ຊຸດອົບຮົມທິດສະດີການເມືອງ-ການປົກຄອງ ໄລຍະສັ້ນ 45 ວັນ, ຂອງມະຫາວິທະຍາໄລວິທະຍາສາດສຸຂະພາບ (ມວສ) ໄດ້ເປີດຂື້ນຢ່າງເປັນທາງການ ໃນວັນທີ 23 ເມສາ 2018 ທີ່ຫ້ອງປະຊຸມ ມວສ, ໂດຍການເປັນປະທານ ມີ ທ່ານ ດຣ, ນາງ ແສງຈ້ອຍ ປັນຍາວົງ ຄະນະປະຈໍາພັກກະຊວງ, ຫົວຫນ້າກົມຈັດຕັ້ງ-ພະນັກງານ ກະຊວງສາທາລະນະສຸກ, ທ່ານ ດຣ, ບຸນຖົມ ຊາມົນຕຣີ ຮອງອະທິການບໍດີ ມະຫາວິທະຍາໄລ ວິທະຍາສາດສຸຂະພາບ (ມວສ) ນອກຈາກນີ້ ຍັງມີຜູ້ຕາງຫນ້າສະຖາບັນ, ພະນັກງານວິຊາການ, ຄູອາຈານ ແລະ ນັກສໍາມະນາກອນ ທີ່ເຂົ້າຮ່ວມອົບຮົມໃນຄັ້ງນີ້ ເຂົ້າຮ່ວມ.

ຊຸດອົບຮົມທິດສະດີການເມືອງ-ການປົກຄອງ ໄລຍະສັ້ນ 45 ວັນ, ໃຫ້ແກ່ສະມາຊິກ ພັກ-ພະນັກງານຫລັກແຫລ່ງອ້ອມຂ້າງ ມະຫາວິທະຍາໄລ ວິທະຍາສາດສຸຂະພາບ ລຸ້ນທີ 1 ນີ້ ແມ່ນເລີ່ມນັບແຕ່ວັນທີ 23 ເມສາ ໄປຈົນເຖິງວັນທີ 26 ມີຖຸນາ 2018 ໂດຍມີຈຸດປະສົງ ເພື່ອປະກອບຄວາມຮູ້ພື້ນຖານທາງດ້ານທິດສະດີການເມືອງ, ເປັນຕົ້ນແມ່ນຫລັກມູນພື້ນຖານຂອງທິດສະດີ ມາກ-ເລນິນ, ຍົກສູງທິດສະດີການເມືອງຫລັກຫມັ້ນ ແລະ ທັດສະນະຊົນຊັ້ນກໍາມະກອນ, ຮູ້ຈໍາແນກມິດ ແລະ ສັດຕູ, ເຊື່ອຫມັ້ນຕໍ່ການນໍາພາຂອງພັກ ກໍ່ຄືຈຸດຫມາຍການພັດທະນາປະເທດເຮົາ. ເປັນການຝຶກຝົນຫລໍ່ຫລອມ ຄູນທາດການເມືອງ, ຄຸນສົມບັດ ສິນທໍາປະຕິວັດ, ສ້າງແບບແຜນການດໍາລົງຊີວິດໃຫ້ປອດໃສ-ຂາວສະອາດ, ຍົກສູງສະຕີລະວັງຕົວ ຕໍ່ທຸກເລ່ກົນອຸບາຍ, ຍຸດທະສາດຫັນປ່ຽນໂດຍສັນຕີຂອງສັດຕູ, ເປັນການກຽມພ້ອມຮັບໃຊ້ຊາດ, ຮັບໃຊ່ປະຊາຊົນ ແລະ ປະຕິບັດສອງຫນ້າທີ່ຍຸດທະສາດ ໃຫ້ສໍາເລັດຜົນ. ຊຸດອົບຮົມຄັ້ງນີ້ ຍັງເປັນການເຊື່ອມຊືມ ແລະ ກໍາແຫນ້ນແນວທາງນະໂຍບາຍຂອງພັກ ເປັນຕົ້ນການປ່ຽນແປງໃຫມ່ຮອບດ້ານ ທີ່ມີຫລັກການຂອງພັກ, ແຜນນະໂຍບາຍຂອງພັກ ເພື່ອນໍາໄປຜັນຂະຫຍາຍ ແລະ ຈັດຕັ້ງປະຕິບັດໃນຂົງເຂດຫນ່ວຍງານ ໃຫ້ເກີດດອກອອກຜົນ ທັງເປັນການຕ້ານທັດສະນະ ບິດເບືອນ ຕ່າງໆ.

ການຝຶກອົບຮົມທີດສະດີການເມືອງ-ການປົກຄອງ ໄລຍະສັ້ນ 45 ວັນ ຊຸດທີ1 ປະຈໍາປີ 2018 ໄດ້ຮັບການຊີ້ນນໍາ ຢ່າງໃກ້ຊິດ ຕາກຄະນະນໍາກະຊວງສາທາລະນະສຸກ ແລະ ໄດ້ຮັບການຮ່ວມມືຈາກຄະນະວິໍາການ ແລະ ຄູອາຈານຈາກສະຖາບັນການເມືອງ-ການປົກຄອງແຫ່ງຊາດ. ສ່ວນເນື້ໃນທີ່ນໍາມາອົບຮົມ ໃນຊຸດທີ 1 ປີ 2018 ນີ້, ໄດ້ຄົ້ນຄວ້າຮໍ່າຮຽນຕາມຫລັກສູດການຝຶກອົບຮົມໄລຍະສັ້ນ ລວມ 315 ຊົ່ວໂມງ, ໃນ 5 ກຸ່ມວິຊາທິດສະດີ ລວມ 39 ບົດ ເປັນຕົ້ນ:
- ພາກວິຊາປັດສະຍາ ມີ 8 ບົດ,
- ພາກວິຊາເສດຖະສາດການເມືອງ ມີ 10 ບົດ,
- ພາກວິຊາລັດທະສັງຄົມສາດ ມີ 8 ບົດ,
- ພາກວິຊາບໍລິຫານສາດ ມີ 8 ບົດ,
- ພາກວິີຊາກໍ່ສ້າງພັກ ມີ 5 ບົດ. ນອກນີ້ຍັງມີມະຕີຕ່າງໆ ທີ່ກ່ຽວຂ້ອງກັບຂະແຫນງສາທາລະນະສຸກ ຈໍານວນຫນຶ່ງ.

Editor: ກຳປານາດ ລັດຖະເຮົ້າ