ເມືອງຫົງສາ ແຂວງໄຊຍະບູລີ ໄດ້ຈັດກອງປະຊຸມວຽກງານກວດກາທົ່ວເມືອງ ປະຈຳປີ 2017 ຂຶ້ນຢ່າງເປັນທາງການ ໃນທ້າຍເດືອນເມສາ 2018 ຜ່ານມານີ້, ຢູ່ທີ່ສະໂມສອນໃຫຍ່ຂອງເມືອງ. ໂດຍການເປັນກຽດເຂົ້າຮ່ວມຂອງ ທ່ານ ພອນສະຫວັນ ໄຊສົມພັນ ຮອງເລຂາພັກເມືອງ ຮອງເຈົ້າເມືອງຫົງສາ, ມີ ທ່ານ ບຸນສີ ພົມສີ ຮອງປະທານຄະນະກວດກາພັກແຂວງໆໄຊຍະບູລີ, ມີປະທານກວດກາພັກ-ລັດເມືອງ, ຄະນະປະຈຳ, ກໍາມະການພັກເມືອງ, ເລຂາຄະນະພັກຮາກຖານ, ເລຂາໜ່ວຍພັກ, ຜູ້ເຮັດວຽກກວດກາ ແລະ ພະນັກງານລັດຖະກອນຈຳນວນໜຶ່ງເຂົ້າຮ່ວມທັງໝົດ 111 ທ່ານ, ຍິງ 21 ທ່ານ.
ທ່ານ ສົມສີ ພົມມະຈັນ ຮອງເລຂາພັກເມືອງ ປະທານກວດກາພັກ-ລັດເມືອງ ກ່າວວ່າ: ຈຸດປະສົງກອງປະຊຸມຄັ້ງນີ້, ເພື່ອສະຫຼຸບຕີລາຄາການເຄື່ອນໄຫວ ແລະ ການຈັດຕັ້ງປະຕິບັດວຽກງານກວດກາ ໃນໜຶ່ງປີຜ່ານມາ ແລະ ທິດທາງແຜນການກວດກາປະຈຳປີ 2018. ຊຶ່ງຜູ້ເຂົ້າຮ່ວມໄດ້ຮັບຟັງ ການເຜີຍແຜ່ບົດແນະນຳເພີ່ມເຕີມ ເລກທີ 04 ຂອງຄະນະກວດກາສູນກາງພັກ ກ່ຽວກັບສິດຕົກລົງວິໄນຂັ້ນກ່າວເຕືອນ, ປ່ຽນແປງ ຫຼື ລົບລ້າງຮູບການວິໄນຂອງຄະນະກວດກາພັກຂັ້ນເມືອງ ແລະ ທຽບເທົ່າຂຶ້ນໄປ, ເຜີຍແຜ່ຂໍ້ກຳນົດເລກທີ 05 ວ່າດ້ວຍການຕິດຕາມ, ກວດກາການຈັດຕັ້ງປະຕິບັດຜົນການກວດກາ, ບົດແນະນຳ ເລກທີ 27 ຂອງອົງການກວດກາລັດຖະບານ ກ່ຽວກັບ ການດຳເນີນຄະດີການສໍ້ລາດບັງຫຼວງ; ບົດແນະນຳເລກທີ 36 ຂອງອົງການກວດກາລັດຖະບານ ກ່ຽວກັບການກວດກາຕາມຜົນຂອງການກວດສອບ. ຊຶ່ງໃນໄລຍະໜຶ່ງປີຜ່ານມາ ຄະນະພັກ, ຄະນະກວດກາແຕ່ລະຂັ້ນ ໄດ້ເອົາໃຈໃສ່ເຄື່ອນໄຫວຕິດຕາມ, ກວດກາຕາມພາລະບົດບາດ, ຂອບເຂດສິດໜ້າທີ່ຂອງຕົນຮັບຜິດຊອບ, ໂດຍສະເພາະໄດ້ສຸມໃສ່ຕິດຕາມ, ກວດກາວຽກງານພັກ, ວຽກງານລັດ ແລະ ສຸມໃສ່ແກ້ໄຂບັນຫາສະເພາະ ຈຳນວນໜຶ່ງ, ເປັນຕົ້ນ ແມ່ນການປັບປຸງການຈັດຕັ້ງກໍ່ສ້າງພັກ ແລະ ການຕິດຕາມ ກວດກາລັດ, ການຕ້ານ ແລະ ສະກັດກັ້ນ ການສໍ້ລາດບັງຫຼວງ, ຊຶ່ງໄດ້ຕິດຕາມກວດກາການລົງທຶນ, ການກໍ່ສ້າງພື້ນຖານໂຄງລ່າງ ດ້ວຍທຶນຂອງລັດ ມີທັງໝົດ 18 ໂຄງການ, ຕິດຕາມກວດກາວຽກງານຄົ້ນຄວ້າຄຳຮ້ອງ - ຄຳສະເໜີ ແລະ ວຽກງານປັບປຸງກົງຈັກການຈັດຕັ້ງຕື່ມອີກ. ພ້ອມນັ້ນ, ບັນດາຜູ້ເຂົ້າຮ່ວມກໍ່ໄດ້ພັດປ່ຽນກັນຂຶ້ນປະກອບຄໍາຄິດຄໍາເຫັນ ຢ່າງກົງໄປກົງມາ. ທັງນີ້, ກໍເພື່ອແນ່ໃສ່ຮັບປະກັນການຈັດຕັ້ງຜັນຂະຫຍາຍເນື້ອໃນ ກອງປະຊຸມໃຫຍ່ວຽກງານກວດກາທົ່ວປະເທດ ປະຈຳປີ 2017 ແລະ ເອົາບົດຮຽນ, ຄວາມຮູ້ທາງດ້ານວຽກງານດັ່ງກ່າວໄປໝູນໃຊ້ເຂົ້າໃນວຽກງານຕົວຈິງ, ສາມາດດຳເນີນໄດ້ເປັນລະບົບຕໍ່ເນື່ອງ, ຖືກຕ້ອງຕາມຫລັກການ ແລະ ມີປະສິດ ທິພາບປະສິດທິຜົນສູງ.
ໃນຕອນທ້າຍຂອງກອງປະຊຸມ ກໍ່ໄດ້ເປັນກຽດຮັບຟັງການມີຄຳຄິດຄຳເຫັນໂອ້ລົມຈາກ ທ່ານ ພອນສະຫວັນ ໄຊສົມພັນ ຊຶ່ງທ່ານໄດ້ເນັ້ນໜັກ ໃຫ້ທຸກພາກສ່ວນຈະຕ້ອງໄດ້ພ້ອມກັນຄົ້ນຄວ້າ ຍົກໃຫ້ເຫັນດ້ານດີ, ບົດຮຽນທີ່ຕ້ອງເສີມຂະຫຍາຍ, ຊອກໃຫ້ເຫັນດ້ານອ່ອນ, ຂໍ້ຄົງຄ້າງ, ສາເຫດເພື່ອປັບປຸງແກ້ໄຂໃນຕໍ່ໜ້າ. ເປັນຕົ້ນແມ່ນວຽກງານຕິດຕາມກວດກາພາຍໃນພັກ, ສະກັດກັ້ນ ແລະ ຕ້ານການສໍ້ລາດບັງຫຼວງ. ພ້ອມທັງຄົ້ນຄ້ວາປະກອບຄຳຄິດເຫັນໃຫ້ເລິກເຊິ່ງ, ເປັນເອກະພາບຕໍ່ທິດທາງ, ໜ້າທີ່ ແລະ ບັນດາວຽກຈະຕ້ອງສຸມໃສ່ຈັດຕັ້ງປະຕິບັດໃນປີ 2018, ແນ່ໃສ່ເຮັດໃຫ້ວຽກຕິດຕາມກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງໃນຂະແໜງການຕ່າງໆ ໄດ້ຮັບການຈັດຕັ້ງປະຕິບັດຢ່າງຕັ້ງໜ້າ ແລະ ມີການຫັນປ່ຽນດີຂຶ້ນກ່ວາເກົ່າ, ປະກອບສ່ວນເຮັດໃຫ້ການຄຸ້ມຄອງລັດດ້ວຍກົດໝາຍມີຄວາມສັກສິດ, ການພັດທະນາເສດຖະກິດ-ສັງຄົມ ມີການຂະຫຍາຍຕົວ ແລະ ບັນລຸຕາມຄາດໝາຍທີ່ວາງໄວ້
ທີມຂ່າວເມືອງຫົງສາ
Editor: ກຳປານາດ ລັດຖະເຮົ້າ
