ເພື່ອລະນຶກເຖີງສາຍສຳພັນລາວ-ຫວຽດນາມໃນເມື່ອກ່ອນ ກໍ່ຄື ປະຈຸບັນ ດັ່ງນັ້ນ ໃນວັນທີ 25 ເມສາ 2018 ນີ້ ຄະນະຜູ້ແທນ ສະມະພັນແຮງງານນະຄອນຮາຍຟ່ອງ ລົງຢ້ຽມຢາມ ຫໍສີລາຈາລືກສາຍສຳພັນສູ້ຮົບລາວ-ຫວຽດນາມ ຢູ່ເມືອງທຸລະຄົມ, ແຂວງວຽງຈັນ ໃຫ້ການຕ້ອນຮັບໃນຄັ້ງນີ້ໂດຍແມ່ນທ່ານ ນາງ ຈັນມະລີ ສຸທຳມະວົງ ປະທານກຳມະບານເມືອງທຸລະຄົມ, ພ້ອມທັງຄະນະກຳບານທົ່ວເມືອງເຂົ້າຮ່ວມ.
ໃນພິທີດັ່ງກ່າວ ພັນໂທ ໂຊນີ ອຸດົມສັກ ໄດ້ໃຫ້ກຽດຂື້ນເລົ່າປະຫວັດຄວາມເປັນມາຂອງການສ້າງຫໍສີລາຈາລຶກ ສາຍພົວພັນສູ້ຮົບ ລະຫວ່າງ ລາວ-ຫວຽດນາມ ທີ່ມີຈິດໃຈໜື່ງດຽວພ້ອມກັນສູ້ຮົບເສຍສະຫລະເລືອດເນື້ຶອເພື່ອປະຊາຊົນໃນສະໄໝກ່ອນ ການມາໃນຄັ້ງນີ້ໂດຍພາຍໃຕ້ການນຳພາຂອງ ທ່ານ ຟາມ ຮີວ ທິ, ຄະນະບໍລິຫານງານສະຫະພັນກຳມະບານ, ກຳມະການພັກນະຄອນ, ປະທານສະຫະພັນແຮງງານ ນະຄອນຮາຍຟ່ອງ ພ້ອມຄະນະ 13 ທ່ານ ຍິງ 5 ທ່ານໃນພິທີແມ່ນໄດ້ຈຸດທູບບູຊາເພື່ອລະນຶກເຖີງບຸນຄຸນແກ່ນັກຮົບ ລາວ-ຫວຽດນາມ ທີ່ເສຍສະຫຼະຊີວິດຢູ່ສະໜາມຮົບເມືອງທຸລະຄົມໃນສະໄໝຕໍ່ສູ້ກູ້ຊາດ ຕ້ານພວກລາເມືອງຂື້ນແບບເກົ່າ ແລະ ແບບ ໃໝ່ໃນຊຸມປີ 1945 – 1946 ເຊີ່ງເມື່ອກ່ອນເອີ້ນວ່າກອງພັນ ແປດສິບສາມ 83 ເປັນກອງພັນປະສົມທະຫານ ລາວ-ຫວຽດນາມ ທີ່ຈັດຕັ້ງຂື້ນຢູ່ນະຄອນຫລວງວຽງວຽງຈັນ ຈາກນັ້ນ ກໍ່ໄດ້ມາຕໍ່ສູ້ຢູ່ສະໜາມຮົບບ້ານເກິນ, ເມືອງທຸລະຄົມ ພາຍຫລັງສູ້ຮົບມີທະຫານລາວເສຍຊີວິດ 2 ສະຫາຍ, ທະຫານຫວຽດນາມ 25 ສະຫາຍ, ທະຫານຍີ່ປຸ່ນ 1 ສະຫາຍ ແລະ ທະຫານຝຮັ່ງ 42 ສະຫາຍ ຈາກນັ້ນ ພໍ່ແມ່ປະຊາຊົນຢູ່ເຂດບ້ານເກິນກາງ ແລະ ບ້ານອ້ອມຂ້າງ ຈື່ງໄດ້ຮີບໂຮມເອົາທະຫານທີ່ເສຍຊີວິດຈຳນວນ 76 ສະຫາຍ ໃສ່ກວຽນ ແລ້ວຖອກລົງນ້ຳສ້າງ ຢູ່ຄຸ້ມໂຮງຮຽນປະຖົມບ້ານເກິນກາງ ເມືອງທຸລະຄົມ ແຂວງວຽງຈັນ ຕົກມາຮອດປີ 2011 ການນຳທັງສອງປະເທດ ຄື ລາວ-ຫວຽດນາມ ຈື່ງໄດ້ສ້າງຫໍສີລາລຶກສາຍສຳພັນສູ້ຮົບ ລາວ-ຫວຽດນາມ ຂື້ນ ເພື່ອເປັນອານຸສອນສະຖານໄວ້ໃຫ້ແກ່ຄົນລຸ້ນໃໝ່ໄດ້ຮັບຮູ້ ແລະ ເປັນບົດຮຽນອັນລ້ຳຄ່າມີຄວາມກະຕັນຍູຮູ້ບຸນຄຸນຕໍ່ວິລະບູລຸດດັ່ງກ່າວ ພ້ອມກັນປະກອບສ່ວນປົກປັກຮັກສາພັດທະນາປະເທດຊາດໃຫ້ຈະເລີນຮຸ່ງເຮືອງຕໍ່ໄປ.
ຕອນທ້າຍພິທີ ທ່ານ ຟາມ ຣີວ ທິ ໄດ້ຕາງໜ້າຄະນະຂື້ນມອບຂອງທິລະນຶກໃຫ້ກັບປະທານກຳມະບານເມືອງທຸລະຄົມ ເພື່ອເປັນຄວາມສາມັກຄີ ລະຫວ່າງຫວຽດນາມລາວ ເວົ້າລວມ ເວົ້າສະເພາະ ກໍ່ຄືເມືອງທຸລະຄົມແຂວງວຽງຈັນ ໃຫ້ມີຄວາມຮັກແໜ້ນແຟ້ນກັນ ຕື່ມອີກ.
Editor: ນັກຂ່າວເມືອງທຸລະຄົມ
