ພິທີປາຖະກະຖາເລົ່າຄືນມູນເຊື້ອວັນກຳມະກອນສາກົນ ຄົບຮອບ 132 ປີ (ວັນທີ 1 ພຶດສະພາ 1886 - ວັນທີ 1 ພຶດສະພາ 2018), ໄດ້ຈັດຂຶ້ນຢ່າງເປັນທາງການໃນ ວັນທີ 30 ເມສາ ຜ່ານມາ 2018 ນີ້, ຢູ່ທີ່ສະໂມສອນໃຫຍ່ຂອງເມືອງ, ໂດຍການໃຫ້ກຽດປາຖະກະຖາຂອງ ທ່ານ ພອນສະຫວັນ ໄຊສົມພັນ ຮອງເລຂາພັກເມືອງ ຮອງເຈົ້າເມືອງຫົງສາ, ເຂົ້າຮ່ວມຮັບຟັງ ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ກົມກອງ, ຄະນະບໍລິຫານງານສະຫະພັນກຳມະບານເມືອງ, ຄະນະໜ່ວຍຮາກຖານກຳມະບານອ້ອມຂ້າງເມືອງ ຕະຫຼອດຮອດສະມາຊິກກຳມະບານເຂົ້າຮ່ວມທັງໝົດ 200 ກວ່າຄົນ, ຍິງ 100 ກ່ວາຄົນ.
ໃນໂອກາດດັ່ງກ່າວນີ້ ທ່ານ ພອນສະຫວັນ ໄຊສົມພັນ ຮອງເຈົ້າເມືອງ ກໍ່ໄດ້ຍົກໃຫ້ເຫັນ ເຖິງປະຫວັດແຫ່ງການກຳເນີດ, ການເຕີບໃຫຍ່ຂະຫຍາຍຕົວຂອງຊົນຊັ້ນກຳມະກອນ ແລະ ພາລະກຳປະຫວັດສາດ ຂອງຂະບວນກຳມະກອນສາກົນ, ສະພາບແວດລ້ອມພາໃຫ້ກໍາເນີດຊົນຊັ້ນກໍາມະກອນ, ເງື່ອນໄຂທີ່ພາໃຫ້ເກີດມີວັນກຳມະກອນສາກົນ, ສະພາບການຕໍ່ສູ້ຂອງຊົນຊັ້ນກໍາມະກອນທົ່ວໂລກ ຫຼັງວັນທີ 1 ພຶດສະພາ 1886, ພາລະກຳປະຫວັດສາດ ແລະ ລັກສະນະດີເລີດຂອງຊົນຊັ້ນກຳມະກອນສາກົນ, ຍົກໃຫ້ເຫັນເຖິງຜົນງານຂອງກໍາມະກອນລາວ ກັບການປະກອບສ່ວນພາລະກິດປະຕິວັດ ໃນໄລຍະ 132 ປີທີ່ຜ່ານມາ, ພ້ອມທັງຍົກໃຫ້ເຫັນການເສີມຂະຫຍາຍທາດແທ້ ແລະ ມູນເຊື້ອອັນດີງາມຂອງຊົນຊັ້ນກຳມະກອນລາວ.
ໃນພິທີຄັ້ງນີ້ ຍັງໄດ້ມອບໃບຢັ້ງຢືນຂັ້ນເມືອງໃຫ້ໜ່ວຍກຳມະບານຮາກຖານ ຈຳນວນ 41 ຮາກຖານ ຢູ່ພາຍໃນເມືອງຫົງສາ, ທີ່ມີຜົນງານດີເດັ່ນໃນການຈັດຕັ້ງປະຕິບັດ ຄຳຂວັນ 5 ເປັນເຈົ້າ ທີ່ສູນກາງສະຫະພັນກຳມະບານລາວ ໄດ້ວາງອອກຕື່ມອີກ. ໃຫ້ກຽດມອບໂດຍ ທ່ານ ພອນສະຫວັນ ໄຊສົມພັນ ຮອງເຈົ້າເມືອງຫົງສາ ແລະ ຂື້ນຮັບ ໂດຍຕາງຫນ້າຫນ່ວຍ ໃນແຕ່ລະຫນ່ວຍ ຕາມລຳດັບ
Editor: ກຳປານາດ ລັດຖະເຮົ້າ
