ກອງປະຊຸມສະຫຼຸບວຽກງານກະສິກຳ, ປ່າໄມ້ ແລະ ພັດທະນາຊົນນະບົດ ປະຈຳປີ 2017 ແລະ ທິດທາງແຜນການປີ 2018 ເມືອງຫົງສາ ແຂວງໄຊຍະບູລີ ໄດ້ຈັດຂື້ນໃນວັນທີ 9 ເມສາ 2018 ນີ້, ຢູ່ທີ່ສະໂມສອນໃຫຍ່ປົກຄອງເມືອງເຊໂປນ, ໂດຍການໃຫ້ກຽດເຂົ້າຮ່ວມຂອງ ທ່ານ ຄໍາເພັດ ພົມມະລາດ ເຈົ້າເມືອງໆຫົງສາ, ມີ ທ່ານ ຄຳເກິ່ງ ພັນລັກ ຮອງຫົວໜ້າພະແນກກະສິກຳ ແລະ ປ່າໄມ້ແຂວງໄຊຍະບູລີ, ມີ ທ່ານ ພົມມາ ພົມມະຫານ ຫົວໜ້າຫ້ອງການກະສິກຳ ແລະ ປ່າໄມ້ເມືອງ, ມີການນຳຂອງເມືອງ, ຫົວໜ້າຂະແໜງການຂອງແຂວງ, ຫົວໜ້າຫ້ອງການ, ກົມກອງອ້ອມຂ້າງເມືອງ, ນັກທຸລະກິດ, ນາຍບ້ານ, ຄອບຄົວຕົວແບບ ແລະ ພະນັກງານຫ້ອງການກະສິກຳ ແລະ ປ່າໄມ້ເມືອງເຂົ້າຮ່ວມເກືອບ 100 ຄົນ.
ໃນກອງປະຊຸມຜູ້ເຂົ້າຮ່ວມ ແມ່ນໄດ້ຮັບຟັງການສະຫຼຸບຕີລາຄາວຽກງານຮອບດ້ານ ກ່ຽວກັບການຈັດຕັ້ງປະຕິບັດແຜນພັດທະນາກະສິກຳ, ປ່າໄມ້ ແລະ ພັດທະນາຊົນນະບົດ ປະຈຳປີ 2017 ແລະ ທິດທາງແຜນການປີ 2018, ສະພາບການຜະລິດພືດລະດູແລ້ງ ແລະ ແຜນການປູກພືດລະດູຝົນ ປະຈຳປີ 2018, ການຕີລາຄາການຜະລິດສະບຽງອາຫານບໍ່ທັນພຽງພໍ ແລະ ການຜະລິດສິນຄ້າບໍ່ທັນກວ້າງຂວາງ, ການບໍລິຫານກອງທຶນພັດທະນາບ້ານ, ກອງທຶນຊ່ວຍເຫຼືອລ້າ, ທຶນກູ້ຢືມຕ່າງໆບໍ່ທັນມີປະສິດທິຜົນສູງ, ການຄຸ້ມຄອງປ່າໄມ້ ແລະ ພັດທະນາປ່າໄມ້, ການປະຕິບັດຄຳສັ່ງເລກທີ 15/ນຍ ເພື່ອບັນລຸ 70 ສ່ວນຮ້ອຍ, ຂອງອັດຕາການປົກຫຸ້ມປ່າໄມ້ ຮອດປີ 2020 ແລະ ປະກົດການຫຍໍ້ທໍ້ທີ່ເກີດຂື້ນ, ບົດຮຽນ, ຜົນສຳເລັດ, ສິ່ງທ້າທາຍໃນການພັດທະນາກຸ່ມຜະລິດ, ສ້າງຕັ້ງ ແລະ ພັດທະນາສະຫະກອນ, ພ້ອມນີ້, ກອງປະຊຸມ ຍັງໄດ້ຮັບຟັງການນຳສະເໜີບົດຮຽນທີ່ພົ້ນເດັ່ນຈາກຄອບຄົວຕົວແບບ, ກຸ່ມຜະລິດ ແລະ ສະຫະກອນ, ວິທີການເຂົ້າເຖິງການຕະຫຼາດ ແລະ ການຄຸ້ມຄອງບໍລິຫານກອງທຶນພັດທະນາບ້ານ, ຈາກນັ້ນ, ບັນດາຜູ້ເຂົ້າຮ່ວມກໍ່ໄດ້ພ້ອມກັນປະກອບຄຳຄິດຄຳເຫັນໃສ່ເນື້ອໃນບົດສະຫຼຸບດັ່ງກ່າວເພື່ອໃຫ້ມີເນື້ອໃນຄົບຖ້ວນສົມບູນຂື້ນ.
ໃນໂອກາດດັ່ງກ່າວ, ທ່ານ ຄຳເພັດ ພົມລາດ ກໍ່ໄດ້ມີຄໍາຄິດ ຄຳເຫັນໂອ້ລົມ ແລະ ໃຫ້ທິດຊີ້ນຳຕໍ່ກອງປະຊຸມ, ເປັນຕົ້ນແມ່ນໃຫ້ ສືບຕໍ່ຜັນຂະຫຍາຍເນື້ອໃນ, ຈິດໃຈກອງປະຊຸມຄັ້ງນີ້ ໃຫ້ເປັນແບບແຜນ, ແຜນງານ ແລະ ມາດຕະການຈັດຕັ້ງປະຕິບັດໃຫ້ແທດກັບຕົວຈິງ, ຫັນການຜະລິດແບບກະແຈກກະຈາຍເປັນຈຸດສຸມຕາມທ່າແຮງທີ່ມີ, ມີການກຳນົດເຂດການຜະລິດສະເພາະ, ຕິດພັນກັບການປຸງແຕ່ງຂັ້ນຕົ້ນ, ເອົາໃຈໃສ່ສືບຕໍ່ຜັນຂະຫຍາຍ ແລະ ຈັດຕັ້ງປະຕິບັດກົດໝາຍປ່າໄມ້ ເພື່ອໃຫ້ເປັນເຄື່ອງມື ຄຸ້ມຄອງມະຫາພາກທີ່ຮັດກຸມ, ພ້ອມດຽວກັນກໍ່ໃຫ້ປະຕິບັດ ຄຳສັ່ງເລກທີ 15/ນຍ, ເລກທີ 153/ຈຂ ຢ່າງເຂັ້ມງວດ ແລະ ອື່ນໆ
ແຫລ່ງຂ່າວຈາກທີມຂ່າວ ເມືອງຫົງສາ
Editor: ກຳປານາດ ລັດຖະເຮົ້າ
