ໂດຍໄດ້ຮັບການຊ່ວຍເຫລືອ ອໍານວຍຄວາມສະດວກຢ່າງຮອບດ້ານ ຈາກອົງການພຸດທະສາສະຫນາສໍາພັນລາວ ໂດຍມີ ພຣະຍາທ່ານໃຫຍ່ ມະຫາງອນ ດໍາລົງບຸນ ປະທານສູນກາງອົງການພຸດທະສາສະຫນາສໍາພັນລາວ, ປະທານກິດຕິມະສັກຝ່າຍສົງ, ມີຄອບຄົວການນໍາຂັນສູງ ນໍາໂດຍ ທ່ານແມ່ປ້າ ຄໍາເມິງ ວໍລະຈິດ ແລະ ທ່ານປ້າ ນາລີ ສີສຸລິດ ເປັນປະທານກິດຕິມະສັກຝ່າຍຄາລະວາດ, ບັນດາການນໍາພັກ-ລັດ ສູນກາງ ແລະ ທ້ອງຖິ່ນ, ບັນດາອົງການຈັດຕັ້ງ ມະຫາຊົນທຸກຂັ້ນແຂວງຊຽງຂວາງ ໄດ້ພ້ອມກັນຈັດພິທີເທທອງຫລໍ່ເກດພະເຈົ້າອົງຫລວງປະທານພອນ ຂື້ນໃນວັນທີ 8 ເມສາ 2018 ທີ່ຜ່ານມາ ຢູ່ທີ່ເດີນຫໍທໍາມະ ສະພາ, ບໍລິເວນເດີນພະທາດຫລວງວຽງຈັນ.
ໃນພິທີໃຫ້ກຽດເຂົ້າຮ່ວມເປັນປະທານໄຕ້ທຽນໄຊ ໂດຍແມ່ນ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ພ້ອມດ້ວຍ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ, ມີ ທ່ານ ລັດຖະມົນຕີ, ຮອງລັດຖະມົນຕີ ກະຊວງຖະແຫລງຊ່າວ, ວັດທະນະທໍາ ແລະ ທ່ອງທ່ຽວ, ບັນດາຄອບຄົວການນໍາ ນະຄອນຫລວງ, ການນໍາແຂວງ, ຄອບຄົວການນໍາ ແຂວງຊຽງຂວາງ, ອົງການແນວລາວສ້າງຊາດທຸກຂັ້ນ, ພະແນກການທີ່ກ່ຽວຂ້ອງ,ບັນດານັກທຸລະກິດ ເຈົ້າພາບ-ເຈົ້າສັດທາ, ຕະຫລອດຮອດຊາວພຸດທະສາສະນິກະຊົນ ທົ່ວນະຄອນຫລວງວຽງຈັນ ແລະ ແຂວງຊຽງຂວາງ ເຂົ້າຮ່ວມ ຢ່າງພ້ອມພຽງ.
ໃນພິທີ ທ່ານ ບຸນຕົ້ນ ຈັນທະພອນ ຮັກສາການເລຂາພັກແຂວງ, ເຈົ້າແຂວງຊຽງຂວາງ ໄດ້ກ່າວວ່າ: ພິທີດັ່ງກ່າວ ເພື່ອເປັນການລະດົມທຶນຈາກຜູ້ມີສັດທາ ຢູ່ພາຍໃນປະເທດ ແລະ ປະເທດໃກ້ຄຽງ ພ້ອມກັນປະກອບສ່ວນສ້າງພະເຈົ້າອົງຫລວງປະທານພອນ ເຊີ່ງຈະໄດ້ນໍາໄປປະດິດສະຖານ ໄວ້ທີ່ວັດ ທົ່ງໄຫຫີນ ໄຊຍະຣາມ ໃກ້ກັບທົ່ງໄຫຫີນ ທີ່ຈະເປັນມໍລະດົກໂລກ ໃນມໍ່ໆນີ້, ຈຸດປະສົງ ໃນການສ້າງພະເຈົ້າອົງຫລວງປະທານພອນ ເພື່ອເປັນບ່ອນເຄົາລົບບູຊາ ເພີ່ງພາທາງດ້ານຈິດໃຈ ໃຫ້ຄວາມເຄົາລົບນັກຖື ເປັນສະຖານທີ່ເຕົ້າໂຮມຄວາມສາມັກຄີ ຂອງປະຊາຊົນບັນດາເຜົ່າພາຍໃນແຂວງ, ພາຍໃນປະເທດ ແລະ ເຂກຕ່າງປະເທດທີ່ມາທ່ອງທ່ຽວ-ຢ້ຽມຢາມ. ພ້ອມນັ້ນ ເພື່ອເປັນອົງໃຫ້ພອນ 3 ຢ່າງສໍາລັບແຂວງຊຽງຂວາງ ແລະ ເປັນການອະນຸລັກວັດທະນະທໍາອັນດີງາມຂອງຊາດ ຕິດພັນກັບການທ່ອງທ່ຽວ, ກ່ອນຫນ້ານີ້ ເກືອບ 3 ຮ້ອຍປີ ບັນພະບູລຸດໄດ້ສ້າງໄຫຫິນເປັນມໍລະດົກໄວ້ ໃຫ້ລູກຫລານ ໄວ້ເປັນສັນຍາລັກ ມາເຖິງປະຈຸບັນ. ໄລຍະຜ່ານມາ ລັດຖະບານລາວ ໄດ້ຍື່ນສະເຫນີຕໍ່ອົງການ ຍູເນັສໂກ້ແລ້ວ ເພື່ອຮັບຮອງເອົາທົ່ງໄຫຫິນເປັນມໍລະດົກໂລກ ໃນຊູມປີຕໍ່ຫນ້າ.
ສໍາລັບຍຸກສະໄຫມ ປະຈຸບັນ ແມ່ນຈໍາເປັນຕ້ອງໄດ້ສ້າງສິ່ງໃດສິ່ງຫນຶ່ງ ເປັນມໍລະດົກທາງດ້ານວັດທະນະທໍາ ໄວ້ໃຫ້ລູກຫລານ ເປັນບ່ອນເຄົາລົບບູຊາ ເປັນສູນລວມເພີ່ງພາທາງດ້ານຈີດໃຈ, ຮັກສາວັດທະນະທໍາຮິດຄອງປະເພນີ ແລະ ຮັກສາພຸດທະສາສະຫນາ ໄວ້ໃຫ້ຍືນນານຕະຫລອດໄປ. ສໍາລັບ ພະເຈົ້າອົງຫລວງປະທານພອນ ອົງດັ່ງກ່າວ ເປັນພະພຸດທະຮູບຂະຫນາດໃຫຍ່ ຫລໍ່ດ້ວຍທອງເຫລືອງ 108 ໂຕນ, ມີຫນ້າຕັກ ຫວ້າງ 16 ແມັດ, ລວງສູງອົງພະ 26 ແມັດ, ລວງສູງຍອດເກດ 4,5 ແມັດ.
Editor: ກຳປານາດ ລັດຖະເຮົ້າ
