ທ່ານ ສີມູນ ອຸ່ນລາສີ, ຮອງເລຂາຄະນະພັກ ຮອງປະທານ ສູນກາງສະຫະພັນກໍາມະບານລາວ ໄດ້ຖະແຫຼງຂ່າວຕໍ່ສື່ມວນຊົນ ເມື່ອວັນທີ 23 ເມສາ 2018 ກ່ຽວກັບ ກິດຈະກຳການສະເຫຼີມສະຫຼອງ ວັນກຳມະກອນສາກົນ ຄົບຮອບ 132 ປີ ( 1 ພຶດສະພາ 1886-1 ພຶດສະພາ 2018) ວ່າ: ວັນກຳມະກອນສາກົນວັນທີ 1 ພຶດສະພາ 1886 ແມ່ນມີຄວາມໝາຍສຳຄັນຕໍ່ກຳມະກອນ ແລະ ຊາວຜູ້ອອກແຮງງານໃນທົ່ວໂລກ, ສ່ອງແສງໃຫ້ເຫັນການກຳເນີດເຕີບໃຫຍ່ຂະຫຍາຍຕົວຂອງຊົນຊັ້ນກຳມະກອນ ແລະ ພາລະກຳປະຫວັດສາດຂອງຂະບວນກຳມະກອນສາກົນ, ຈາກ ເຫດການຂອງວັນທີ 1 ພຶດ ສະພາ 1886 ມັນໄດ້ສ້າງກະແສຟອງອັນໃຫຍ່ຫຼວງ ແລະ ແຂງແຮງເຖິງຂະບວນກຳມະກອນຢູ່ທະວີບເອີຣົບ ແລະ ທະວີບອາເມຣິກາເປັນກຳລັງໃຈ ເຮັດໃຫ້ຂະບວນການຕໍ່ສູ້ຂອງ ກຳມະກອນໂລກ ທັງເປັນບາດ ກ້າວຂະຫຍາຍຕົວແຫ່ງໄຊຊະນະ, ເປັນເວທີທີ່ມີຄວາມໝາຍ ອັນສຳຄັນໃຫຍ່ຫຼວງຂອງຊົນ ຊັ້ນກຳມະກອນໃນຂະບວນ ການຕໍ່ສູ້ເພື່ອປົກປ້ອງສິດທິ ແລະ ຜົນປະໂຫຍດອັນຊອບທຳຂອງຕົນ.
ໃນການສະເຫຼີມສະຫຼອງວັນກໍາມະກອນສາກົນ ຄົບຮອບ 132 ປີ ໃນປີນີ້ ສູນກາງສະຫະພັນ ກຳມະບານລາວ ໄດ້ແຈ້ງການ ໃຫ້ສະຫະກຳມະບານກະຊວງ, ອົງການ, ນະຄອນຫຼວງ ແລະ ແຂວງ ໃນທົ່ວປະເທດຈັດຕັ້ງ ການສະເຫຼີມສະຫຼອງດ້ວຍຫຼາຍ ຮູບການເຊັ່ນ: ຈັດປາຖະກະ ຖາເລົ່າຄືນມູນເຊື້ອຂອງວັນ ກຳມະກອນສາກົນ, ຈັດຂະ ບວນການແຂ່ງຂັນກິລາ, ສິລະ ປະວັນນະຄະດີ, ອະນາໄມ ຕາມສຳນັກງານອົງການ, ສະຖານທີ່ເຮັດວຽກ, ຖະໜົນຫົນທາງ ແລະ ອື່ນໆ ຕາມເງື່ອນໄຂ ແລະ ຄວາມສາມາດຕົວຈິງຂອງແຕ່ລະທ້ອງຖິ່ນ ແລະ ຮາກຖານ.
ສຳລັບ ນະຄອນຫຼວງວຽງຈັນ, ອ້ອມຂ້າງສູນກາງ ນອກ ຈາກຈັດພິທີປາຖະກະຖາຢູ່ບັນດາກະຊວງ, ອົງການ ແລະ ຮາກຖານຕ່າງໆແລ້ວ ພວກເຮົາຈະໄດ້ຈັດພິທີສະເຫຼີມສະຫຼອງ ດ້ວຍການຈັດກິດຈະກຳຕ່າງໆ ດັ່ງນີ້: ຈັດກິດຈະກຳຍ່າງເພື່ອສຸຂະພາບ ຢູ່ປະຕູໄຊຫາຫໍຄຳ ຊຶ່ງຈະໄດ້ຈັດຂຶ້ນໃນວັນທີ 1 ພຶດສະພາ 2018, ສ້າງຂະບວນການອອກແຮງງານ ແລະ ອະນາໄມຕາມສຳນັກງານອົງການອ້ອມຂ້າງ ແລະ ສວນສາ ທາລະນະອື່ນໆ, ສ້າງຂະບວນການແຂ່ງຂັນກິລາເປຕັງ ຢູ່ ພາຍໃນສູນກາງສະຫະພັນກຳມະບານລາວ. ດັ່ງນັ້ນ ບັນດາ ສະຫາຍຄະນະບໍລິຫານງານ ສູນກາງສະຫະພັນກຳມະບານ ລາວ, ຄະນະບໍລິຫານງານສະຫະພັນກຳມະບານແຕ່ລະຂັ້ນ ຕະຫຼອດຮອດບັນດາສະຫາຍ ສະມາຊິກກຳມະບານ, ກຳມະ ກອນ ແລະ ຊາວຜູ້ອອກແຮງງານລາວໃນທົ່ວປະເທດ ຈົ່ງພ້ອມກັນເຂົ້າຮ່ວມການສະເຫຼີມສະຫຼອງວັນກຳມະກອນ ສາກົນ ຄົບຮອບ 132 ປີ ຢ່າງເປັນຂະບວນການ ແລະ ເບີກບານມ່ວນຊື່ນ.
Editor: ດາວໄຊ ສີວິໄລ
