ຕອນເຊົ້າວັນທີ 25 ເມສາ 2018 ຜ່ານມາ ແຂວງວຽງຈັນໄດ້ຈັດກອງປະຊຸມເຜີຍແຜ່ ມະຕິຕົກລົງກອງປະຊຸມລັດຖະບານເປີດກວ້າງ ຄັ້ງທີ 1 ປີ 2018 ແລະ ຜົນສຳເລັດບັ້ນດຳເນີນຊີວິດການເມືອງປັບປຸງປົວແປງທົ່ວອົງຄະນະພັກ ປີ 2017–2018 ຂື້ນຢູ່ທີ່ຫ້ອງວ່າການປົກຄອງແຂວງວຽງຈັນ ມີບັນດາສະມາຊິກພັກ, ຂັ້ນແຂວງ, ຂັ້ນເມືອງ ພະແນກການ ແລະ ກົມກອງຕ່າງໆ ເຂົ້າຮ່ວມຮັບຟັງ.
ຈຸດປະສົງ ຂອງການເຜີຍແຜ່ຄັ້ງນີ້ ກໍເພື່ອເຮັດໃຫ້ບັນດາຜູ້ເຂົ້າຮ່ວມ ໄດ້ຮັບຮູ້ ເຂົ້າໃຈຢ່າງເລິກເຊິ່ງຕໍ່ການນໍາພາ ແລະ ການຈັດຕັ້ງປະຕິບັດວຽກງານ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າຂອງລັດຖະບານ ໂດຍສະເພາະແຂວງວຽງຈັນ ເອກະສານທີ່ນໍາມາເຜີຍແຜ່ໃນຄັ້ງນີ້ມີ 2 ສະບັບ ຄື: ມະຕິຕົກລົງຂອງລັດຖະບານເປີດກວ້າງຄັ້ງທີ 1 ປີ 2018 ແລະ ຜົນສຳເລັດບັ້ນດຳເນີນຊີວິດການເມືອງປັບປຸງປົວແປງທົ່ວອົງຄະນະພັກ ປີ 2017–2018. ເຊິ່ງເອກະສານທັງ 2 ສະບັບ ລ້ວນແລ້ວແຕ່ມີຄວາມໝາຍຄວາມສຳຄັນ ເປັນຕົ້ນ ມະຕິຕົກລົງກອງປະຊຸມລັດຖະບານເປີດກວ້າງ ຄັ້ງທີ1 ປີ 2018 ທີ່ໄດ້ຕົກລົງເອົາບາງບັນຫາທີ່ສຳຄັນ ເພື່ອມອບໝາຍໃຫ້ບັນດາກະຊວງ, ອົງການ, ແຂວງ ເພື່ອນໍາໄປຈັດຕັ້ງ, ຜັນຂະຫຍາຍໃຫ້ໄດ້ຮັບຜົນປະໂຫຍດສູງສຸດ ຕາມຂົງເຂດວຽກງານ ທີ່ກະຊວງ ແລະ ແຂວງ ທີ່ໄດ້ຮັບຜິດຊອບ ໂດຍສະເພາະແມ່ນ ຂົງເຂດການພັດທະນາເສດຖະກິດ–ສັງຄົມ. ເອກະສານທີ 2 ແມ່ນຜົນສຳເລັດບັ້ນດຳເນີນຊີວິດການເມືອງປັບປຸງປົວແປງທົ່ວອົງຄະນະພັກ ປີ 2017–2018 ຮອບທີ 2 ພາຍຫຼັງສຳເລັດແລ້ວ ກໍໄດ້ມີການເຜີຍແຜ່ ສູ່ບັນດາຄະນະພັກ, ຄະນະນໍາໃນທຸກອົງການ, ພະແນກການ ແລະ ມີ 4 ຕົວເມືອງທົ່ງພຽງ ແລະ ມີບັນດາພະນັກງານສະມາຊິກພັກໃນແຕ່ຂະແໜງການ, ເອກະສານນີ້ເປັນເອກະສານທີ່ສຳຄັນສະບັບໜື່ງ ໂດຍໄດ້ສະຫຼຸບຕີລາຄາການຊີ້ນໍາ-ນໍາພາຂອງພັກຂອງແຕ່ລະຂັ້ນ, ການຊີ້ນໍາ-ນໍາພາຂອງຄະນະປະຈໍາພັກແຂວງ, ການນໍາພາຂອງຄະນະປະຈໍາພັກເມືອງ, ຄະນະພັກຮາກຖານແຕ່ລະຂັ້ນ ຕາມ 4 ເນື້ອໃນ.
ຕາມການຕີລາຄາ ມາຮອດປັດຈຸບັນ ສາມາດຮັບຮູ້ໄດ້ ຈຸດດີ, ຈຸດອ່ອນ, ຂໍ້ຄົງຄ້າງ ແລະ ວິທີຈັດຕັ້ງປະຕິບັດແນວໃດ ເພື່ອເຮັດໃຫ້ບັນດາຄະນະພັກແຕ່ລະຂັ້ນ ໄດ້ນໍາໄປຈັດຕັ້ງເຜີຍແຜ່ໃຫ້ບັນດາສະມາຊິກພັກແຕ່ລະຂັ້ນຂອງຕົນ ໄດ້ຮັບຮູ້ ແລະ ເຂົ້າໃຈຕາມ 4 ເນື້ອໃນ ຂອງຄຸນທາດການເມືອງ, ຄຸນສົມບັດສິນທຳປະຕິວັດ, ຄວາມຮັບຜິດຊອບຕໍ່ໜ້າທີ່ການເມືອງ ຂອງບັນດາສະຫາຍສະມາຊິກພັກ ແລະ ແບບແຜນວິທີນໍາພາ–ເຮັດວຽກຂອງອົງຄະນະພັກ ທີ່ໄດ້ດຳເນີນຊີວິດການເມືອງ, ເຮັດແນວໃດໃຫ້ບັ້ນດຳເນີນຊີວິດການເມືອງຄັ້ງນີ້ ດຳເນີນຂອງຕາມທິດທາງແຜນການທີ່ພັກ ແລະ ລັດຂອງພວກເຮົາວາງໄວ້ ໃຫ້ໄດ້ຮັບຜົນດີຕາມລະດັບຄາດໝາຍ.
ພາຍຫຼັງ ທີ່ໄດ້ເຜີຍແຜ່ຢູ່ຂັ້ນແຂວງແລ້ວ ຍັງຈະໄດ້ນໍາໄປເຜີຍແຜ່ຢູ່ບັນດາພະແນກການ, ບັນດາເມືອງ, ກົມກອງຕ່າງໆພາຍໃນແຂວງໃຫ້ໄດຮັບຮູ້ ແລະ ເຂົ້າໃຈຕື່ມອີກ.
Editor: ເເຂວງວຽງຈັນ
