາດ ແລະ ເສີມຂະຫຍາຍມູນເຊື້ອດຸໝັ່ນ ອອກແຮງງານທໍາມາຫາກິນ, ປັບປຸງຊີວິດການເປັນຢູ່ ໃຫ້ດີຂຶ້ນ, ເກີດມີຄອບຄົວຕົວແບບ ພົ້ນທຸກນັບມື້ນັບຫລາຍ. ພ້ອມກັນນັ້ນ, ດ້ວຍຄວາມພະຍາຍາມອັນຕັ້ງໜ້າ ຂອງທຸກພາກສ່ວນ ໄດ້ສ້າງເງື່ອນໄຂ ແລະ ສະພາບແວດລ້ອມເອື້ອອໍານວຍ ເພື່ອດຶງດູດການລົງທຶນ, ເຮັດໃຫ້ອັດຕາການລົງທຶນ ທັງພາຍໃນ ແລະ ຕ່າງປະເທດເພີ່ມຂຶ້ນ ຢ່າງຕໍ່ເນື່ອງ, ຈັງຫວະການຂະຫຍາຍຕົວ ຂອງເສດຖະກິດໃນປີ ພສ 2560 ບັນລຸ 6,83%, ລວມຍອດຜະລິດຕະພັນພາຍໃນ ສະເລ່ຍຕໍ່ຫົວຄົນໄດ້ 2.472 ໂດລາສະຫະລັດ; ຂົງເຂດການສຶກສາ, ວັດທະນະທໍາ-ສັງຄົມ ກໍໄດ້ຮັບການເອົາໃຈໃສ່; ຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນ ກໍໄດ້ຮັບການປັບປຸງແກ້ໄຂ ໃຫ້ດີຂຶ້ນຢ່າງບໍ່ຢຸດຢັ້ງ; ການພົວພັນຮ່ວມມື ລະຫວ່າງ ປະເທດເຮົາ ກັບບັນດາປະເທດ ເພື່ອນມິດ ແລະ ອົງການຈັດຕັ້ງສາ ກົນ ສືບຕໍ່ໄດ້ຮັບການເສີມຂະຫຍາຍ ຢ່າງມີປະສິດທິຜົນ. ໃນນັ້ນ, ສປປ ລາວ ພວກເຮົາໄດ້ຮ່ວມກັບບັນ ດາປະເທດສະມາຊິກອາຊຽນ ສະເຫລີມສະຫລອງຄົບຮອບ 50 ປີ ແຫ່ງການສ້າງຕັ້ງ ສະມາຄົມ ບັນດາປະຊາຊາດອາຊີ ຕາເວັນອອກສ່ຽງໃຕ້ ຫລື ອາຊຽນ ແລະ ຄົບຮອບ 20 ປີທີ່ ສປປ ລາວ ເຂົ້າເປັນສະ ມາຊິກອາຊຽນ. ເຫດການທີ່ພົ້ນເດັ່ນ ໃນປີນີ້ແມ່ນ ລັດຖະບານລາວ ເຮົາໄດ້ຈັດປີທ່ອງທ່ຽວລາວ ປີ 2018 ຂຶ້ນໃນຂອບເຂດທົ່ວປະເທດ ເພື່ອເປັນການໂຄສະນາດຶງດູດ ນັກທ່ອງທ່ຽວທັງພາຍໃນ ແລະ ຕ່າງປະເທດ ໄດ້ເຂົ້າມາສໍາພັດຕົວຈິງ ກັບແຫລ່ງທ່ອງທ່ຽວ ປະຫວັດສາດ, ທິວທັດທໍາມະຊາດ ແລະ ຮີດ ຄອງປະເພນີ -ວັດທະນະທໍາ ອັນດີງາມຂອງຊາດລາວເຮົາ ໃຫ້ຫລາຍຂຶ້ນກວ່າເກົ່າ ເພື່ອເປັນການກະຕຸ້ນ ການພັດທະນາເສດຖະກິດ-ສັງຄົມຕື່ມອີກ.
ນະໂອກາດນີ້, ທ່ານ ຂໍຕາງໜ້າ ການນໍາພັກ-ລັດ ສະແດງຄວາມຊົມເຊີຍ ສັນລະເສີນຄວາມຂອບໃຈຢ່າງຈິງໃຈ ມາຍັງສະມາຊິກພັກ, ພະນັກງານ, ທະຫານ, ຕໍາຫລວດ ແລະ ພີ່ນ້ອງຮ່ວມຊາດທຸກເຜົ່າ-ທຸກຊັ້ນຄົນ ໃນຂອບເຂດທົ່ວປະເທດ, ພີ່ນ້ອງເຊື້ອຊາດລາວ ທີ່ຢູ່ຕ່າງປະເທດ ທີ່ໄດ້ປະກອບສ່ວນ ເຂົ້າໃນພາ ລະກິດລວມຂອງຊາດ ດ້ວຍຄວາມເປັນເຈົ້າການ ຫ້າວຫັນຕະຫລອດປີຜ່ານມາ.
