ວັນທີ 11 ເມສາ 2018 ຜ່ານມາໃນນີ້ ນາຍົກລັດຖະມົນຕີ ໄດ້ອອກ ດຳລັດ ສະບັບເລກທີ 126/ນຍ ລົງວັນທີ 11 ເມສາ 2018 ວ່າດ້ວຍການສ້າງຕັ້ງນະຄອນຫຼວງພະບາງ ປ່ຽນແທນເມືອງຫຼວງພະບາງ ເຊິ່ງເປັນອົງການປົກຄອງທ້ອງຖິ່ນຂັ້ນດຽວກັນກັບຂັ້ນເມືອງ ຂຶ້ນກັບແຂວງຫຼວງພະບາງ ມີເນື້ອທີ່ທັງໝົດ 761 ກິໂລຕາແມັດ, ປະກອບມີ 114 ບ້ານ ແລະ ມີພົນລະເມືອງທັງໝົດ 97.760 ຄົນ ຍິງ 48.167 ຄົນ.
ດໍາລັດ ສະບັບເລກທີ 127/ນຍ ລົງວັນທີ 11 ເມສາ 2018 ວ່າດ້ວຍການສ້າງຕັ້ງນະຄອນໄກສອນ ພົມວິຫານ ປ່ຽນແທນເມືອງໄກສອນພົມວິຫານ ເຊິ່ງເປັນອົງການປົກຄອງທ້ອງຖິ່ນຂັ້ນດຽວກັນກັບຂັ້ນເມືອງ ຂຶ້ນກັບແຂວງສະຫວັນນະເຂດ ມີເນື້ອທີ່ທັງໝົດ 776 ກິໂລຕາແມັດ, ປະກອບມີ 67 ບ້ານ ແລະ ມີພົນລະເມືອງທັງໝົດ 125.726 ຄົນ ຍິງ 63.713 ຄົນ.
ດໍາລັດວ່າດ້ວຍການສ້າງຕັ້ງນະຄອນປາກເຊ ສະບັບເລກທີ 128/ນຍ ລົງວັນທີ 11 ເມສາ 2018 ມາດຕາ 1 ສ້າງຕັ້ງນະຄອນປາກເຊ ປ່ຽນແທນເມືອງປາກເຊ ເຊິ່ງເປັນອົງການປົກຄອງທ້ອງຖິ່ນຂັ້ນດຽວກັນກັບເມືອງ ຂຶ້ນກັບແຂວງຈຳປາສັກ ມີເນື້ອທີ່ທັງໝົດ 125 ກິໂລຕາແມັດ, ປະກອບມີ 42 ບ້ານ ແລະ ມີພົນລະເມືອງທັງໝົດ 81.579 ຄົນ ຍິງ 42.021 ຄົນ.
ມາໃນວັນທີ 15 ເມສາ 2018 ກໍ່ໄດ້ມີພິທີປະກາດເມືອງຫຼວງພະບາງ ເປັນ ນະຄອນຫຼວງພະບາງຢ່າງເປັນທາງການ ໂດຍການເຂົ້າຮ່ວມຂອງ ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປລາວ ໂດຍມີການນໍາຂັນສູງ ແລະ ແຂວງ ເຂົ້າຮ່ວມຢ່າງພ້ອມພຽງ.
