ໃນວັນທີ 03 ພຶດສະພາ 2018 ຜ່ານມາ ຢູ່ທີ່ ຫ້ອງປະຊຸມພະແນກແຜນການ ແລະ ການລົງທືນ ແຂວງບໍລິຄຳໄຊ ໄດ້ຈັດກອງປະຊຸມທາບທາມຄຳຄິດຄຳເຫັນໃສ່ (ຮ່າງ) ກົດໝາຍວ່າດ້ວຍ ຄົນພິການ ຂື້ນ ພາຍໃຕ້ການເປັນປະທານ ຂອງ ທ່ານ ຄຳປິງ ແສງຕານນະລາດ ຫົວໜ້າກົມນະໂຍບາຍຕໍ່ຜູ້ມີຜົນງານ, ພິການ ແລະ ຜູ້ອາຍຸສູງ, ໂດຍເປັນກຽດເຂົ້າຮ່ວມຂອງ ທ່ານ ປອ. ດວງຕາ ມໍຣະຄາສຸກ ກໍາມະການພັກແຂວງ, ຫົວໜ້າຫ້ອງວ່າການແຂວງ ບໍລິຄຳໄຊ, ມີບັນດາຫົວ ໜ້າ, ຮອງພະແນກແຮງງານ ແລະ ສະຫັວດດີການສັງຄົມ 05 ແຂວງ ເຂົ້າຮ່ວມຄື: ແຂວງ ຫົວພັນ, ຊຽງຂວາງ, ໄຊສົມບູນ, ຄໍາມ່ວນ ແລະ ບໍລິຄຳໄຊ ພ້ອມດ້ວຍພະແນກການທີ່ກ່ຽວຂ້ອງພາຍໃນແຂວງ ເຂົ້າຮ່ວມຢ່າງພ້ອມພຽງ. ທ່ານ ຄຳປິງ ແສງຕານນະລາດ ໄດ້ລາຍງານວ່າ: ການສ້າງ (ຮ່າງ) ກົດໝາຍວ່າດ້ວຍ ຄົນພິການ ແມ່ນເພື່ອຜັນຂະຫຍາຍ ແນວທາງນະໂຍບາຍຂອງພັກ ໂດຍສະເພາະ ມະຕິກອງປະຊຸມໃຫ່ຍ ຄັ້ງທີ 10 ຂອງພັກປະຊາຊົນ ປະຕິວັດລາວ ກ່ຽວກັບການບໍລິການທາງດ້ານສະຫັວດດີການສັງຄົມ ໃຫ້ໄດ້ຮັບການຍົກລະດັບ ແລະ ເຮັດໃຫ້ທຸກຄົນ ສາມາດເຂົ້າເຖິງການບໍລິການນັ້ນໄດ້ ເພື່ອຈັດຕັ້ງປະຕິບັດການຄຸ້ມຄອງລັດ-ຄຸ້ມຄອງສັງຄົມ, ເວົ້າສະເພາະ ແມ່ນການຄຸ້ມຄອງຄົນພິການ ແລະ ວຽກງານຄົນພິການ ໃຫ້ນັບມື້ຫັນໄປສູ່ການຄຸ້ມຄອງ ດ້ວຍກົດໝາຍ ແລະ ລະບຽບການ ເທື່ອລະກ້າວ ແນ່ໃສ່ປົກປ້ອງສິດ ແລະ ຜົນປະໂຫຍດ ອັນຊອບທຳ ແລະ ສະພາບການຕົວຈິງຂອງຄົນພິການ ຕາມແນວທາງນະໂຍບາຍຂອງພັກ ແລະ ລັດຖະບານ. ສະນັ້ນ, ສປປ ລາວ ໃນນາມລັດພາຄີ ມີຄວາມຈຳເປັນຈະຕ້ອງສ້າງກົດໝາຍທີ່ສອດຄ່ອງກັບຈຸດພິເສດ ແລະ ລະດັບການຂະຫຍາຍຕົວທາງດ້ານເສດຖະກິດ-ສັງຄົມຂອງປະເທດເຮົາ ເພື່ອເປັນການສິ່ງຄ້ຳປະກັນໃຫ້ແກ່ການປະຕິບັດສິດທິຂອງຄົນພິການ ຢູ່ ສປປລາວ. ພາຍຫຼັງທີ່ໄດ້ຟັງຄຳເຫັນຂອງທ່ານປະທານແລ້ວ ບັນດາທ່ານທີ່ເຂົ້າຮ່ວມກອງປະຊຸມ ກໍໄດ້ພັດປ່ຽນກັນປະກອບຄຳເຫັນໃສ່ (ຮ່າງ) ກົດໝາຍວ່າດ້ວຍ ຄົນພິການ ຢ່າງກົງໄປກົງມາ.
Editor: ກຳປານາດ ລັດຖະເຮົ້າ
