ໃນທ້າຍອາທິດທ່ຜ່ານ ກອງບັນຊາການ ປກສ ແຂວງບໍ່ແກ້ວ ໄດ້ເປີດກອງປະຊຸມບັ້ນດໍາເນີນຊີວິດການເມືອງ ຂອງອົງຄະນະພັກກອງບັນຊາການ ປກສ ແຂວງບໍ່ແກ້ວ ປະຈໍາປີ 2018 ຂຶ້ນ ຢູ່ທີ່ຫ້ອງປະຊຸມກອງບັນຊາການ ປກສ ແຂວງບໍ່ແກ້ວ, ໂດຍການເປັນປະທານຂອງ ສະຫາຍ ປອ ຄໍາພັນ ເຜີຍຍະວົງ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໆບໍ່ແກ້ວ, ມີ ສະຫາຍ ພັນເອກ ປອ ຖາວອນ ອິນທະວົງ ເລຂາຄະນະພັກ ຫົວໜ້າກອງບັນຊາການ ປກສ ແຂວງບໍ່ແກ້ວ, ມີຄະນະພັກ-ຄະນະບັນຊາ, ຄະນະຈັດຕັ້ງແຂວງ, ຄະນະກວດກາພັກ-ລັດແຂວງ, ເລຂາໜ່ວຍພັກຮາກຖານ, ໜ່ວຍພັກອ້ອມຂ້າງກອງບັນຊາການ ຕະຫຼອດຮອດສະມາຊິກພັກສົມບູນ-ສໍາຮອງ ເຂົ້າຮ່ວມ.
ການເປີດກອງປະຊຸມບັ້ນດໍາເນີນຊີວິດການເມືອງ ຂອງອົງຄະນະພັກກອງບັນຊາການ ປກສ ແຂວງບໍ່ແກ້ວໃນຄັ້ງນີ້ແມ່ນໄດ້ຮັບຟັງການເຜີຍແຜ່ເອກະສານ ມະຕິຕົກລົງ ຂອງຄະນະປະຈໍາພັກແຂວງ ເລກທີ 847/ຂບກ, ເອກະສານບົດແນະນໍາຂອງຄະນະປະຈໍາພັກແຂວງ ເລກທີ 812 ແລະ ເອກະສານ ເຊື່ອມຊຶມເລກທີ 01/ກມສພ ວ່າດ້ວຍການກໍ່ສ້າງໜ່ວຍພັກໃຫ້ປອດໃສ, ເຂັ້ມແຂງ, ໜັກແໜ້ນ.
ຄະນະພັກຂອງພວກເຮົາໄດ້ເອົາໃຈໃສ່ໃນການເພີ້ມທະວີການນໍາພາໂດຍກົງ, ເດັດຂາດ ແລະ ຮອບດ້ານຕໍ່ການເຄື່ອນໄຫວ ແລະ ປັບປຸງ-ກໍ່ສ້າງກໍາລັງ ປກສ ແຕ່ລະຂັ້ນໃນການສຶກສາອົບຮົບການເມືອງ-ແນວຄິດໃນຖັນແຖວພະນັກງານ-ນັກຮົບ ໄດ້ເອົາໃຈໃສ່ປະຕິບັດຕາມ 5 ຫຼັກການ 3 ທິດນໍາໃນການກໍ່ສ້າງພັກ; ການເປີດບັ້ນຊີວິດການເມືອງໃນຄັ້ງນີ້ກໍ່ເພື່ອປັບປຸງກໍ່ສ້າງພັກໃຫ້ໜັກແໜ້ນທາງດ້ານການເມືອງ-ແນວຄິດ, ເຂັ້ມແຂງດ້ານການຈັດຕັ້ງ, ປະຕິບັດຫຼັກການລວມສູນປະຊາທິປະໄຕ, ເສີມຂະຫຍາຍປະຊາທິປະໄຕ ໄປພ້ອມກັບການເພີ້ມທະວີປະຕິບັດລະບຽບວິໄນພາຍໃນພັກຢ່າງເຂັ້ມງວດ, ປັບປຸງລະບອບດໍາເນີນຊີວິດພັກ, ມີແບບແຜນວິທີນໍາພາ ແບບຢ່າງນໍາໜ້າຂອງສະມາຊິກພັກ.
Editor: ປກສ ແຂວງບໍແກ້ວ