ສຳລັບເງື່ອນໄຂການສ້າງຕັ້ງນະຄອນທີ່ກຳນົດໄວ້ໃນກົດໝາຍວ່າດ້ວຍການປົກຄອງທ້ອງຖິ່ນ ມາດຕາ 63 ( ໃໝ່ ) ໄດ້ລະບຸໃນການສ້າງຕັ້ງນະຄອນ ຕ້ອງມີເງື່ອນໄຂຄົບຖ້ວນ ດັ່ງນີ້:ເປັນເມືອງ ຫຼື ເທສະບານທີ່ມີພົນລະເມືອງຕັ້ງແຕ່ 60 ພັນຄົນຂຶ້ນໄປ ແລະ ຢູ່ພາຍໃນພື້ນທີ່ຕົວເມືອງ ຫຼື ຕົວເທສະບານ 25 ພັນຄົນຂຶ້ນໄປ. ມີຄວາມໜາແໜ້ນຂອງພົນລະເມືອງພາຍໃນພື້ນທີ່ຕົວເມືອງ ຫຼື ຕົວເທສະບານ ເຊິ່ງເປັນທີ່ຕັ້ງຂອງອົງການປົກຄອງເມືອງ ຫຼື ເທສະບານຕັ້ງແຕ່ 900 ຄົນຂຶ້ນໄປຕໍ່ກິໂລຕາແມັດມີຈຳນວນຜູ້ປະກອບອາຊີບເປັນກະສິກອນຢູ່ພາຍໃນພື້ນທີ່ຕົວເມືອງ ຫຼື ຕົວເທສະບານ ເຊິ່ງເປັນທີ່ຕັ້ງຂອງອົງການປົກຄອງເມືອງ ຫຼື ເທສະບານບໍ່ເກີນ 25% ຂອງຈຳນວນພົນລະເມືອງທັງໝົດທີ່ຢູ່ພາຍໃນພື້ນທີ່ຕົວເມືອງ ຫຼື ຕົວເທສະບານດັ່ງກ່າວ. ມີພື້ນຖານໂຄງລ່າງດ້ານເສດຖະກິດ, ວັດທະນະທຳ – ສັງຄົມທີ່ໄດ້ຮັບການພັດທະນາໃນລະດັບສູງ ແລະ ເປັນລະບົບຄົບຊຸດ.
ເປັນບ້ານພັດທະນາທັງໝົດ.ກຸ້ມຕົນເອງດ້ານລາຍຈ່າຍບໍລິຫານປົກກະຕິ ແລະ ມີສ່ວນແຮໄວ້ເພື່ອການລົງທຶນ.ທ່ານ ວົງສະຫວັນ ເທບພະຈັນ ຮອງເຈົ້າແຂວງໆຫຼວງພະບາງ ກ່າວໃນພິທີປະກາດສ້າງຕັ້ງນະຄອນຫຼວງພະບາງ ວ່າ: ທົ່ວນະຄອນມີພົນລະເມືອງທັງໝົດ 97.760 ຄົນ ຍິງ 48.167 ຄົນ, ມີເນື້ອທີ່ທັງໝົດ 761 ກິໂລຕາແມັດ, ຄວາມໜາແໜ້ນຂອງປະຊາກອນທົ່ວນະຄອນມີ 137 ຄົນຕໍ່ກິໂລຕາແມັດ; ສຳລັບເນື້ອທີ່ໃນຕົວນະຄອນມີ 80,55 ກິໂລຕາແມັດ, ມີພົນລະເມືອງ 72.812 ຄົນ, ຄວາມໜາແໜ້ນຂອງປະຊາກອນມີ 908 ຄົນຕໍ່ກິໂລຕາແມັດ, ມີຜູ້ປະກອບອາຊີບເປັນຊາວກະສິກອນຢູ່ພາຍໃນພື້ນທີ່ຕົວນະຄອນ 5%, ບັນດາເສັ້ນທາງສາຍຫຼັກ, ເສັ້ນທາງຮ່ອມເປັນທາງປູຢາງກວມເອົາ 90%, ທຸກຄອບຄົວໄດ້ຊົມໃຊ້ສາທາລະນູປະໂພກ 100%; ລວມຍອດຜະລິດຕະພັນໃນນະຄອນ ບັນລຸ 1.782,85 ຕື້ກີບ, ສະເລ່ຍລາຍຮັບໃສ່ພົນລະເມືອງໄດ້ 17.451.000 ກີບ ຫຼື ເທົ່າກັບ 2.401 ໂດລາ/ຄົນ/ປີ, ສາມາດກຸ້ມຕົນເອງດ້ານລາຍຈ່າຍບໍລິຫານກົງຈັກ ແລະ ມີສ່ວນແຮໄວ້, ທຸກບ້ານໃນຕົວນະຄອນໄດ້ຮັບຮອງເປັນບ້ານພັດທະນາ 100%.
Editor: ກຳປານາດ ລັດຖະເຮົ້າ
