ໃນວັນທີ 2 ພຶດສະພາ ຜ່ານມານີ້; ຢູ່ທີ່ເມືອງອາດສະພັງທອງ ແຂວງສະຫວັນນະເຂດ ໄດ້ຈັດພິທີເປີດຊຸດອົບຮົມທິດສະດີການເມືອງ-ການປົກຄອງ ລະບົບ 10 ວັນ ໃຫ້ເລຂາໜ່ວຍພັກບ້ານ-ນາຍບ້ານ ໃນທົ່ວເມືອງ ໂດຍການເປັນປະທານຂອງທ່ານ ລໍາທອງ ຂອບສີລາວົງ ເລຂາຄະນະບໍລິຫານພັກ ເມືອງອາດສະພັງທອງ, ມີຫົວໜ້າ, ຮອງຫົວໜ້າຫ້ອງການອ້ອມຂ້າງເມືອງ, ເລຂາພັກບ້ານ-ນາຍບ້ານໃນທົ່ວເມືອງ ແລະ ມີສໍາມະນາກອນທັງໝົດ 56 ທ່ານ, ຍິງ 3 ທ່ານ, ເຂົ້າຮ່ວມ.
ຊຸດຝຶກອົບຮົມທິດສະດີການເມືອງ-ການປົກຄອງ ລະບົບ 10 ວັນ ໃຫ້ເລຂາໜ່ວຍພັກບ້ານ-ນາຍ ບ້ານ ໃນທົ່ວເມືອງໃນຄັ້ງນີ້; ແມ່ນເລີ່ມແຕ່ວັນທີ 2 ພຶດສະພາ ຫາ 15 ພຶດສະພາ 2018 ຈຶ່ງສໍາເລັດຕາມລໍາດັບຄາດໝາຍ. ຈຸດປະສົງແມ່ນ ເພື່ອເປົ້າໝາຍກໍ່ສ້າງຍົກລະດັບທາງດ້ານທິດສະດີການ ເມືອງ-ການປົກຄອງ ໃຫ້ແກ່ຖັນແຖວເລຂາໜ່ວຍພັກ-ນາຍບ້ານໄດ້ຮັບຮູ້ ແລະ ເຂົ້າໃຈຕໍ່ກັບວຽກງານດ້ານຕ່າງໆເພີ່ມຂຶ້ນ, ເຮັດໃຫ້ຄະນະພັກບ້ານ, ນາຍບ້ານໄດ້ສຶກສາຮໍ່າຮຽນ, ຮັບຮູ້ ແລະ ກໍາໄດ້ຫຼັກມູນພື້ນຖານທິດສະດີມາກ-ເລນິນ ກໍ່ຄືແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ຮັບຮູ້ໄດ້ລະບົບການຄຸ້ມຄອງ, ການບໍລິຫານ, ຫຼັກການກໍ່ສ້າງພັກ-ພະນັກງານ ບັນດາຄວາມຮັບຮູ້ວິທະຍາສາດດ້ານຕ່າງໆ ສາມາດນໍາໄປໝູນໃຊ້ຕົວຈິງໄດ້ ແລະ ເຮັດໃຫ້ຄະນະພັກຂັ້ນບ້ານ, ນາຍບ້ານສາມາດຫັ້ນເອົາແນວທາງແຜນນະໂຍບາຍມະຕິຕ່າງໆຂອງ ພັກ-ລັດ ຫັນໃຫ້ເປັນອັນລະອຽດນໍາໃຊ້ແທດເໝາະກັບສະພາບຕົວຈິງ, ສາມາດກໍາແໜ້ນເນື້ອໃນຄາດໝາຍ, ນໍາໄປໝູນໃຊ້ຈັດຕັ້ງປະຕິບັດໃຫ້ປະກົດຜົນເປັນຈິງໃນຄວາມຮັບຜິດຊອບຂອງຕົນ, ມີແບບແຜນນໍາພາແບບແຜນວິທີເຮັດວຽກ ແລະ ແບບແຜນການ ດໍາລົງຊີວິດຢ່າງຖືກຕ້ອງ, ສາມາດໂຄສະນາ ແລະ ຂຽນເຜີ່ຍແຜ່ເອກະສານການເມືອງໃຫ້ປະຊາຊົນເຂົ້າໃຈໄດ້.
ນັກສໍາມະນາກອນແມ່ນ ຈະໄດ້ຄົ້ນຄວ້າຮໍ່າຮຽນ 3 ກຸ່ມວິຊາ ຄື: ກຸ່ມທິດສະດີ ປະກອບມີ 4 ບົດ ໃຊ້ເວລາ 2 ວັນ, ກຸ່ມວຽກພັກ ປະກອບມີ 7 ບົດ ໃຊ້ເວລາ 4 ວັນ ແລະ ກຸ່ມວຽກງານບໍລິຫານການເມືອງ-ການປົກຄອງປະກອບມີ 8 ບົດ ໃຊ້ເວລາ 4 ວັນລວມເປັນ 10 ວັນປະກອບມີ 63 ຊົ່ວໂມງ.
Editor: ນັກຂ່າວເມືອງອາດສະພັງທອງ
