ທິດຜ່ານມາ ຢູ່ທີ່ສະໂມສອນຫ້ອງວ່າການປົກຄອງເມືອງເຊໂປນ, ແຂວງສະຫວັນນະເຂດ ຫ້ອງການສະຫະພັນນັກຮົບເກົ່າເມືອງເຊໂປນ ໄດ້ຈັດກອງປະຊຸມສະຫຼຸບວຽກງານການເຄື່ອນໄຫວປະຈຳປີ 2017 ແລະ ວາງທິດທາງແຜນການປະຈໍາປີ 2018, ໂດຍການເປັນປະທານຂອງ ທ່ານ ບຸນມາ ໄຊຍະກູລາງ ຮອງເລຂາພັກເມືອງ ປະທານແນວລາວສ້າງຊາດເມືອງ, ທັງເປັນຜູ້ຊີ້ນໍາອົງການຈັດຕັ້ງມະຫາຊົນ, ທ່ານ ພັນຕີ ນາງ ຈູມຍອດ ນວນສີ ຮອງປະທານສະຫະພັນນັກຮົບເກົ່າແຂວງສະຫວັນນະເຂດ ພ້ອມຄະນະ, ມີບັນດາທ່ານຫົວໜ້າຄະນະຫ້ອງການອ້ອມຂ້າງ, ຄະນະບໍລິຫານງານສະຫະພັນນັກຮົບເກົ່າເມືອງ, ໜ່ວຍ, ຮາກຖານກຸ່ມບ້ານພ້ອມດ້ວຍສະມາຊິກນັກຮົບເກົ່າເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ບຸນນຳ ສາຍມັນຖື ປະທານສະຫະພັນນັກຮົບເກົ່າເມືອງເຊໂປນ ກໍ່ໄດ້ໃຫ້ກຽດຂື້ນກ່າວເປີດພິທີຢ່າງເປັນທາງການ,ຈາກນັ້ນ ທ່ານ ແຕງທອງ ເທືອງລີ ຮອງປະທານສະຫະພັນນັກຮົບເກົ່າ ໄດ້ຂື້ນຜ່ານບົດສະຫຼຸບການເຄື່ອນໄຫວຈັດຕັ້ງປະຕິບັດວຽກງານ ປະຈຳປີ 2017 ແລະ ທິດທາງແຜນການຈັດຕັ້ງປະຕິບັດປີ 2018 ຕະຫຼອດໄລຍະ 1 ປີ ຜ່ານມາ, ຄະນະບໍລິຫານງານສະຫະພັນນັກຮົບເກົ່າ ໄດ້ຖືເອົາຄວາມສຳຄັນການສຶກສາອົບຮົມການເມືອງແນວຄິດ ໃນຖັນແຖວນັກຮົບເກົ່າດ້ວຍຫຼາຍຮູບການຫຼາຍວິທີ ແລະ ໄດ້ເອົາໃຈໃສ່ປັບປຸງໂຄງປະກອບການຈັດຕັ້ງແຕ່ເມືອງລົງສູ່ຮາກຖານກຸ່ມບ້ານຍົກສູງປະສິດທິຜົນແບບວິທີເຮັດວຽກຂອງຄະນະບໍລິຫານງານ, ໜ່ວຍສຸມໃສ່ປັບປຸງການຈັດຕັ້ງກຸ່ມບ້ານໃຫ້ເຂັ້ມແຂງເຕົ້າໂຮມ ຄວາມສາມັກຄີ ໃນຖັນແຖວນັກຮົບເກົ່າເຄື່ອນໄຫວໄປຕາມທິດຊີ້ນຳຂອງກົມການເມືອງສູນກາງພັກ, ກົດລະບຽບສະຫະພັນນັກຮົບເກົ່າແຫ່ງຊາດລາວວາງອອກ. ທິດທາງແຜນການປີ 2018 ຖືເອົາວຽກງານການເມືອງແນວຄິດໃຫ້ຖັນແຖວນັກຮົບເກົ່າໄດ້ເຊື່ອມຊຶມແນວທາງນະໂຍບາຍຂອງພັກ, ພາລະບົດບາດ ແລະ ສິດໜ້າທີ່ຂອງນັກຮົບເກົ່າ ຍາມໃດກໍ່ເປັນເຈົ້າການເສີມຂະຫຍາຍບົດບາດເປັນແວ່ນແຍງໃຫ້ຄົນລຸ້ນຫຼັງ ໃນການຮັກສາທາດແທ້ຄຸນສົມບັດສິນທຳປະຕິວັດ, ແບບແຜນ ການດຳລົງຊີວິດທີ່ກ້າວໜ້າ, ວຽກງານກອງທຶນໃນ 1 ປີຜ່ານມາໄດ້ຂະຫຍາຍສະມາຊິກກອງທຶນໄດ້ 114 ຄົນ, ຍິງ 49 ຄົນ, ປະຈຸບັນມີສະມາຊິກທັງໝົດ1.601 ຄົນ,ຍິງ 738 ຄົນ, ປະຈຸບັນມີເງິນກອງທຶນຝາກທະນາຄານ 600 ກວ່າລ້ານກີບ. ຈາກນັ້ນກໍ່ໄດ້ໃຫ້ແຕ່ລະພາກສ່ວນຂື້ນປະກອບຄໍາຄິດຄໍາເຫັນເຈາະຈີ້ມບັນຫາຕ່າງໆຢ່າງກົງໄປກົງມາ,
ໃນພິທີຍັງໄດ້ມີການມອບໃບຍ້ອງຍໍ ສະຫະພັນນັກຮົບເກົ່າແຫ່ງຊາດ ຈຳນວນ 07 ທ່ານ,ຍ້ອງຍໍທ່ານເຈົ້າແຂວງ ຈໍານວນ 23 ທ່ານ, ໃບຍ້ອງຍໍສະຫະພັນນັກຮົບເກົ່າແຂວງ ຈໍານວນ 23 ທ່ານ,ໃບຢັ້ງຢືນ 3 ດີ 6 ຮັກສາ ຈໍານວນ 37 ທ່ານ, ໂດຍເປັນກຽດມອບຄະນະປະທານທັງສາມທ່ານ,ຕາງໜ້າບັນດາທ່ານທີ່ມີຜົນງານຂື້ນຮັບຊ້ອງໜ້າແຂກເຂົ້າຮ່ວມທັງໝົດເປັນສັກຂີພີຍານນຳດ້ວຍ.
ໃນຕອນທ້າຍພິທີ ທ່ານ ພັນຕີ ນາງ ຈູມຍອດ ນວນສີ ຮອງປະທານສະຫະພັນນັກຮົບເກົ່າແຂວງສະຫວັນນະເຂດ ໄດ້ໃຫ້ກຽດຂື້ນມີຄຳເຫັນ ແລະ ໂອ້ລົມຕໍ່ກອງປະຊຸມດັ່ງກ່າວ: ຊື່ງກ່ອນອື່ນທ່ານກໍ່ເຫັນດີເປັນເອກະພາບນຳບົດສະຫຼຸບວຽກງານການເຄື່ອນໄຫວໃນໄລຍະ1ປີຜ່ານມາ ແລະ ຍັງໄດ້ເນັ້ນໜັກກ່ຽວກັບພາລະບົດບາດຂອງນັກຮົບເກົ່າ ຢູ່ໃນຂົງເຂດຮາກຖານກຸ່ມບ້ານເພື່ອເຮັດໃຫ້ສະມາຊິກນັກຮົບເກົ່າມີຄວາມໜັກແໜ້ນທາງດ້ານການເມືອງແນວຄິດ, ການຈັດຕັ້ງໃຫ້ມີຄວາມສາມັກຄີ, ຊ່ວຍເຫຼືອເຊິ່ງກັນ ແລະ ກັນ ຢູ່ໃນຖັນແຖວນັກຮົບເກົ່າຂອງພວກເຮົາ, ເພີ່ມທະວີຄວາມເປັນເອກະພາບກັນ ແລະ ແບບແຜນວິທີເຮັດວຽກ ລະຫວ່າງ ພະນັກງານ, ອຳນາດການປົກຄອງບ້ານ, ອົງການຈັດຕັ້ງມະຫາຊົນເພື່ອເຮັດໃຫ້ສະມາຊີກຂອງພວກເຮົາມີໃບໜ້າອັນໃໝ່, ຮູ້ເຖິງວຽກງານພາລະບົດບາດ, ສິດແລະໜ້າທີ່ຂອງວຽກງານນັກຮົບເກົ່າຢ່າງເລິກເຊິ່ງ ຢູ່ໃນຖັນແຖວນັກຮົບເກົ່າໃນແຕ່ລະເຂດ, ແຕ່ລະຂັ້ນ, ລົງເຜີຍແຜ່ກົດລະບຽບກອງທຶນໃຫ້ສະມາຊີກຮັບຮູ້ຢ່າງທົ່ວເຖີງ, ກຳໄດ້ວຽກງານກ່ຽວກັບ 3 ດີ 6 ຮັກສາ ເພື່ອນຳເອົາໄປຈັດຕັ້ງປະຕິບັດເຂົ້າໃນວຽກງານວິຊາສະເພາະຂອງຕົນໃຫ້ໄດ້ຮັບຜົນສຳເລັດເປັນກ້າວໆ
ຖວທ ເມືອງເຊໂປນ
Editor: ກຳປານາດ ລັດຖະເຮົ້າ
