ກອງປະຊຸມໃຫ່ຍຄັ້ງທີ 5 ຂອງຄະນະໜ່ວຍພັກຫ້ອງວ່າການປົກຄອງເມືອງທ່າແຕງ, ແຂວງ ເຊກອງ ໄດ້ໄຂຂື້ນຢູ່ທີ່ສະໂມສອນຂອງເມືອງທ່າແຕງ ໂດຍພາຍໃຕ້ການເປັນປະທານຂອງ ສະຫາຍ ບຸນສວນ ບຸດບຸນມາ ຄະນະປະຈໍາພັກເມືອງ ປະທານກວດກາພັກ-ລັດເມືອງທ່າແຕງ, ມີເລຂາ-ຄະນະໜ່ວຍພັກອ້ອມຂ້າງ, ແຂກຖືກເຊີນ ພ້ອມດ້ວຍສະມາຊິກພັກສົມບູນ ແລະ ສະມາຊິກພັກ ສໍາຮອງເຂົ້າຮ່ວມ.
ໃນພິທີບັນດາສະຫາຍທີ່ເຂົ້າຮ່ວມກອງປະຊຸມ ໄດ້ຍົກສູງຄວາມຮັບຜິດຊອບ ແລະ ສົມທົບສະຕິປັນຍາຂອງຕົນ ແລະ ໃຊ້ສິດປະຊາທິປະໄຕ ເຕັມສ່ວນ ເພື່ອເຮັດໃຫ້ກອງປະຊຸມດຳເນີນໄປດ້ວຍບັນຍາກາດພົດພື້ນ ແລະ ສຳເລັດຕາມຈຸດປະສົງ ທີ່ວາງໄວ້, ພ້ອມທັງຮັບຟັງບົດລາຍງານການເມືອງທັງສອງພາກ, ສັງເກດຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາຍເຫດ, ບົດຮຽນ ໃນການຊີ້ນໍາ-ນຳພາ ແລະ ການຈັດຕັ້ງປະຕິບັດມະຕິກອງປະຊຸມໃຫ່ຍໃນໄລຍະ 3 ປີຜ່ານມາ ແລະ ຮັບຮອງເອົາທິດທາງແຜນການ 5 ປີຕໍ່ໜ້າ ເຊິ່ງສະເໜີໂດຍ ສະຫາຍ ສຸກັນ ຈັນສີປະເສີດ ກໍາມະການພັກເມືອງ ເລຂາໜ່ວຍພັກຫ້ອງວ່າການປົກຄອງເມືອງ ທ່າແຕງ. ພ້ອມນີ້ ຜູ້ແທນກອງປະຊຸມ ໄດ້ພ້ອມກັນໃຊ້ສິດ ປະຊາທິປະໄຕ ຂອງຕົນປ່ອນບັດຄັດເລືອກເອົາຄະນະພັກຊຸດໃໝ່. ບົນພື້ນຖານຫຼັກການລວມສູນປະຊາທິປະໄຕ, ຖືກຕ້ອງສອດຄ່ອງກັບມາດຖານເງື່ອນໄຂທີ່ກໍານົດໄວ້ ເຊິ່ງມີຜູ້ອອກຮັບສະໝັກເລືອກຕັ້ງ 5 ສະຫາຍ, ຍິງ 1 ສະຫາຍ ແລະ ໄດ້ເປັນເອກະພາບກັນ ຮັບຮອງເອົາ ເລຂາ ຮອງເລຂາ ແລະ ປະທານກວດກາ, ດ້ວຍວິທີລົງປະຊາມະຕິ ຮັບຮອງເອົາ 3 ສະຫາຍ ຄື: ສະຫາຍ ສຸກັນ ຈັນສີປະເສີດ ເປັນເລຂາໜ່ວຍພັກ, ສະຫາຍ ພູເຂົາ ລາດຊະບັນດິດ ເປັນຮອງເລຂາ, ສ່ວນສະຫາຍ ກ້ວຍ ແກ້ວມະນີວົງ ເປັນປະທານກວດກາຄະນະພັກ.
ໂອກາດນີ້ ສະຫາຍ ບຸນສວນ ບຸດບຸນມາ ຄະນະປະຈໍາພັກເມືອງ ປະທານກວດກາພັກ-ລັດເມືອງທ່າແຕງ ໄດ້ສະແດງຄວາມຍ້ອງຍໍຊົມເຊີຍ ຕໍ່ການຊີ້ນໍາ-ນໍາພາ ຂອງຄະນະໜ່ວຍພັກຊຸດເກົ່າ ທີ່ໄດ້ຊີ້ນຳ-ນຳພາ ສະມາຊິກພັກ,ພະນັກງານໃນການຈັດຕັ້ງປະຕິບັດໜ້າທີ່ການເມືອງຂອງຕົນ, ພ້ອມນີ້ ສະຫາຍ ຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ,ຂໍ້ຄົງຄ້າງ ເຊິ່ງໄດ້ຮຽກຮ້ອງຕໍ່ຄະນະພັກຊຸດໃໝ່ ໃຫ້ສືບຕໍ່ປັບປຸງແກ້ໄຂ ໄປຕາມແນວທາງນະໂຍບາຍຂອງພັກ, ປັບປຸງອົງການຈັດຕັ້ງນັບແຕ່ຂັ້ນເມືອງລົງສູ່ຮາກຖານບ້ານ ໃຫ້ໜັກແໜ້ນ,ສ້າງເອື້ອອໍານວຍຄວາມສະດວກໃຫ້ແກ່ກອງປະຊຸມຄົບຄະນະບໍລິຫານງານພັກເມືອງທ່າແຕງ ຄັ້ງທີ 6 ທີ່ຈະມາເຖິງໃນມໍ່ໆນີ້,ຄົ້ນຄວ້າເຊື່ອມຊືມກໍາແໜ້ນມະຕິ, ຄໍາສັ່ງຂອງຂັ້ນເທິງວາງອອກ, ເພີ່ມທະວີຄວາມເປັນເອກະພາບພາຍໃນ-ພາຍນອກ ຢ່າງກວ້າງຂວາງ ໃຫ້ຄຽງຄູ່ກັບການກໍ່ສ້າງພັກ-ພະນັກງານຢູ່ພາຍໃນໜ່ວຍຂອງຕົນໃຫ້ເຂັ້ມແຂງ ໂດຍຖືເອົາວຽກງານການເມືອງແນວຄິດເປັນກົກ ເຂົ້າໃນການເຮັດວຽກງານວິຊາສະເພາະຢ່າງເລິກເຊິ່ງ,ປະຕິບັດຕາມ 3 ທິດນໍາ,3 ຂໍ້ຫ້າມ ແລະ 5 ຫຼັກການຂອງພັກວາງອອກຢ່າງເຂັ້ມງວດ. ເຊື່ອແນ່ວ່າຄະນະພັກຊຸດໃໝ່ນີ້ ຈະສືບຕໍ່ຊີ້ນຳ-ນຳພາ ຈັດຕັ້ງປະຕິບັດມະຕິກອງປະຊຸມໃຫ່ຍຂັ້ນຂອງຕົນ ໃຫ້ຍາດໄດ້ຜົນງານ ແລະ ມີຜົນສຳເລັດໃຫ້ຍິ່ງໃຫ່ຍຂື້ນກວ່າເກົ່າ.
Editor: ກຳປານາດ ລັດຖະເຮົ້າ
