ໃນທ່າມກາງບັນຍາກາດ ທີ່ຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ທົ່ວປະເທດ ພວມເບີກບານມ່ວນຊື້ນສະເຫຼີມສະຫຼອງວັນສ້າງຕັ້ງ ຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ. ໃນວັນທີ 14 ເມສາ 1955-ວັນທີ 14 ເມສາ 2018 ຄົບຮອບ 63 ປີ. ດັ່ງນັ້ນມາທ້າຍອາທິດຜ່ານມາ ຄະນະບໍລິຫານງານຊາວໜຸ່ມ ເມືອງຄຳ ພ້ອມດ້ວຍ ຄະນະບໍລິຫານງານຊາວໜຸ່ມ ແຂວງຊຽງຂວາງ ໄດ້ວາງກະຕ່າດອກໄມ້ ທີ່ອານຸສາວະລີປະທານໄກສອນ ພົມວິຫານ. ເພື່ອລະນຶກເຖິງບຸນຄຸນ ແລະ ຄຸນງາມຄວາມດີ ຂອງປະທານໄກສອນ ຜູ້ນໍາທີ່ແສນເຄົາລົບຮັກ. ຫຼັງຈາກນັ້ນເວລາ 8:00 ຂອງວັນດຽວກັນກໍ່ຍັງໄດ້ເປີດພິທີປະຖະກະຖາ ວັນສ້າງຕັ້ງຄະນະບໍລິ ຫານງານຊາວໜຸ່ມ ປະຊາຊົນ ປະຕິວັດລາວ ຄົບຮອບ 63 ປີ, ຂື້ນທີ່ສະໂມສອນສໍານັກງານປົກຄອງເມືອງຄໍາ ຢ່າງ ເປັນທາງການ.
ໂດຍພາຍໃຕ້ການເຂົ້າຮ່ວມເປັນປະທານຂອງ ສະຫາຍ ນາງ ແສງຈັນ ວົງສຸລິດ ຄະນະປະຈຳພັກເມືອງ, ປະທານກວດກາພັກ-ລັດເມືອງຄໍາ, ມີ ສະຫາຍ ເພັດສະໝອນ ດາວວົງສອນ ຮອງເລຂາຄະນະບໍລິຫານງານຊາວໜຸ່ມແຂວງຊຽງຂວາງ, ມີຄະນະບໍລິຫານງານຊາວໜຸ່ມທົ່ວເມືອງ ແລະ ສະມາຊິກຊາວໜຸ່ມອ້ອມຂ້າງເມືອງ ເຂົ້າຮ່ວມທັງໝົດ 138 ສະຫາຍ, ຍິງ 81 ສະຫາຍ.
ໃນພິທີ ສະຫາຍ ເພັດສະໝອນ ດາວວົງສອນ ຮອງເລຂາຄະນະບໍລິຫານງານຊາວໜຸ່ມແຂວງ ກໍ່ໄດ້ຂື້ນຜ່ານເອກະສານມູນເຊື້ອຊາວໜຸ່ມລາວ ເຊີ່ງມີເນື້ອໃນວ່າ: ມູນເຊື້ອທີ່ອົງອາດທີ່ມີປະຫວັດສາດອັນຍາວນານ ໃນການເຕົ້າໂຮມຄວາມສາມັກຄີການສ້າງຕັ້ງ ແລະ ປົກປັກຮັກສາປະເທດຊາດ ທີ່ໄດ້ສືບທອດກັນມາ ແຕ່ດຶກດຳບັນເຊີ່ງຢູ່ແຕ່ລະໄລຍະຂອງປະຫວັດສາດຂອງບັນພະບູລຸດ ແລະ ວິລະຊົນຫຼາຍທ່ານທີ່ເປັນສັນຍາລັກ ແຫ່ງຄວາມເດັດດ່ຽວໜຽວແໜ້ນ, ກ້ານຫານບໍຍອງຈໍານົນຂອງຄົນລາວ
ພາຍຫຼັງໄລຍະຮ້ອຍປີແຫ່ງການເຕົ້າໂຮມ, ການປົກ ປັກຮັກສາ ແລະ ສ້າງສາພັດທະນາປະເທດຊາດເຮັດໃຫ້ຊາວໜຸ່ມ ຈຳນວນບໍ່ໜ້ອຍໄດ້ເສຍສະຫຼະຊີວິດ, ເລືອດເນື້ອໃນການປົກປັກຮັກສາເອກະລາດ, ຜືນແຜ່ນດິນອັນແສນຮັກຂອງຕົນໄວ້ ໃນຂະບວນດັ່ງກ່າວໄດ້ ເກີດມີບັນດາບັນພະບູລຸດທີ່ມີຊື່ສຽງ ເຊັ່ນ: ເຈົ້າຂຸດບູລົມ, ເຈົ້າຟ້າງຸ່ມ, ເຈົ້າໄຊເສດຖາທິລາດ, ເຈົ້າອານຸວົງ, ທ່ານ ໄກສອນ ພົມວິຫານ ແລະ ບັນພະບູລຸດອື່ນໆ ທີ່ນຳພາປວງຊົນລາວທັງຊາດ ຕໍ່ສູ້ຕ້ານການຮຸດຮານ ຂອງສັດຕູພາຍນອກອັນເຮັດໃຫ້ປະເທດສາດຜ່ານພົ້ນພາຍຸລົມແດງໃນແຕ່ລະຍຸກແຕ່ລະສະໄໝ. ໂດຍບໍ່ຍອມຈຳນົນ ພ້ອມທັງໄດ້ລຸກຮື້ຂື້ນຕໍ່ສູ້ຢ່າງພິລະອາດຫານ ໄປຕາມແຕ່ລະໄລຍະຊາວໜຸ່ມແຕ່ລະຮຸ່ນ ຈົນປະເທດຊາດໄດ້ຮັບການປົດປ່ອຍໃນປີ 1975 ຈົນເຖີງປະຈຸບັນ.
