ທ່ານ ສີສຸວັນ ວົງຈອມສີ ເຈົ້າແຂວງສາລະວັນ ພ້ອມຄະນະ ໄດ້ຕ້ອນຮັບການມາຢ້ຽມ ຢາມພົບປະເຮັດວຽກຂອງ ທ່ານ ເລ ມິງ ຮວນ ກໍາມະການສູນກາງພັກ ເລຂາພັກແຂວງດົງຖາບ ສສ ຫວຽດນາມ ພ້ອມຄະນະ ໃນວັນທີ 24 ເມສາ ຜ່ານມານີ້ ຢູ່ແຂວງສາລະວັນ ຊຶ່ງມີບັນດາຫົວໜ້າພະແນກການ, ອົງການທຽບເທົ່າອ້ອມຂ້າງແຂວງເຂົ້າຮ່ວມ.
ການພົບປະຄັ້ງນີ້ ທັງສອງຝ່າຍກໍ່ໄດ້ຜັດປ່ຽນກັນລາຍງານສະພາບການພັດທະນາຂອງແຂວງ, ຈຸດພິເສດ ແລະ ທ່າແຮງບົ່ມຊ້ອນຕ່າງໆ, ການຊ່ວຍເຫຼືອ, ການພົວພັນຮ່ວມມືຮອບດ້ານອັນແໜ້ນແກ່ນ ເພື່ອເປັນການເພີ່ມພູນຄູນສ້າງມິດຕະພາບອັນຍິ່ງໃຫຍ່ ແລະ ຄວາມສາມັກຄີແບບພິເສດຂອງສອງຊາດ ລາວ-ຫວຽດນາມ ເວົ້າສະເພາະ ກໍ່ຄື ແຂວງສາ ລະວັນ ກັບ ແຂວງດົງຖາບ ໃຫ້ນັບມື້ນັບເພີ່ມທະວີຂຶ້ນຢ່າງບໍ່ຢຸດຢັ້ງ. ໂດຍສະເພາະ ໄລ ຍະຜ່ານມາ ຄະນະນຳທັງສອງແຂວງ ກໍ່ໄດ້ມີການພົບປະແລກປ່ຽນບົດຮຽນວຽກງານໃນແຕ່ລະດ້ານຮ່ວມກັນ ແຂວງດົງຖາບ ໄດ້ໃຫ້ການຊ່ວຍເຫຼືອໃນຫຼາຍຂົງເຂດວຽກງານເປັນຕົ້ນ: ຊ່ວຍເຫຼືອດ້ານວິຊາການໆປູກຝັງ, ລ້ຽງສັດ ແລະ ການສ້າງຊັບພະຍາກອນມະນຸດ, ຊຶ່ງການຮ່ວມມືໄລຍະ 5 ປີຜ່ານມາ ເປັນພື້ນຖານທີ່ສຳຄັນຕໍ່ກັບການຮ່ວມມື ແລະ ການພັດທະນາສອງແຂວງໃນຕໍ່ໜ້າ.
Editor: ນັກຂ່າວແຂວງສາລະວັນ
