"(ສຄອ) ຈັດຕັ້ງເຊື່ອມຊຶມມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ"
ໃນຕອນເຊົ້າວັນທີ 27 ກໍລະກົດ 2016 ນີ້, ຢູ່ທີ່ໂຮງແຮມດອນຈັນພາເລດ, ນະຄອນຫລວງວຽງຈັນ ສະພາການຄ້າ ແລະ ອຸດສາຫະກຳແຫ່ງຊາດລາວ, ພ້ອມດ້ວຍບັນດາສະມາຄົມ, ກຸ່ມຫົວຫນ່ວຍທຸລະກິດ ໃນຂອບເຂດທົ່ວປະເທດ ໄດ້ເຂົ້າຮັບຟັງການເຊື່ອມຊຶມມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ, ຫລື (ມະຕິ 10 ຂອງພັກ) ເພື່ອແນ່ໃສ່ເຮັດໃຫ້ບັນດາກຸ່ມຜູ້ປະກອບການໃນພາກທຸລະກິດ ໄດ້ຮັບຮູ້ ແລະ ເຂົ້າໃຈຢ່າງເລີກເຊີ່ງຕໍ່ແນວທາງການເມືອງ ແລະ ແຜນນະໂຍບາຍຂອງພັກ ທີ່ໄດ້ກຳນົດໄວ້ໃນກອງປະຊຸມໃຫຍ່ ຄັ້ງທີ X ຂອງພັກ, ພ້ອມກັນກ້າວໄປສູ່ເປົ້າຫມາຍ ເປັນເຈົ້າການໃນການຈັດຕັ້ງຜັນຂະຫຍາຍໃຫ້ເກີດຫມາກຜົນຕົວຈິງໃນພາກທຸລະກິດ.
ໃຫ້ກຽດເຜີບແຜ່ເອກະສານເນື້ອໃນມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ຄັ້ງນີ້, ໂດຍ "ທ່ານ ພັນຄຳ ວິພາວັນ" ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ. ເຊື່ງທ່ານໄດ້ຍົກໃຫ້ເຫັນສະພາບບົດບາດການນຳພາອັນສະຫລາດສ່ອງໃສຂອງພັກ ແນວທາງການປ່ຽນແປງໃຫມ່ຮອບດ້ານ ແລະ ມີຫລັກການຂອງພັກ, ບັນດາຜົນງານ ແລະ ຜົນສຳເລັດອັນຍິ່ງໃຫຍ່ໃນການຈັດຕັ້ງປະຕິບັດ ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ IX ຂອງພັກ ໃນໄລຍະ 5 ປີທີ່ຜ່ານມາ. ພ້ອມທັງໄຈແຍກພາວະຄວາມເປັນຈິງຂອງພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມທັດສະນະຂອງພັກ, ເພື່ອເຫັນແຈ້ງ ແລະ ເຂົ້າໃຈຢ່າງເລີກເຊີ່ງຕໍ່ບັນຫາຕ່າງໆ ການຕິລາຄາຈຸດດີ-ຈຸດອ່ອນ ແລະ ຂໍ້ຄົງຄ້າງ. ເຂົ້າໃຈຈະແຈ້ງ ແລະ ກຳແຫນ້ນບັນຫາຕົວຈິງ ທີ່ຕ້ອງແກ້ໄຂຢ່າງຮິບດ່ວນ ໃນຖັນແຖວພະນັກງານລັດຖະກອນຂອງລັດ ກໍ່ຄືຖັນແຖວພາກທຸລະກິດ ເພື່ອຮັບປະກັນໃນການບຸກທະລຸ ດ້ານແນວຄິດຈິນຕະນາການ, ກ້າວສູ່ການກະທຳຕົວຈິງ ໃຫ້ມີການປ່ຽນແປງຈະແຈ້ງ, ສ້າງຄວາມພ້ອມແກ່ການແກ້ໄຂບັນຫາຕ່າງໆ. ພ້ອມກັນນັ້ນ ທັງພາກລັດ ແລະ ພາກທຸລະກິດ ຕ້ອງສ້າງບາດລ້ຽວໃນການພັດທະນາປະເທດ, ນຳເອົາປະເທດຊາດຫລຸດພົ້ນອອກຈາກສະພາວະດ້ອຍພັດທະນາ ໃນປີ 2030 ສ້າງພື້ນຖານອັນຫນັກແຫນ້ນແກ່ການພັດທະນາແບບຢືນຍົງສູ່ຈຸດຫມາຍສັງຄົມນິຍົມ. ສິ່ງສຳຄັນເປັນການສະແດງເຖິງຄວາມຕັດສິນໃຈຂອງພັກ ທີ່ຈະພ້ອມກັນຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍທົດສອບຕ່າງໆຢ່າງກ້າຫານເດັດຂາດ. ພ້ອມກັນນັ້ນ ທ່ານ ຮອງປະທານປະເທດ ຍັງໄດ້ຍົກໃຫ້ເຫັນເຖິງບັນດາທິດທາງວຽກງານຈຸດສຸມ ໄລຍະ 2016-2020, ບັນດາຄາດຫມາຍສູ້ຊົນ5 ປີຕໍ່ຫນ້າ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8 ຂອງລັດ ໃຫ້ປະກົດຜົນເປັນຈິງ.