ຈາກນັ້ນ ທ່ານ ຄຳເພັດ ໄຊຍະພັກ ກຳມະການພັກເມືອງເລຂາຄະນະບໍລິຫານງານຊາວໜຸ່ມເມືອງ ກໍ່ໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດຂະບວນການ 4 ບຸກໃນໄລຍະ 2 ປີຜ່ານມາ ແລະ ທິດທາງແຜນການຈັດຕັ້ງປະຕິບັດໃນປີ 2018 ຕື່ມອີກ. ພ້ອມດຽວກັນນັ້ນກໍ່ຍັງໄດ້ ມອບໃບຢັ້ນຢືນຕົວແບບ 4 ບຸກໃຫ້ແກ່ໜ່ວຍອ້ອມຂ້າງ, ໂຮງຮຽນ ແລະ ບ້ານ ຈຳນວນ 49 ໃບ. ໂດຍເປັນກຽດຂື້ນມອບຂອງ ສະຫາຍ ຄຳເພັດ ໄຊຍະພັກ ກຳມະຫານພັກເມືອງເລຂາ ຄະນະບໍລິຫານງານຊາວໜຸ່ມເມືອງຄໍາ. ແລະ ເນື່ອໃນໂອກາດດັ່ງກ່າວ ສະຫາຍ ນາງ ແສງຈັນ ວົງສຸລິດ ຮອງເລຂາພັກເມືອງປະທານກວດກາ ພັກ-ລັດເມືອງ ໄດ້ຂື້ນໂອ້ລົມໃຫ້ຄໍາຄິດ-ຄໍາເຫັນ ແລະ ທິດຊີ້ນໍາກ່ອນອື່ນໝົດສະຫາຍຍັງໄດ້ຍົກໃຫ້ເຫັນ ເຖີງຄວາມໝາຍຄວາມສຳຄັນມູນເຊື້ອຊາວໜຸ່ມໃນການຕໍ່ສູ້ກູ້ຊາດພ້ອມທັງກ່າວຍ້ອງຍໍຊົມເຊີຍຕໍ່ຜົນງານທີ່ໄດ້ເຄື່ອນໄຫວໃນໄລຍະຜ່ານມາ ແລະ ໃຫ້ທິດຊີ້ນຳແກ່ຄະນະບໍລິຫານງານຊາວໜຸ່ມ, ສະມາຊິກຊາວໜຸ່ມ, ເຍົາວະຊົນຈົ່ງພ້ອມກັນນຳເອົາມູນເຊື້ອດັ່ງກ່າວ ມາເປັນແຜນງານແຜນວຽກຕົນໃນການຈັດຕັ້ງປະຕິບັດໜ້າທີ່ວຽກງານ ຂອງຕົນເອງ ໃຫ້ມີບາດກ້າວຂະຫຍາຍຕົວຂື້ນເລື່ອຍໆ. ພ້ອມນັ້ນກໍ່ຈະໄດ້ເອົາໃຈໃສ່ນຳເອົາການເມືອງແນວຄິດ, ມະຕິ, ນິຕິກຳຕ່າງໆ ແລະ ເອກະສານອື່ນໆ ລົງເຊື່ອມຊືມຊຸກຍູ້ສົ່ງເສີມ, ຍົກສູງພະລະບົດບາດ, ສິດ ແລະ ໜ້າທີ່ຂອງວຽກງານຊາວໜຸ່ມໃຫ້ແກ່ສະມາຊິກຊາວໜຸ່ມ, ໄວໜຸ່ມ, ເຍົາວະຊົນໃຫ້ໄດ້ຮັບຮູ້ ແລະ ເຂົ້າໃຈຢ່າງເລິກເຊີ່ງເຖິງຖອງຂື້ນເປັນກ້າວໆ.
ທີມຂ່າວເມືອງຄໍາ
Editor: ກຳປານາດ ລັດຖະເຮົ້າ
