ພາຍຫຼັງເສັດສີ້ນພິທີເຊັນບົດບັນທຶກ ມອບ-ຮັບ ແລະ ພິທີທາງສາສະໜາຂອງລາວ ໃນຕອນເຊົ້າຂອງວັນທີ 7 ພຶດສະພາ 2018 ຢູ່ທີ່ສະໂມສອນປົກຄອງແຂວງ ບໍລິຄຳໄຊ ຄະນະປະຕິບັດງານພິເສດ ແຂວງ ບໍລິຄຳໄຊ-ແຂວງ ຮ່າຕິ່ງ ກໍ່ໄດ້ຈູດທູບທຽນໄຫວ້ອາໄລຄັ້ງສຸດທ້າຍ ໃນການຈັດພິທີ ສົ່ງອັດທິທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍຊີວິດໃນປາງສົງຄາມຢູ່ ສປປ ລາວ ຢ່າງເປັນທາງການ ແລະ ສົມກຽດ ມີຈຳນວນ 13 ອັດຖິ. ໃນນັ້ນ ມາຈາກນະຄອນຫຼວງ 3 ອັດທິ ໃຫ້ກຽດເຂົ້າຮ່ວມພິທີຂອງທ່ານ ສຸວັນນີ ໄຊນະນະ ຮອງເລຂາພັກແຂວງ ປະທານ ສະພາປະຊາຊົນ ແຂວງບໍລິຄຳໄຊ, ທ່ານ ດັ້ງ ກວັກ ວິງ ຄະນະປະຈໍາພັກແຂວງ ຮອງປະທານຄະນະກຳມະການປະຊາຊົນແຂວງ ຮ່າຕິ່ງ ມີທີມງານຄະນະປະຕິບັດງານພິເສດ ແຂວງ ບໍລິຄໍາໄຊ-ຮ່າຕິ່ງ ທັງສອງຝ່າຍເຂົ້າຮ່ວມຢ່າງເປັນຂະບວນທີ່ຍິ່ງໃຫຍ່.
ຈາກນັ້ນ ກໍ່ໄດ້ເຄື່ອນອັດທິຈາກສະໂມສອນປົກຄອງແຂວງ ໄປຕາມເສັ້ນທາງເລກ 4 ເບ ສູ່ເສັ້ນທາງເລກທີ 13 ໃຕ້ ໂດຍມີພະນັກງານຈາກກຳລັງປ້ອງກັນຊາດ-ປ້ອງກັນຄວາມສະຫງົບ, ພໍ່ແມ່ປະຊາຊົນລາວບັນດາເຜົ່າ ຕະຫຼອດຮອດນັກສຶກສາ-ນ້ອງນ້ອຍນັກຮຽນ ເຂົ້າຮ່ວມ ຄອຍສົ່ງຕາມເສັ້ນທາງເທດສະບານແຂວງ, ໂດຍການໂບກມື, ຍົກທຸງຊາດລາວ-ທຸງຊາດຫວຽດນາມຢ່າງເປັນຂະບວນ ດ້ວຍຄວາມໂສກເສົ້າ, ອາໄລອາວອນ ເຖິງວິລະບູລຸດ ທີ່ຈະໄດ້ກັບຄືນສູ່ບ້ານເກີດເມືອງນອນຂອງຕົນເອງ. ຕະຫຼອດຕາມສາຍທາງຈາກເທດສະບານແຂວງ ຫາ ຊາຍແດນດ່ານສາກົນ-ນໍ້າພາວ ປະຊາຊົນຕາມບ້ານຕ່າງໆຕາມສາຍທາງ ຈະອອກມາຄອຍຢືນ ຮັບ-ສົ່ງ ເປັນການຈາລຶກບຸນຄຸນ, ຄຸນງາມຄວາມດີ ຂອງຜູ້ສະຫຼະຊີວິດຕໍ່ປະເທດຊາດຕໍ່ປະຊາຊົນ ທັງສອງຊາດລາວ-ຫວຽດນາມ.
Editor: ແຂວງບໍລິຄຳໄຊ
