"ສະຫະພັນແມ່ຍິງລາວ ແລະ ສະຫະພັນແມ່ຍິງ ສສ ຫວຽດນາມ ແລກປ່ຽນບົດຮຽນເຊິ່ງກັນ ແລະ ກັນ"

ສູນກາງສະຫະພັນແມ່ຍິງລາວ ແລະ ສະຫະພັນແມ່ຍິງ ສາທາລະນະລັດ ສັງຄົມນິຍົມ ຫວຽດນາມ ຮ່ວມກັນຈັດກອງປະຊຸມສຳມະນາແລກປ່ຽນບົດຮຽນເຊິ່ງກັນ ແລະ ກັນ. ຂື້ນໃນວັນທີ 26 ກໍລະກົດ 2016 ທີ່ຜ່າມານີ້ ທີ່ສູນກາງສະຫະພັນແມ່ຍິງລາວ ໂດຍການເປັນປະທານຂອງ ທ່ານນາງ ບັນດິດ ປະທຸມວັນ ຮອງປະທານຄະນະບໍລິຫານງານສູນກາງສະຫະພັນແມ່ຍິງ, ທ່ານນາງ ຫງວຽນ ທິ ແທງ ຮວາ ອາດີດປະທານສະຫະພັນແມ່ຍິງ ສສ ຫວຽດນາມ ພ້ອມດ້ວຍຄະນະບໍລິຫານງານ, ຄະນະປະທານ, ຄະນະຫ້ອງການກົງສຸນ ແລະ ບັນດາພະນັກງານສູນກາງສະຫະພັນແມ່ຍິງລາວ, ພ້ອມດ້ວຍແຂກທີ່ຖືກເຊີນເຂົ້າຮ່ວມ.

ປະຕິບັດຕາມບົດບັນທຶກການຮ່ວມມື ລະຫວ່າງ ສູນກາງສະຫະພັນແມ່ຍິງລາວ ແລະ ສະຫະພັນແມ່ຍິງ ສສ ຫວຽດນາມ ກ່ຽວກັບການບຳລຸງ ແລະ ກໍ່ສ້າງພະນັກງານ ໃນໄລຍະ 2012-2017 ຈຶ່ງໄດ້ຈັດກອງປະຊຸມສຳມະນາແລກປ່ຽນບົດຮຽນ ກ່ຽວກັບ ການພັດທະນາແມ່ຍິງ-ສະຫະພັນແມ່ຍິງ ສສ ຫວຽດນາມ ແມ່ນໄດ້ດຳເນີນເປັນເວລາ 2 ວັນ, ແຕ່ວັນທີ 26-27 ກໍລະກົດ 2016 ນີ້ ເພື່ອເປັນການຮັດແໜ້ນຄວາມສາມັກຄີຮັກແພງແບບພິເສດ ລະຫວ່າງ ສູນກາງສະຫະພັນແມ່ຍິງລາວ ແລະ ສະຫະພັນແມ່ຍິງ ສສ ຫວຽດນາມ. ເພື່ອແລກປ່ຽນບົດຮຽນ ແລະ ປະສົບການ ໃນການຈັດຕັ້ງປະຕິບັດວຽກງານການພັດທະນາແມ່ຍິງໂດຍສະເພາະວຽກງານການພັດທະນາແມ່ຍິງ ກັບການສ້າງອາຊີບໃຫ້ແມ່ຍິງ, ການບໍລິຫານຄຸ້ມຄອງກອງທຶນສຳລັບແມ່ຍິງ ແລະ ກໍ່ສ້າງບຳລຸງພະນັກງານເພດຍິງ.

ນອກນັ້ນ ທັງສອງຝ່າຍ ລະຫວ່າງ ສູນກາງສະຫະພັນແມ່ຍິງລາວ ແລະ ສະຫະພັນແມ່ຍິງ ສສ ຫວຽດນາມ, ຍັງສືບຕໍ່ສົນທະນາແລກປ່ຽນບົດຮຽນ ແລະ ຖ່າຍທອດຄວາມຮູ້ເຊິ່ງກັນ ແລະ ກັນໃນຫລາຍວຽກງານ ທີ່ພົວພັນເຖິງການພັດທະນາເອື້ອຍນ້ອງແມ່ຍິງ ທັງສອງພາກສ່ວນ.