ໃນວັນທີ 26 ເມສາ 2018 ຜ່ານມານີ້ ຢູ່ທີ່ ສະໂມສອນຂອງເມືອງຫົງສາ ແຂວງໄຊຍະລີ ໄດ້ຈັດກອງປະຊຸມວຽກງານຈັດຕັ້ງກໍ່ສ້າງພັກ - ພະນັກງານ ປະຈໍາປີ 2017 ຂື້ນ ໂດຍ ການເປັນປະທານ ຂອງ ທ່ານ ຄໍາເພັດ ພົມມະລາດ ເລຂາຄະນະບໍລິຫານງານພັກເມືອງ ເຈົ້າເມືອງໆຫົງສາ,ມີຄະນະປະຈໍາພັກ ກໍາມະການພັກເມືອງ ກົມກອງທະຫານຕໍາຫຼວດ, ຫົວໜ້າຫ້ອງການ,ເລຂາຄະນະພັກຮາກຖານໂຮງຮຽນ,ບ້ານ ແລະ ສະມາຊິກພັກ ພະນັກງານອອ້ມຂ້າງເມືອງເຂົ້າທັງໝົດ ເກືອບ 130 ສະຫາຍ.
ໃນກອງປະຊຸມ ແມ່ນໄດ້ຮັບຟັງ ບົດສະຫຼຸບ ການຕີລາຄາການຈັດຕັ້ງປະຕິບັດ ວຽກງານຈັດຕັ້ງທົ່ວເມືອງຄັ້ງທີ 2 (ປີ 2017 ແລະ ທິດທາງໜ້າທີ່ ປີ 2018 ) ຈາກສະຫາຍ ທອງໂຕ້ ຈັນທະລັງມາ ກໍາມະການພັກເມືອງ, ຫົວໜ້າຄະນະຈັດຕັ້ງເມືອງ ກ່າວໂດຍຫຍໍ້ ແລະ ໄດ້ຍົກໃຫເຫັນ ດ້ານດີ, ດ້ານອ່ອນ, ຄົງຄ້າງ ແລະ ບົດຮຽນທີ່ຖອດຖອນໄດ້ ໃນໄລຍະ 1 ປີຜ່ານມາ, ພ້ອມທັງຮັບຟັງການເຜີຍແຜ່ຄໍາສັ່ງສະບັບເລກທີ 01/ກມ ສພ, ລົງວັນທີ 3 ມັງກອນ 2018 ວ່າດ້ວຍການເພີ້ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ມະຕິສະບັບເລກທີ 030/ ກມ ສພ, ລົງວັນທີ 3 ມັງກອນ 2018 ວ່າດ້ວຍມາດຕະຖານຂອງພະນັກງານນໍາພາຄຸ້ມຄອງ, ເຜີຍແຜ່ມະຕິສະບັບເລກທີ 031/ກມສພ ລົງວັນທີ 3 ມັງກອນ 2018 ວ່າດ້ວຍການຄຸມຄອງພະນັກງານ, ແລະ ຮັບຟງການເຜີຍແຜ່ມະຕິສະບັບເລກທີ 032/ກມສພ ລົງວັນທີ 3 ມັງກອນ ວ່າດ້ວຍວຽກງານສ້າງແຜນກໍານົດພະນັກງານນໍາພາ-ຄຸມຄອງ. ຮັບຟັງການປະກອບຄໍາຄິດ ຄໍາເຫັນ ຈາກພາກສ່ວນຕ່າງໆເຂົ້າຮ່ວມຢ່າງກົງໄປກົງມາ.
ທົ່ວເມືອງຫົງສາ,ມີການຈັດຕັ້ງຮາກຖານພັກທັງໝົດ 85 ຮາກຖານ, ໃນນີ້, ມີ 2 ຄະນະພັກຮາກສໍານັກງານ, ອົງການກົມກອງ ມີ 2 ຄະນະພັກຮາກຖານກຸ່ມບ້ານ ແລະ ມີ 3 ຄະນະພັກຮາກຖານບ້ານໃຫ່ຍພັດທະນາທຽບໃສ່ປີ 2016 ມີ 7 ຄະນະພັກຮາກ ແລະ 85 ໜ່ວຍພັກ ຕາມມະຕິກອງປະຊຸມໃຫຍ່ ຄັ້ງທີ 7 ຂອງອົງຄະນະພັກເມືອງ ສ້າງໜ່ວຍພັກເຂັ້ມແຂງ - ຮູ້ນໍາພາຮອບດ້ານ 85 ສ່ວນຮ້ອຍ, ປະຈຸບັນ ສ້າງໄດ້ແລ້ວ 67 ໜ່ວຍພັກ, ເທົ່າກັບ 78,82 ສ່ວນຮ້ອຍ, ປະເພດແຂງ 17 ໜ່ວຍ ເທົ່າກັບ 20 ສ່ວນຮ້ອຍ, ປະເພດກາງ 1 ໜ່ວຍ,1,18 ສ່ວນຮ້ອຍ.
ໃນໂອກາດດັ່ງກ່າວ ທ່ານ ຄໍາເພັດ ພົມມະລາດ ເລຂາຄະນະບໍລິຫານງານພັກເມືອງ ເຈົ້າເມືອງໆຫົງສາ, ກໍ່ໄດ້ໃຫ້ກຽດໂອ້ລົມ ແລະ ເໜັ່ນໜັກຫຼາຍບັນຫາຕື່ມອີກ .ກອງປະຊຸມດັ່ງກ່າວໄດ້ດໍາເນີນໄປເປັນເວລາ 1 ວັນເຕັມຈື່ງສໍາເລັດ.
ຂອບໃຈ ທີມຂ່າວ ເມືອງຫົງສາ, ແຂວງໄຊຍະບູລີ
Editor: ກຳປານາດ ລັດຖະເຮົ້າ
