ເມື່ອບໍດົນມານີ້, ຄະນະນໍາຂັ້ນສູງ ນະຄອນລາວກ່າຍ ແຂວງລາວກ່າຍ ແຫ່ງ ສາທາລະພນະລັດ ສັງຄົມນິຍົມ ຫວຽດນາມ ໄດ້ເດີນທາງເຂົ້າມາພົບປະຢ້ຽມຢາມ ແລະ ເຮັດວຽກຢູ່ເມືອງໄຊ ແຂວງອຸດົມໄຊ ເຊິ່ງນຳໂດຍ ທ່ານ ມ່າຍ ດິ່ງດິ້ງ ຄະນະປະຈໍາພັກແຂວງ, ເລຂາພັກ, ປະທານສະພາປະຊາຊົນ ນະຄອນລາວກ່າຍ, ໂອກາດດັ່ງກ່າວ ໄດ້ມີບັນດາການນໍາເມືອງໄຊ ເຊິ່ງນໍາໂດຍ ທ່ານ ຄໍາແພງ ຂັນມະນີ ກໍາມະການພັກແຂວງ, ເລຂາພັກເມືອງເຈົ້າເມືອງໆ ໄຊ.

ການພົບປະຢ້ຽມຢາມ ເຊິ່ງກັນແລະກັນ ລະຫວ່າງ ສອງຝ່າຍໃນຄັ້ງນີ້ ກໍເພື່ອປະຕິ ບັດຕາມບົດບັນທຶກຊ່ວຍຈຳ ລະຫວ່າງ ນະຄອນລາວກ່າຍ ກັບ ເມືອງໄຊ ກ່ຽວກັບ ການແລກປ່ຽນບົດຮຽນ ຮ່ວມກັນ ທັງເປັນການເພີ່ມທະວີການພົວພັນຮ່ວມມືຮອບດ້ານ ແລະ ຄວາມສາມັກຄີແບບພິເສດ ໃຫ້ນັບມື້ນັບແໜ້ນແຟ້ນຍິ່ງຂຶ້ນກວ່າເກົ່າ. ໃນນັ້ນ ທັງສອງຝ່າຍໄດ້ເຂົ້າຮ່ວມກອງປະຊຸມ ໂດຍຮັບຟັງການລາຍງານສະພາບລວມໃນການພັດທະນາເສດຖະກິດ-ສັງຄົມ ໃນໄລຍະຜ່ານມາ ເປັນຕົ້ນແມ່ນໄດ້ຍົກໃຫ້ເຫັນເຖິງວຽກງານ 3 ສ້າງ, ການທ່ອງທ່ຽວ,ອຸດສາຫະກຳ ການຄ້າ, ຄົມມະນາຄົມຂົນສົ່ງ,ວຽກງານປ້ອງກັນຊາດ ປ້ອງກັນຄວາມສະຫງົບ ແລະ ການພົວພັນຮ່ວມມື ທັງພາຍໃນ ແລະ ຕ່າງປະເທດ ຈາກນັ້ນ ທັງສອງຝ່າຍໄດ້ມີພິທີເຊັບບົດບັນທຶກການຮ່ວມມື ເຊິ່ງກັນ ແລະ ກັນ ລະຫວ່າງ ນະຄອນລາວກ່າຍ ກັບ ເມືອງໄຊ, ແຂວງອຸດົມໄຊ ໂດຍຝ່າຍ ລາວ ແມ່ນທ່ານ ຄໍາແພງ ຂັນມະນີ ເຈົ້າເມືອງໆ ໄຊ, ສ່ວນຝ່າຍ ຫວຽດນາມ ແມ່ນ ທ່ານ ມ່າຍ ດິ່ງດິ້ງ ປະທານສະພາປະຊາຊົນ ນະຄອນລາວກ່າຍ ເຊິ່ງມີຄະນະນໍາທັງສອງຝ່າຍເປັນສັກຂີພິຍານ

ສຳຫຼັບເນື້ອໃນບົດບັນທຶກ ການຮ່ວມມື ແລະ ແລກປ່ຽນບົດຮຽນດັ່ງກ່າວ ປະກອບມີວຽກງານດ້ານການເມືອງ, ເສດຖະກິດ, ວັດທະນາທຳ-ສັງຄົມ ແລະ ວຽກງານ ປກຊ - ປກສ.

ຫລັງຈາກນັ້ນ, ທາງຄະນະນໍາ ນະຄອນລາວກ່າຍ ແລະ ເມືອງໄຊ ໄດ້ເຂົ້າພົບ ທ່ານ ຮອງເຈົ້າແຂວງອຸດົມໄຊ ເພື່ອລາຍງານຈຸດປະສົງຂອງການເຄື່ອນໄຫວພົບປະ, ຢ້ຽມຢາມ ແລະ ເຮັດວຽກຢູ່ແຂວງອຸດົມໄຊ ໃນຄັ້ງນີ້

Editor: ກຳປານາດ ລັດຖະເຮົ້າ