ກອງປະຊຸມລັດຖະບັນຍັດ ວ່າດ້ວຍການອະໄພຍະໂທດ ໄດ້ໄຂຂຶ້ນໃນວັນທີ 09 ເມສາ 2018 ທີ່ຫໍປະຊຸມແຫ່ງຊາດ ພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກຳມະການອະໄພຍະໂທດ ລະດັບຊາດ ເຊິ່ງມີບັນດາທ່ານຄະນະກຳມະການອະໄພຍະໂທດ ລະດັບຊາດ, ລະດັບກະຊວງ ແລະ ລະດັບແຂວງ-ນະຄອນຫຼວງວຽງຈັນ ເຂົ້າຮ່ວມ.
ໃນກອງປະຊຸມຄັ້ງນີ້, ໄດ້ພ້ອມກັນເຊື່ອມຊຶມ ເນື້ອໃນລັດຖະບັນຍັດ ຂອງປະທານປະເທດ ວ່າດ້ວຍການອະໄພຍະໂທດ ແລະ ບັນດານິຕິກຳທີ່ກ່ຽວຂ້ອງກັບການອະໄພຍະໂທດ, ແລກປ່ຽນຄຳຄິດຄຳເຫັນ ເພື່ອສ້າງຄວາມຮັບຮູ້ ແລະ ເປັນເອກະພາບ ໃນການຈັດຕັ້ງປະຕິບັດລັດຖະບັນຍັດດັ່ງກ່າວ. ນອກນີ້, ໃນກອງປະຊຸມ ຍັງໄດ້ແຈ້ງໃຫ້ຊາບ ກ່ຽວກັບຜົນຂອງກອງປະຊຸມສະຫຼຸບວຽກງານອະໄພຍະໂທດ ປະຈຳປີ 2017 ທີ່ໄດ້ມີການສັງເກດຕີລາຄາດ້ານດີ, ຈຸດອ່ອນຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ການກຳນົດແຜນສຳລັບປີ 2018
ເຊິ່ງໃນປີ 2017 ທີ່ຜ່ານມາ ໄດ້ມີການຄົ້ນຄວ້າການໃຫ້ອະໄພຍະໂທດ ແກ່ນັກໂທດທົ່ວປະເທດທັງໝົດ 1.800 ກວ່າຄົນ, ຍິງ 400 ຄົນ, ຕ່າງປະເທດ 39 ຄົນ, ຍິງ 10 ຄົນ. ໃນນີ້, ໄດ້ເຫັນດີໃຫ້ອະໄພຍະໂທດ ໃນການຫຼຸດຜ່ອນໂທດ 1.500 ກວ່າຄົນ, ຍິງ 340 ຄົນ, ຕ່າງປະເທດ 33 ຄົນ, ຍິງ 10 ຄົນ ແລະ ໃຫ້ອະໄພຍະໂທດປ່ອຍຕົວ 333 ຄົນ, ຍິງ 60 ຄົນ ແລະ ຕ່າງປະເທດ 06 ຄົນ. ໃນປີ 2018 ລັດຖະບັນຍັດ ວ່າດ້ວຍການໃຫ້ອະໄພຍະໂທດ ສະບັບທໍາອິດ ທີ່ໄດ້ຮັບຮອງ ແລະ ລົງນາມ ຈາກປະທານປະເທດ ຢ່າງເປັນທາງການ ຊຶ່ງເປັນນິຕິກຳທາງດ້ານກົດໝາຍທີ່ສຳຄັນ, ເປັນບ່ອນອີງໃຫ້ແກ່ການເຄື່ອນໄຫວ ຈັດຕັ້ງປະຕິບັດວຽກງານຄົ້ນຄວ້າ ສະເໜີໃຫ້ອະໄພຍະໂທດ ເນື່ອງໃນໂອກາດວັນຊາດທີ 2 ທັນວາຂອງແຕ່ລະປີ. ຍ້ອນເຫັນໄດ້ຄວາມສໍາຄັນດັ່ງກ່າວ, ຄະນະກໍາມະການອະໄພຍະໂທດ ລະດັບຊາດ ຈຶ່ງໄດ້ຈັດກອງປະຊຸມເພື່ອພ້ອມກັນມາເຊື່ອມຊຶມລັດຖະບັນຍັດດັ່ງກ່າວ ແນໃສ່ສ້າງຄວາມຮັບຮູ້ເຂົ້າໃຈເປັນເອກະພາບ ໃນການຈັດຕັ້ງປະຕິບັດຕົວຈິງ.
Editor: ກຳປານາດ ລັດຖະເຮົ້າ
