ທ້າຍເດືອນເມສາ 2018 ຜ່ານມານີ້ ໜ່ວຍພັກສັນຕິບານ ທີ່ຂຶ້ນກັບຄະນະພັກຮາກຖານກອງບັນຊາການປ້ອງກັນຄວາມສະຫງົບ ເມືອງທ່າແຕງ, ແຂວງເຊກອງ ໄດ້ຈັດພິທີຮັບເອົາສະມາຊິກພັກສໍາຮອງຂື້ນເປັນສະມາຊິກພັກສົມບູນ ມີ 1 ສະຫາຍ ແລະ ຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສໍາຮອງມີ 6 ສະຫາຍ ,ຍິງ 2 ສະຫາຍ ໂດຍການເປັນປະທານຂອງ ສະຫາຍ ພັນໂທ ອ່ອນຕາ ສະສົມບັດ ກໍາມະການພັກເມືອງ ເລຂາຄະນະພັກຮາກຖານກອງບັນຊາການປ້ອງກັນຄວາມສະຫງົບ ເມືອງທ່າແຕງ, ມີບັນດາຄະນະພັກ-ຄະນະບັນຊາ ພ້ອມດ້ວຍສະມາຊິກພັກສົມບູນ ແລະ ສໍາຮອງໃນໜ່ວຍເຂົ້າຮ່ວມ.
ສະຫາຍ ພັນຕີ ສົມດີ ສາຍສະເກດ ເລຂາໜ່ວຍພັກສັນຕິບານ ໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກເມືອງ ສະບັບເລກທີ 62/ຄຈພມ, ລົງວັນທີ 2 ເມສາ 2018 ວ່າດ້ວຍເລື່ອນສະມາຊິກພັກສໍາຮອງຂື້ນເປັນສະມາຊິກພັກສົມບູນມີ 1 ສະຫາຍ ຄື: ຮ້ອຍຕີ ສຸລິຍາ ໝືນໂຍທາ ເຊິ່ງສະຫາຍນີ້ ແມ່ນໄດ້ເອົາໃຈໃສ່ ແລະ ຈັດຕັ້ງປະຕິບັດທຸກວຽກງານທີ່ຂື້ນກັບຄວາມຮັບຜິດຊອບຂອງຕົນເຫັນວ່າສໍາເລັດໂດຍພື້ນຖານ ທີ່ຖືກຕ້ອງກັບການສຶກສາອົບຮົມການເມືອງ-ແນວຄິດຢ່າງໜັກແໜ້ນ ເຊິ່ງມັນສະແດງອອກໃນການເຂົ້າຮ່ວມເຊື່ອມຊຶມແນວທາງ, ແຜນນະໂຍບາຍ, ມະຕິ, ຄຳສັ່ງ, ກົດລະບຽບຂອງພັກ, ກົດໝາຍຂອງລັດ ຢ່າງເປັນປົກກະຕິ ແລະ ໄດ້ຫັນເອົາແຜນນະໂຍບາຍ ແລະ ແນວທາງດັ່ງກ່າວເຂົ້າສູ່ວຽກງານຕົວຈິງ ກໍ່ຄືວຽກງານວິຊາສະເພາະ ມີຜົນສຳເລັດໃນຫລາຍດ້ານ. ຂະນະທີ່ຮັບເອົາມະຫາຊົນກ້າວໜ້າມີ 6 ສະຫາຍ, ຍິງ 2 ສະຫາຍ ຄື: ສິບເອກ ນາງ ອອນໄພວັນ ສີປະເສີດ,ຮ້ອຍຕີ ນາງ ສຸກສະໄໝ ແກ້ວວິໄລວົງ, ຮ້ອຍຕີ ທະນາພອນ ມິດດາວເພັດ, ຮ້ອຍຕີ ພູລັດ ກັນຫາລັງສີ, ສິບເອກ ສິງຫາ ພົມມະວົງສາ ແລະ ຮ້ອຍຕີ ແສງຈັນ ວົງສາໝັ້ນ ເຂົ້າເປັນສະມາຊິກພັກສໍາຮອງ.
ໂອກາດດັ່ງກ່າວ ສະຫາຍ ພັນໂທ ອ່ອນຕາ ສະສົມບັດ ກໍາມະການພັກເມືອງ ເລຂາຄະນະພັກຮາກຖານກອງບັນຊາການປ້ອງກັນຄວາມສະຫງົບເມືອງທ່າແຕງ ໄດ້ຮຽກຮ້ອງມາຍັງບັນດາເລຂາໜ່ວຍພັກ, ຄະນະໜ່ວຍພັກ ພ້ອມດ້ວຍສະມາຊິກພັກທຸກສະຫາຍ ຈົ່ງເອົາໃຈໃສ່ສືບຕໍ່ສຶກສາອົບຮົມດ້ານການເມືອງແນວຄິດໃຫ້ແກ່ສະມາຊິກພັກພາຍໃນໜ່ວຍຂອງຕົນໃຫ້ເປັນປົກກະຕິຕໍ່ເນື່ອງ, ຈັດຕັ້ງປະຕິບັດທຸກມະຕິຄໍາສັ່ງຂອງພັກວາງອອກ, ຝຶກຝົນຫຼໍ່ຫຼອມຕົນເອງໃຫ້ກາຍເປັນສະມາຊິກພັກທີ່ດີເດັ່ນໃນຕໍ່ໜ້າ, ເຊື່ອໝັ້ນຕໍ່ການນໍາພາຂອງພັກ, ເດີນທາງຕາມແນວທາງປ່ຽນແປງໃໝ່ ພ້ອມນີ້ ກໍ່ຕ້ອງຍຶດໝັ້ນລັດທິມາກ-ເລນິນ ບວກກັບຄຸນສົມບັດ, ສິນທໍາປະຕິວັດ, ແນວຄິດຂອງປະທານ ໄກສອນ ພົມວິຫານ ເຂົ້າໃນການເຮັດວຽກຕົວຈິງ ນັບແຕ່ຂັ້ນຮາກຖານຂື້ນມາ ເພື່ອແກ້ໄຂປະກົດການຫຍໍ້ທໍ້ຕ່າງໆໃນສັງຄົມໃຫ້ຫຼຸດໜ້ອຍຖອຍລົງ. ທັງນີ້ ເພື່ອສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານ ຢ່າງເຂັ້ມງວດ
ແຫລ່ງຂ່າວ ເມືອງທ່າແຕງ
Editor: ກຳປານາດ ລັດຖະເຮົ້າ
