ໃນວັນທີ 27 ເມສາ 2018 ຜ່ານມານີ້, ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ ກອງເລຂາຄະນະຊີ້ນໍາລະດັບຊາດ ວ່າດ້ວຍການຈັດຕັ້ງປະຕິບັດເປົ້າຫມາຍພັດທະນາແບບຍືນຍົງ ຮ່ວມກັບອົງການສະຫະປະຊາຊາດ ໄດ້ຈັດກອງປະຊຸມປຶກສາຫາລື ກ່ຽວກັບຜູ້ມີສ່ວນຮ່ວມໃນການຈັດຕັງປະຕິບັດ ເປົ້າຫມາຍການພັດທະນາແບບຍືນຍົງ ເຊີ່ງໃຫ້ກຽດກ່າວເປີດກອງປະຊຸມ ໂດຍ ທ່ານນາງ ຄໍາເພົາ ເອີນທະວັນ ຮອງລັດຖະມົນຕີ ກະຊວງການຕ່າງປະເທດ, ພ້ອມດ້ວຍ ທ່ານນາງ ກາຣິນາ ອີມໂມເນັນ ຜູ້ປະສານງານອົງການສະຫະປະຊາຊາດ ປະຈໍາ ສປປ ລາວ, ທັງເປັນຜູ້ຕາງຫນ້າ ອົງການສະຫະປະຊາຊາດ ເພື່ອການພັດທະນາ.
ກອງປະຊຸມດັ່ງກ່າວ ມີຜູ້ເຂົ້າຮ່ວມທີ່ມາຈາກບັນດາກະຊວງ ແລະ ອົງການຈັດຕັ້ງມະຫາຊົນ ອ້ອມຂ້າງສູນກາງ, ຜູ້ຕາງຫນ້າ ຈາກ 17 ແຂວງໃນທົ່ວປະເທດ, ຕາງຫນ້າຈາກສະຖານທູດ, ອົງການເຄືອຂ່າຍສະຫະປະຊາຊາດ, ອົງການຈັດຕັ້ງສາກົນ ທີ່ບໍ່ສັງກັດລັດຖະບານ, ອົງການຈັດຕັ້ງສັງຄົມ ຈອງ ສປປ ລາວ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ 150 ທ່ານ.
ກອງປະຊຸມຄັ້ງນີ້ ແມ່ນເພື່ອປຶກສາຫາລື ແລະ ຊຸກຍູ້ໃຫ້ທຸກພາກສ່ວນ ໄດ້ປະກອບຄໍາຄີດ-ຄໍາເຫັນໃສ່ຮ່າງບົດລາຍງານແຫ່ງຊາດ ແບບສະຫມັກໃຈ ເຊີ່ງເປັນສະບັບທໍາອິດ ຂອງ ສປປ ລາວ ທີ່ຈະນໍາໄປລາຍງານຕໍ່ກອງປະຊຸມເວທີການເມືອງລະດັບສູງ ຂອງອົງການສະຫະປະຊາຊາດ ໃນກາງເດືອນກໍລະກົດ 2018 ນີ້, ທີ່ນະຄອນນິວຢອກ ສະຫາລັດອາເມລິກາ. ເນື້ອໃນຕົ້ນຕໍຂອງບົດລາຍງານດັ່ງກ່າວ ແມ່ນເປັນການລາຍງານຄວາມຄືບຫນ້າຂອງການຈັດຕັ້ງປະຕິບັດ ບັນດາເປົ້າຫມາຍການພັດທະນາແບບຍືນຍົງ ຢູ່ ສປປ ລາວ, ໂດຍຍົກໃຫ້ເຫັນເຖິງສະພາບລວມຂອງຜົນສໍາເລັດທີ່ປະຕິບັດມາໄດ້. ສິ່ງທ້າທາຍ ແລະ ທິດທາງໃນການຈັດຕັ້ງປະຕິບັດ ໃນຕໍ່ຫນ້າ, ເຊີ່ງບັນດາຜູ້ເຂົ້າຮ່ວມ ໄດ້ພ້ອມກັນປຶກສາຫາລື ແລະ ປະກອບກອບຄໍາຄິດ-ຄໍາເຫັນ ໃສ່ຮ່າງບົດລາຍງານ ຢ່າງຫ້າວຫັນ ເພື່ອໃຫ້ບົດລາຍງານສະບັບນີ້ ມີເນື້ອໃນຄົບຖ້ວນສົມບູນ ແລະ ສອດຄ່ອງກັບສະພາບຄວາມເປັນຈີງ ຂອງການພັດທະນາ ໃນ ສປປ ລາວ.
ໃນຕອນທ້າຍກອງປະຊຸມ ທ່ານນາງ ເພັດສະໝອນ ສອນ ຮອງຫົວຫນ້າສູນສະຖິຕີແຫ່ງຊາດ ໄດ້ກ່າວສະແດງຄວາມຂອບໃຈ ຕໍ່ຜູ້ເຂົ້າຮ່ວມ ທີ່ໄດ້ປະກອບຄໍາຄິດ-ຄໍາເຫັນ ຢ່າງມີລັກສະນະສ້າງສັນ ກົງໄປ-ກົງມາ. ເຊີ່ງກອງເລຂາ ຄະນະຊີ້ນໍາລະດັບຊາດ ຈະໄດ້ນໍາເອົາບັນດາຄໍາຄິດເຫັນດັ່ງກ່າວ ໄປສຶບຕໍ່ພິຈາລະນາ ດັດປັບຮ່າງບົດລາຍງານໃຫ້ສົມບູນຂື້ນຕື່ມ, ເພື່ອຂໍສະເຫນີອະນຸມັດ ຈາກລັດຖະບານ ກ່ອນທີ່ຈະສົ່ງໃຫ້ ອົງການສະຫະປະຊາຊາດ.
Editor: ກຳປານາດ ລັດຖະເຮົ້າ
