ເຂດຈຸດສຸ່ມພັດທະນາທີ 2 ບ້ານ ກົກພຸງໄຕ້, ເມືອງທ່າແຕງ, ແຂວງເຊກອງ ໄດ້ຈັດກອງປະຊຸມເຊື່ອມຊຶມນິຕິກຳ ກ່ຽວກັບວຽກງານຈັດຕັ້ງທົ່ວເມືອງ ຂຶ້ນໃນວັນທີ 3 ພຶດສະພາ 2018 ຜ່ານມານີ້ ຢູ່ທີ່ເຂດຈຸດສຸ່ມພັດທະນາດັ່ງກ່າວ ໂດຍການເຂົ້າຮ່ວມເປັນປະທານຂອງ ທ່ານ ສີສົມພາ ໄຊແກ້ວຍະວົງ ຮອງຫົວໜ້າເຂດຈຸດສຸ່ມພັດທະນາທີ 2, ມີເລຂາຄະນະພັກຮາກຖານບ້ານ-ນາຍບ້ານ ພາຍໃນເຂດ ພ້ອມດ້ວຍສະມາຊິກພັກສົມບູນ ແລະ ສະມາຊິກພັກສໍາຮອງ 38 ສະຫາຍ, ເຂົ້າຮ່ວມ.
ທ່ານ ສີສົມພາ ໄຊແກ້ວຍະວົງ ຮອງຫົວໜ້າເຂດຈຸດສຸ່ມພັດທະນາທີ 2 ກ່າວວ່າ: ເອກະສານທີ່ນໍາມາເຜີຍແຜ່ເຊື່ອມຊືມປະກອບ ມີ:
(1) ຄໍາສັ່ງ,ເລກທີ 01/ກມສພ ວ່າດ້ວຍການເພີ່ມທະວີກໍ່ສ້າງໜ່ວຍພັກປອດໃສເຂັ້ມແຂງ ແລະ ໜັກແໜ້ນ.
(2) ມະຕິ ເລກທີ 030/ກມສພ, ລົງວັນທີ 03 ມັງກອນ 2018 ວ່າດ້ວຍມາດຕະຖານຂອງພະນັກງານນໍາພາ-ຄຸ້ມຄອງ.
(3) ມະຕິ ເລກທີ 031/ກມສພ ວ່າດ້ວຍວຽກງານຄຸ້ມຄອງພະນັກງານ.
(4) ຄຳສັ່ງ ເລກທີ 032/ກມສພ ວ່າດ້ວຍວຽກງານສ້າງແຜນກໍານົດພະນັກງານນໍາພາຄຸ້ມຄອງ ພ້ອມດໍາລັດນາຍົກລັດຖະມົນຕີ ວ່າດ້ວຍການເພີ່ມທະວີວຽກງານແຂ່ງຂັນຍ້ອງຍໍໃນໄລຍະໃໝ່.
ພາຍຫຼັງທີ່ໄດ້ເຜີຍແຜ່ 4 ເອກະສານສຳຄັນຂອງພັກແລ້ວ, ຍັງໄດ້ຮັບຟັງບົດສະຫຼຸບກອງປະຊຸມພາຍໃນເຂດ ໂດຍຕິດພັນກັບຂະບວນການຜັນຂະຫຍາຍມະຕິ 10 ຂອງສູນກາງພັກ, ມະຕິ 9 ຂອງແຂວງ ແລະ ມະຕິ 5 ຂອງອົງຄະນະພັກເມືອງທ່າແຕງ ທີ່ໄດ້ຍົກໃຫ້ເຫັນຕໍ່ວຽກງານຫຼາຍດ້ານ,ເຫັນໄດ້ຈຸດດີ, ຈຸດອ່ອນ, ຂໍ້ຄົງຄ້າງໃນປີ 2017 ແລະ ການວາງທິດທາງແຜນການແກ້ໄຂໃນປີ 2018ເພື່ອໃຫ້ຜູ້ເຂົ້າຮ່ວມໄດ້ປະກອບຄໍາຄິດເຫັນໃສ່ບັນດາແຕ່ລະໜ້າວຽກພາຍໃນເຂດຈຸດສຸ່ມພັດທະນາທີ 2 ໃຫ້ສໍາເລັດຕາມແຜນການທີ່ວາງໄວ້.
ທັງນີ້ ເພື່ອເຮັດໃຫ້ສະມາຊິກພັກພາຍໃນເຂດ ໄດ້ເຊື່ອມຊືມບັນດາວຽກງານດ້ານການເມືອງ-ແນວຄິດ,ດ້ານຄຸນສົມບັດສິນທຳປະຕິວັດ, ດ້ານການຈັດຕັ້ງ, ດ້ານແບບແຜນວິທີເຮັດວຽກ-ວິທີນໍາພາ,ເປັນແບບຢ່າງນໍາໜ້າ ໃນການປະຕິບັດລະບຽບວິໄນ, ປະຕິບັດກົດລະບຽບພັກ,ກົດໝາຍຂອງລັດ ໃຫ້ແກ່ມະຫາຊົນ, ວຽກງານສ້າງ ແລະ ກໍານົດພະນັກງານ ແມ່ນມອບໃຫ້ຂະແໜ່ງການກ່ຽວຂ້ອງຮີບຮ້ອນ ເພື່ອກຽມສ້າງພະນັກງານສືບທອດ-ປ່ຽນແທນ, ກວດກາ ສົມທົບກັນ ເພື່ອຊຸກຍູ້ບັັນດາສະມາຊິກພັກ,ສູ້ຊົນໃຫ້ຍາດໄດ້ໜ່ວຍພັກປອດໃສ, ເຂັ້ມແຂງ, ໜັກແໜ້ນໃນແຕ່ລະປີຢ່າງເຂັ້ມງວດ.
ທີມຂ່າວ ເມືອງທ່າແຕງ
Editor: ກຳປານາດ ລັດຖະເຮົ້າ