ພີ່ນ້ອງຮ່ວມຊາດ ແລະ ເຊື້ອຊາດລາວ ທີ່ຮັກແພງທັງຫລາຍ
ປີຈໍ ພສ 2561 ທີ່ພວມກ້າວເຂົ້າມາ ເປັນປີທີ່ມີຄວາມສໍາຄັນສໍາລັບ ສປປ ລາວ ເຮົາເຊິ່ງເປັນປີທີສາມ ແຫ່ງການຈັດຕັ້ງ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງລັດ 5 ປີ ຄັ້ງທີ 8; ເຊິ່ງພວກເຮົາ ຈະໄດ້ພ້ອມກັນສຸມໃສ່ການແກ້ໄຂຄວາມທຸກຍາກ ຂອງປະຊາຊົນ ແລະ ຈັດຕັ້ງ ປະຕິບັດເປົ້າໝາຍ “ສູ້ຊົນພັດທະນາ ປະເທດເຮົາ ໃຫ້ຫລຸດພົ້ນອອກຈາກສະຖານະພາບຄວາມດ້ອຍພັດທະນາ ໃນປີ 2020 ກ້າວໄປສູ່ປະເທດກໍາລັງພັດທະນາ ທີ່ມີລາຍຮັບປານກາງສູງ ຕາມທິດພັດທະນາສີຂຽວ ແລະ ຍືນຍົງ ເມື່ອເຖິງປີ 2030”.
ທ່ານ ຈຶ່ງຂໍຖືໂອກາດນີ້ ຮຽກຮ້ອງພີ່ນ້ອງຮ່ວມຊາດ ສາມາຊິກພັກ, ພະນັກງານ, ທະຫານ, ຕໍາຫລວດ ຈົ່ງພ້ອມກັນເພີ່ມທະວີ ຮັກສາມູນເຊື້ອຄວາມສາມັກຄີ ອັນເປັນປືກແຜ່ນແໜ້ນໜາ, ຜ່ານຜ່າ ຄວາມຫຍຸ້ງຍາກ ແລະ ສິ່ງທ້າທາຍທົດສອບ, ສືບຕໍ່ເສີມຂະຫຍາຍຜົນສໍາເລັດ ອັນດີງາມ ແລະ ຕັ້ງໜ້າແກ້ໄຂຈຸດອ່ອນ ຂໍ້ຄົງຄ້າງໃນປີທີ່ຜ່ານມາ ໃຫ້ຫລຸດໜ້ອຍຖອຍລົງ; ພີ່ນ້ອງເຊື້ອຊາດລາວ ຢູ່ຕ່າງປະເທດ ຈົ່ງອ່ວຍໜ້າກັບມາຫາ ປະເທດຊາດບ້ານເກີດ ຂອງເຊື້ອເຜົ່າພົງພັນ ພວກເຮົາຮ່ວມກັບປະຊາຊົນໃນຊາດ, ເພື່ອຮ່ວມກັນ ເຮັດໃຫ້ປະເທດຊາດ ທີ່ແສນຮັກຂອງພວກເຮົາ ມັ່ງຄັ່ງເຂັ້ມແຂງ, ປະຊາຊົນ ຮັ່ງມີຜາສຸກ, ສັງຄົມມີຄວາມສາມັກຄີ ປອງດອງ, ມີປະຊາທິປະໄຕ, ຍຸຕິທໍາ ແລະ ສີວິໄລຍິ່ງໆ ຂຶ້ນໄປ.
ຂໍໃຫ້ທຸກທ່ານ ຈົ່ງປະກອບສ່ວນ ເຮັດໃຫ້ ປີຈໍ ພສ 2561 ເປັນປີແຫ່ງຄວາມສາມັກຄີ ອັນຍິ່ງໃຫຍ່, ເປັນປີແຫ່ງການ ເຊີດຊູມານະຈິດ ແລະ ການອຸທິດຕົນ ເພື່ອຄວາມຢູ່ດີກິນດີ ຂອງປະຊາຊົນ ແລະ ຄວາມມັ່ງຄັ່ງເຂັ້ມແຂງ ຂອງປະເທດຊາດ. ໃນປີຈໍ ພສ 2561 ນີ້, ຂໍໃຫ້ທຸກໆທ່ານ ຈົ່ງມີໂຊກໃໝ່ໄຊງາມ, ໃຫ້ເປັນປີ ແຫ່ງຄວາມສຸກ-ຄວາມສົມຫວັງ ທຸກປະການເຖີ້ນ.

Editor: ສຳນັກຂ່າວສານປະເທດລາວ