ເມືອງຊຳໃຕ້ ແຂວງຫົວພັນ ໄດ້ເປີດກອງປະຊຸມໃຫຍ່ຄັ້ງທີ 3 ຂອງຄະນະຮາກຖານພັກກຸ່ມບ້ານຊຳໃຕ້ ຂຶ້ນຢູ່ທີ່ບ້ານຖິ່ນ ໂດຍພາຍໃຕ້ການເປັນປະທານຂອງ ສະຫາຍ ເພັດໄຊ ວິໄລທອງ ຄະນະປະຈຳພັກເມືອງ ຫົວໜ້າ,ຄະນະຈັດຕັ້ງເມືອງ, ມີແຂກທີ່ຖືກເຊີນຈາກເມືອງ, ກຸ່ມບ້ານ ຕະຫຼອດຮອດຄະນະພັກ ແລະ ສະມາຊິກພັກທົ່ວກຸ່ມບ້ານ ເຂົ້າຮ່ວມຢ່າງພ້ອມພຽງ.
ໃນກອງປະຊຸມ ສະຫາຍ ມູນທອນ ທຳວີໄຊ ເລຂາພັກກຸ່ມບ້ານ ໄດ້ຂຶ້ນມີຄໍາເຫັນເປີດກອງປະຊຸມຢ່າງເປັນທາງການ, ຫຼັງຈາກນັ້ນ ສະຫາຍ ສົມຈັນ ພຸດປັນຍາ ຮອງເລຂາ ໄດ້ຂື້ນຜ່ານບົດສະຫຼຸບ ແລະ ແຜນການ. ປັດຈຸບັນນີ້ ກຸ່ມບ້ານຊໍາໃຕ້ ປະກອບມີ 8 ບ້ານ, ມີ 704 ຫຼັງຄາເຮືອນ, ມີ 914 ຄອບຄົວ, ພົນລະເມືອງທັງໝົດ 4 ພັນ 234 ຄົນ, ຍິງ 2 ພັນ 137 ຄົນ, ມີ 8 ໜ່ວຍພັກທີ່ກັບ, ມີຊະມາຊິກທັງໝົດ 117 ສະຫາຍ, ຍິງ 15 ສະຫາຍ. ນອກນີ້ ພາຍໃນກຸ່ມບ້ານ ຍັງມີເນື້ອທີ່ທັງໝົດ 6 ພັນກ່ວາເຮັກຕາ. ໄລຍະ 5 ປີຜ່ານມາ ຄະນະພັກໄດ້ເອົາໃຈໃສຊຸກຍູ້ສົ່ງເສີມການປູກຝັງ ລ້ຽງສັດ ແລະ ຖັດຖະກຳຕໍ່າຜ້າແພເປັນຫຼັກ, ປະຈຸບັນທົ່ວກຸ່ມບ້ານມີເນື້ອທີ່ນາ ທັງໝົດ 335 ຮັກຕາ, ສະມັດຕະພາບ 4,5 ໂຕນຕໍ່ເຮັກຕາ, ເນື້ອທີ່ປູກເຂົ້າເນີນສູງ 126 ກ່ວາເຮັກຕາ, ສະມັດຕະພາບ 3 ໂຕນຕໍ່ເຮັກຕາ, ເນື້ອທີ່ປູກພືດລົ້ມລຸກ ຈຳນວນ 100 ກ່ວາເຮັກຕາ, ນອກນີ້ທົ່ວກຸ່ມບ້ານ ຍັງລ້ຽງສັດປະເພດຄວາຍ ທັງໝົດ 698ໂຕ, ງົວ 735 ໂຕ, ໝູ 1 ພັນກ່ວາໂຕ, ແບ້ 52ໂຕ, ສັດປີກ 8 ພັນ ກ່ວາໂຕ, ກຸ່ມບ້ານພັນຊຳ ເປັນກຸ່ມບ້ານທີ່ໃກ້ກັບຕົວເມືອງມີຄວາມສະດວກທາງດ້ານຟື້ນຖານໂຄງລ່າງ ມີທາງຢາງ, ໄຟຟ້າ, ລະບົບນໍ້າລີນຊົມໃຊ້ 100 ສ່ວນຮ້ອຍ, ມີໂຮງຮຽນແຕ່ອະນຸບານຮອດມັດທະຍົມປາຍ, ແລະ ມີສຸກສາລາ, ໂຮງໝໍປະຈຳກຸ່ມບ້ານ ເຊີ່ງເປັນເງື່ອນໄຂສະດວກໃນການພັດທະນາຊີວິດການເປັນຢູ່ ແລະ ເສດຖະກິດ-ສັງຄົມຂອງກຸ່ມບ້ານ, ສາມາດສະເລ່ຍລາຍຮັບໃສຕໍ່ຄົນໄດ້ 3 ລ້ານ 5ແສນກີບຕໍ່ຄົນຕໍ່ປີ, ແຕ່ກໍ່ຍັງມີຄອບຄົວທີ່ທຸກຍາກ ຈຳນວນ 24 ຄອບຄົວ ກວມ 3,40 ສ່ວນຮ້ອຍຂອງຄອບຄົວທັງໝົດ. ໃນໄລຍະ 5 ປີຜ່ານມາ ຄະນະພັກກຸ່ມບ້ານໄດ້ເອົາໃຈໃສ່ຊີ້ນຳ-ນຳພາປະຊາຊົນ ປະຕິບັດ ມະຕິຂອງກອງປະຊຸມໃຫຍ່ຄັ້ງທີ 2 ຂອງກຸ່ມບ້ານ ແລະ ມະຕິ 10 ຂອງກອງປະຊຸມໃຫຍ່ຂອງອົງຄະນະພັກເມືອງຊຳໃຕ້ ໄດ້ມີຜົນສຳເລັດຫຼາຍດ້ານ ເປັນຕົ້ນແມ່ນການປຸກລະດົມປະຊາຊົນເຊື່ອມຊືມແນວທາງນະໂຍບາຍຂອງພັກ, ກົດໝາຍຂອງລັດ ໄດ້18 ຄັ້ງ, ມີຜູ້ເຂົ້າຮ່ວມ 2 ພັນກ່ວາຄົນ, ປະກອບເງິນພັນທະ ປ້ອງກັນຊາດໄດ້ຢ່າງຄົບຖ້ວນ, ອອກກວດກາລາດຕະເວນ ຕາມຊາຍແດນ ໃນຂອບເຂດຄວາມຮັບຜິດຊອບ ໄດ້ 82 ຄັ້ງ, ເລີກຮື້ອາວຸດຫຼ້າເນື້ອ ໄດ້ທັງໝົດ 90 ກະບອກ, ສຶກສາອົມຮົມ ແລະ ແກ້ໄຂຜູ້ກະທຳຜິດ ໄດ້ 6 ຄັ້ງ ມີ 14 ລາຍ. ແລະ ວຽກງານອື່ນໆກໍ່ໄດ້ຮັບການປັບປຸງໃຫ້ນັບມື້ນັບດີຂຶ້ນເທື່ອລະກ້າວ.
ຫຼັງຈາກນັ້ນ ຜູ້ແທນກອງປະຊຸມຍັງໄດ້ພ້ອມກັນປະກອບຄຳຄິດ-ຄຳເຫັນ ຢ່າງກົງໄປກົງມາ ເພື່ອພ້ອມກັນເປັນເອກະພາບໃນປັບປຸງບັນຫາທີ່ຈຸດອ່ອນຄົງຄ້າງ ໃຫ້ນັບມື້ຫຼຸດໜ້ອຍຖອຍລົງ, ໄປພ້ອມດຽວກັນນີ້ຜູ້ແທນສົມບູນ ໄດ້ໃຊ້ສິດປະຊາທິປະໄຕ ປ່ອນບັດຄັດເລືອກ ເອົາຄະນະພັກຊຸດໃໝ່ຈຳນວນ 11 ສະຫາຍ ເລືອກເອົາ 7 ສະຫາຍ, ກອງປະຊຸມຮອບປະຖົມມະເລີກເລືອກຕັ້ງເອົາ ສະຫາຍ ມູນທອນ ເປັນເລຂາ, ສະຫາຍ ສົມຈັນ ພຸດປັນຍາ ເປັນຮອງເລຂາ, ແລະ ອີກ 5 ສະຫາຍເປັນຄະນະ ເພື່ອສືບຕໍ່ຊີ້ນຳ-ນຳພາສະມາຊິກພັກ ແລະ ປະຊາຊົນຈັດຕັງປະຕິບັດວຽກງານ ຮອບດ້ານຂອງກຸ່ມຊຳໃຕ້ ໃຫ້ນັບມື້ມີການພັດທະດີຂື້ນ.
ທີມຂ່າວ ເມືອງຊໍາໄຕ້
Editor: ກຳປານາດ ລັດຖະເຮົ້າ
