ໃນທິດຜ່ານມາ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ສືບຕໍ່ເດີນທາງໄປເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງຈຳປາສັກ ເຊິ່ງມີ ທ່ານ ບຸນຖອງ ດີວິໄຊ ເຈົ້າແຂວງໆຈຳປາສັກ, ພ້ອມດ້ວຍບັນດາຮອງເຈົ້າແຂວງ, ຄະນະພັກ-ຄະນະນຳແຂວງ-ເມືອງ, ພະແນກການ ແລະ ຫ້ອງການອ້ອມຂ້າງ ໃຫ້ການຕ້ອນຮັບຢ່າງອົບອຸ່ນ.
ໃນການມາຢ້ຽມຢາມຄັ້ງນີ້, ທ່ານ ບຸນຖອງ ດີວິໄຊ ເຈົ້າແຂວງໆຈຳປາສັກ ໄດ້ລາຍງານໃຫ້ຊາບ ກ່ຽວກັບສະພາບການນໍາພາ-ຊີ້ນໍາ ແລະ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ໃນໄລຍະເຄິ່ງສະໄໝ ຂອງແຂວງ ເຊິ່ງໃນມະຕິ VII ຂອງອົງຄະນະພັກແຂວງ ໄດ້ກໍານົດຄາດໝາຍຮອດປີ 2020 ຄື: ເຮັດໃຫ້ເສດຖະກິດຂະຫຍາຍຕົວສະເລ່ຍບໍ່ຫຼຸດ 8% ຕໍ່ປີ, ລວມຍອດຜະລິດຕະພັນພາຍໃນ (GDP) ບັນລຸ 21.500 ກວ່າຕື້ກີບ, ສະເລ່ຍລາຍຮັບ 28,6 ລ້ານກີບຕໍ່ຄົນຕໍ່ປີ ຫຼື ປະມານ 3.581 ໂດລາສະຫະລັດຕໍ່ຄົນຕໍ່ປີ.
ປະຈຸບັນ, ເສດຖະກິດຂອງແຂວງ ຂະຫຍາຍຕົວໃນລະດັບ 8,12 %ຕໍ່ປີ, ສະເລ່ຍລາຍຮັບໄດ້ 20,5 ລ້ານກີບ ຫຼື ປະມານ 2.488 ໂດລາຕໍ່ຄົນຕໍ່ປີ. ສາມາດສະໜອງສະບຽງອາຫານປະເພດຊີ້ນ, ປາ ແລະ ອື່ນໆ ໃຫ້ແກ່ສັງຄົມ ໂດຍສະເລ່ຍຈາກ 55,3 ກິໂລກຣາມຕໍ່ຄົນຕໍ່ປີ ໃນປີ 2015 ມາເປັນ 61,48 ກິໂລກຣາມຕໍ່ຄົນຕໍ່ປີ ໃນປີ 2017; ການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ແມ່ນໄດ້ສຸມໃສ່ການສ້າງບ້ານ ແລະ ຈຸດສຸມພັດທະນາ ຕາມ 4 ເນື້ອໃນ 4 ຄາດໝາຍ ໄປຄຽງຄູ່ກັບການຈັດຕັ້ງປະບັດວຽກງານ 3 ສ້າງ ຢ່າງເປັນຂະບວນທີ່ຕັ້ງໜ້າ.
ໃນການມາເຄື່ອນໄຫວຢ້ຽມຢາມຄັ້ງນີ້, ທ່ານ ສອນໄຊ ສີພັນດອນ ແລະ ຄະນະ ຍັງໄດ້ເດີນທາງໄປຢ້ຽມຊົມການທ່ອງທ່ຽວດ້ານກະສິກຳ ແລະ ການປູກໄມ້ ໃຫ້ໝາກເປັນສິນຄ້າ ທີ່ສວນລາວທະນາທອນ ທີ່ໄດ້ມາລົງທຶນນັບແຕ່ປີ 2012 ເປັນຕົ້ນມາ ທີ່ບ້ານນໍ້າປົດ ເມືອງປາກຊ່ອງ ໃນເນື້ອທີ່ຫຼາຍກວ່າ 100 ເຮັກຕາ ແລະ ບ້ານນໍ້າຕວດ ອີກ 400 ກວ່າເຮັກຕາ ເຊິ່ງໄດ້ປູກພືດໃຫ້ໝາກຫຼາຍຊະນິດ ເປັນຕົ້ນ ປູກໝາກກ້ຽງ, ໝາກສະຕໍເບີຣີ, ໝາກອະງຸ່ນ, ໝາກນາວໃຫຍ່, ໝາກຮຸ່ງ, ໝາກແຕງ, ໝາກສີດາ, ດອກກຸຫຼາບ ແລະ ອື່ນໆ. ສຳລັບຜົນຜະລິດທັງໝົດ ແມ່ນສົ່ງອອກໄປຂາຍຕ່າງປະເທດ ແລະ ຈຳໜ່າຍພາຍໃນຈຳນວນໜຶ່ງ.
ພ້ອມນີ້, ກໍ່ຍັງຈະສ້າງໃຫ້ເປັນບ່ອນຮຽນຮູ້ທາງດ້ານກະສິກຳ, ການທ່ອງທ່ຽວໃນຮູບແບບການກະເສດ ແລະ ເປັນການສ້າງວຽກເຮັດງານທຳໃຫ້ແກ່ປະຊາຊົນໃນທ້ອງຖິ່ນ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ
Editor: ກຳປານາດ ລັດຖະເຮົ້າ
