ໃນຕອນເຊົ້າວັນທີ 10 ເມສາ 2018 ຜ່ານມານີ້, ຢູ່ທີ່ສະໂມສອນ ຂອງເມືອງວັງວຽງ ແຂວງວຽງຈັນ, ໄດ້ມີພິທີປາຖະກາຖາລະນຶກວັນສ້າງຕັ້ງກຳລັງປ້ອງກັນຄວາມສະຫງົບ ປະຊາຊົນລາວ ຄົບຮອບ 57 ປີ. ໂດຍພາຍໃຕ້ການເປັນປະທານ ຂອງທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງເຈົ້າເມືອງໆວັງວຽງ, ມີບັນດາທ່ານຄະນະພັກ, ອຳນາດການປົກຄອງເມືອງ, ກຳລັງປ້ອງກັນຊາດ-ປ້ອງກັນຄວາມສະຫງົບ, ພະນັກງານອາວຸໂສບຳນານ,ຕາງໜ້າຫ້ອງການ, ກົມກອງ, ພະນັກງານ-ລັດຖະກອນເຂົ້າຮ່ວມ.
ໃຫ້ກຽດຂື້ນປາຖະກາຖາລະນຶກເຖິງມູນເຊື້ອວັນສຳຄັນດັ່ງກ່າວ ໂດຍແມ່ນທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງເຈົ້າເມືອງໆວັງວຽງ ເຊິ່ງໄດ້ຍົກໃຫ້ເຫັນການກຳເນີດ ແລະເຕີບໃຫຍ່ຂະຫຍາຍຕົວຂອງກຳລັງປ້ອງກັນຄວາມສະຫງົບປະຊາຊົນຄົບຮອບ 57 ປີ ຄື: ວັນທີ 5 ເມສາ 1961 – 5 ເມສາ 2018 ພາຍໃຕ້ຄັນທຸງປະຕິວັດ ແລະ ການນຳພາຂອງພັກປະຊາຊົນ ປະຕິວັດລາວ ກຳລັງປ້ອງກັນຄວາມສະຫງົບໄດ້ກຳເນີດເກີດຂື້ນມາ ເພື່ອແບກຫາບພາລະກິດປະຕິວັດອັນໃຫຍ່ຫຼວງຂອງຊາດ ໂດຍສະເພາະແມ່ນໄດ້ຄຽງຂ້າງກັບກອງທັບປະຊາຊົນລາວ ໃນການຕໍ່ສູ້ກູ້ຊາດອັນຍືດເຍື້ອຍາວນານ, ລະອິດລະອ້ຽວ, ຂ້ຽວຂາດ, ບໍ່ຍອມຈຳນົນຕໍ່ສັດຕູເດັດຂາດຈົນໄດ້ຮັບໄຊນະນະຫຼາຍໆບັ້ນຮົບ.
ພາຍຫຼັງໄດ້ກຳເນີດເກີດຂື້ນມາແລ້ວ ກຳລັງປ້ອງກັນຄວາມສະຫງົບປະຊາຊົນ ໄດ້ຮີບຮ້ອນປັບປຸງ-ກໍ່ສ້າງຕົນເອງໃຫ້ເຂັ້ມແຂງໃນທຸກໆດ້ານ ໂດຍສືບຕໍ່ມູນເຊື້ອກຳລັງສັນຕິລາດ ກຳລັງປ້ອງກັນຄວາມສະຫງົບໄດ້ປະກອບສ່ວນອັນສຳຄັນເຂົ້າໃນການປະຕິວັດຊາດ ກຳລັງປ້ອງກັນຄວາມສະຫງົບປະຊາຊົນລາວ ແມ່ນກຳລັງປະກອບອາວຸດຂອງພັກ ທີ່ໄດ້ສືບທອດມູນເຊື້ອອັນພິລະອາດຫານບໍ່ຍອມຈຳນົນ, ຍາມໃດກໍ່ເດັດດ່ຽວໜຽວແໜ້ນ ມີຄວາມອາດຫານບໍ່ຫວັ່ນໄຫວ, ບໍ່ຄອນແຄນຕໍ່ຂໍ້ຫຍຸ້ງຍາກນາໆປະການ, ມີໄຫວພິບເພື່ອຕີເອົາຊະນະສັດຕູ ຍິ່ງສູ້ຮົບກໍ່ຍິ່ງເຕີບໃຫ່ຍເຂັ້ມແຂງ, ຍິ່ງສູ້ຮົບກໍ່ຍິ່ງມີໄຊຊະນະເປັນກ້າວໆມາ ສາມາດຕີເອົາຊະນະຈັກກະພັດ ແລະ ປົດປ່ອຍປະເທດຊາດ ໄດ້ຢ່າງສົມບູນໃນປີ 1975 ພ້ອມທັງ ສະຖາປານາປະເທດລາວ ເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ.
ຈາກນັ້ນ ກຳລັງປ້ອງກັນຄວາມສະຫງົບປະຊາຊົນ ຍັງໄດ້ສືບຕໍ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນກ້າວໜ້າ ພ້ອມທັງສ້າງຕັ້ງກະຊວງພາຍໃນ ແລະ ສະຫວັດດີການສັງຄົມ-ສົງເຄາະ ເຖິງປີ 1979 ວຽກງານສະຫວັດດີການສັງຄົມ-ສົງເຄາະໄດ້ແຍກອອກຈາກກະຊວງພາຍໃນ, ໃນເດືອນ ເມສາ 2002 ໄດ້ປ່ຽນຈາກກະຊວງພາຍໃນມາເປັນກະຊວງປ້ອງກັນຄວາມສະຫງົບ ຈົນມາເຖິງປະຈຸບັນນີ້.

Editor:  ເມືອງວັງວຽງ