ໃນວັນທີ 19 ເມສາ 2018 ນີ້, ທີ່ຫ້ອງຮັບແຂກ ກະຊວງແຮງງານ ແລະ ສະຫວັດດີການສັງຄົມ, ທ່ານ ປອ ຄໍາແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ພ້ອມຄະນະ, ໄດ້ຕ້ອນຮັບ ການເຂົ້າຢຽ້ມຂ່ຳນັບຂອງ ທ່ານ ເຈນ ເບີເນີດ ຄາຣຣັສໂກ (Jean-Bernard Carrasco) ເອກອັກຄະຣັດຖະທູດແຫ່ງ ອົດສະຕຣາລີ ປະຈຳ ສປປ ລາວ ຜູ້ໃຫມ່ໃນໂອກາດທີ່ ທ່ານໄດ້ມາດຳລົງຕຳແໜ່ງ ເປັນເອກອັກຄະຣັດຖະທູດ ຄົນໃໝ່ ປະຈຳ ສປປ ລາວ.

ໃນໂອກາດນີ້, ທ່ານ ປອ ຄໍາແພງ ໄຊສົມແພງ ໄດ້ສະແດງຄວາມຍ້ອງຍໍ ຊົມເຊີຍ ແລະ ຕີລາຄາສູງ ທີ່ ທ່ານ Jean-Bernard Carrasco ໄດ້ມາດຳລົງຕຳແໜ່ງເປັນເອກອັກຄະຣັດຖະທູດ ຄົນໃໝ່ ປະຈຳ ສປປ ລາວ ໃນຄັ້ງນີ້ ເຊິ່ງເປັນການປະກອບສວ່ນອັນສຳຄັນເຂົ້າໃນການຮັດແໜ້ນ ແລະ ເສີມສ້າງສາຍພົວພັນການຮວ່ມມື ແລະ ຊ່ວຍເຫຼືອຊຶ່ງກັນ ແລະ ກັນ ລະຫວ່າງ ສປປ ລາວ ກັບ ອົດສະຕຣາລີ ໃຫ້ນັບມື້ເພີ່ມພູນຄູນສ້າງຍິ່ງໆຂຶ້ນ, ພ້ອມທັງອວຍພອນໃຫ້ ທ່ານທູດ ຈົ່ງປະສົບຜົນສຳເລັດໃນການດຳລົງຕຳແໜ່ງເປັນນັກການທູດ ແລະ ເສີມຂະຫຍາຍສາຍພົວພັນ ລະຫວ່າງ ລາວ-ອົດສະຕຣາລີ ໃຫ້ນັບມື້ແໜ້ນແຟ້ນ ແລະ ຂະຫຍາຍຕົວ ຢ່າງບໍ່ຢຸດຢັ້ງ, ພ້ອມນີ້ ທ່ານ ລັດຖະມົນຕີ ຍັງໄດ້ລາຍງານໃຫ້ຊາບ ໂດຍຫຍໍ້ກຽວກັບ ການຮ່ວມມືກັນໄລຍະຜ່ານມາ ຂອງສອງ ລັດຖະບານ ເວົ້າລວມ, ເວົ້າສະເພາະ ກໍຄື ກະຊວງແຮງງານ ແລະ ສະຫວັດດີການສັງຄົມ ແລະ ລັດຖະບານອົດສະຕຣາລີ,

ທ່ານ ເອກອັກຄະຣັດຖະທູດ ກໍໄດ້ສະແດງຄວາມ ຂອບໃຈຕໍ່ ທ່ານລັດຖະມົນຕີ ກະຊວງ, ທີ່ໄດ້ໃຫ້ການ ຕ້ອນຮັບຢ່າງອົບອຸ່ນ ແລະ ກ່າວຢືນຢັນວ່າຈະຕັ້ງໜ້າປະຕິບັດໜ້າທີ່ອັນມີກຽດ ເຂົ້າໃນການເພີ່ມທະວີການພົວພັນ ຮ່ວມມື ລະຫວ່າງ ລາວ -ອົດສະຕຣາລີ ໃຫ້ເກີດດອກອອກຜົນຢິ່ງໆຂື້ນ

Editor: ກຳປານາດ ລັດຖະເຮົ້າ