ດັ່ງນັ້ນ, ໃນລະຫວ່າງ ວັນທີ 3-9 ພຶດສະພາ 2018 ນີ້, ກອງບັນຊາການທະຫານເມືອງ ຫົງສາ, ແຂວງໄຊຍະບູລີ ໄດ້ເປີດຊຸດຝຶກອົບຮົມການເມືອງ-ການທະຫານ ໃຫ້ກອງຮ້ອຍ-ກອງຫຼອນ (ທີ 8) ສາມບ້ານພັດທະນາ ຄື: ບ້ານວຽງແກ້ວ, ບ້ານຈຳປາ ແລະ ບ້ານນາສ້ານ. ຂື້ນຢູ່ທີ່ສະໂມສອນບ້ານວຽງແກ້ວ. ໂດຍການເປັນປະທານຂອງ ສະຫາຍ ຄຳເພັດ ພົມມະລາດ ເລຂາພັກເມືອງ ເຈົ້າເມືອງຫົງສາ, ປະທານປ້ອງກັນຊາດ-ປ້ອງກັນຄວາມສະຫງົບເມືອງ, ມີຄະນະກອງບັນຊາການທະຫານເມືອງຫົງສາ ພ້ອມດ້ວຍຄູຝຶກ, ມີຕ່າງໜ້າ ປກສ ກຸ່ມບ້ານ, ອຳນາດການປົກຄອງບ້ານ ແລະ ກອງຮ້ອຍ-ກອງຫຼອນ(ທີ 8) ສາມບ້ານດັ່ງກ່າວເຂົ້າຮ່ວມທັງໝົດ 100 ກວ່າຄົນ.
ສະຫາຍ ພັນຕີ ສຸກສະຫວັນ ເຜົາໃຈທີດີ ຫົວໜ້າພະແນກ ເສນາ ກອງບັນຊາການທະຫານເມືອງຫົງສາ ກ່າວວ່າ: ການເປີດຊຸດຝຶກອົບຮົບດັ່ງກ່າວນີ້, ແມ່ນຈະໄດ້ດໍາເນີນໄປເປັນເວລາ 7 ວັນ ຄື: ແຕ່ວັນທີ 3-9 ພຶດສະພາ 2018. ມີກອງຮ້ອຍ-ກອງຫຼອນ ເຂົ້າຮ່ວມທັງໝົດ 103 ຄົນ. ໃນນີ້, ບ້ານວຽງແກ້ວມີ 40 ສະຫາຍ, ບ້ານຈຳປາມີ 30 ສະຫາຍ ແລະ ບ້ານນາສ້ານ ມີ 33 ສະຫາຍ. ຊຶ່ງສໍານາກອນ ແມ່ນຈະໄດ້ຮຽນຮູ້ບົດຮຽນທັງໝົດ 3 ພາກ ຄື: ພາກການເມືອງນຳພາແນວຄິດ, ພາກຍຸດທະວິທີ ແລະ ພາກສິລະປະຍຸດ. ພ້ອມທັງຮຽນຮູ້ 7 ຈັ່ງຫວະ ພື້ນຖານບຸກຄົນອາໃສພູມີປະເທດ, ຮຽນລະບຽບຮູບແຖວ (ເປັນຈຸ, ໝູ່, ໝວດ, ຮຽນສູ້ຮົບປ້ອງກັນບ້ານ), ຮຽນຮູ້ຄຸນຄ່າສະມັດຕະພາບການປະກອບສ້າງຂອງປືນ ອາກາ (AK) ແລະ ເຊກາເຊ (CKC), ຮຽນເລັ່ງຍິງບົດເປີດສາກຈາກປືນ (ອາກາ) AK ແລະ ຍິງລູກປືນແທ້ບົດເປີດສາກຈາກປືນ (ອາກາ) AK. ການຮຽນແມ່ນໃຊ້ເວລາທັງ ໝົດ 64 ຊົ່ວໂມງ.
ໃນໂອກາດນີ້, ທ່ານ ຄຳເພັດ ພົມມະລາດ ກໍ່ໄດ້ເນັ້ນໜັກໃຫ້ສຳມະນາກອນແຕ່ລະຄົນ ຈົ່ງພ້ອມກັນເອົາໃຈໃສ່, ຕັ້ງໜ້າຝຶກຝົນຫຼໍ່ຫຼອມຕົນເອງໃຫ້ເປັນຄົນທີ່ມີຄວາມພຽບພ້ອມໄປດ້ວຍຄວາມສາມາດສູງ ມີພິກໄຫວໃນການເຄື່ອນໄຫວວຽກງານປ້ອງການຕົວໃຫ້ຄ່ອງແຄ້ວ, ປະຕິບັດລະບຽບຢ່າງເຄັ່ງຄັດ ມີຄຸນສົມບັດທັດສະນະອັນດີງາມ, ມີຄວາມສາມັກຄີຮັກແພງ ໃຫ້ຄວາມຊ່ວຍເຫຼືອ, ແລກປ່ຽນບົດຮຽນເຊິ່ງກັນ ແລະ ກັນ. ທັງນີ້, ກໍ່ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງການພັດທະນາບ້ານ-ເມືອງ, ສ້າງກໍາລັງກອງຫຼອນເປັນກໍາລັງຫຼັກແຫຼ່ງ, ແຂງແກ່ນໃນການປົກປັກຮັກສາບ້ານເກີດເມືອງນອນຂອງຕົນ, ສ້າງໃຫ້ກອງຫຼອນມີຄວາມຮັບຜິດຊອບສູງຕໍ່ໜ້າທີ່ ປກສ-ປກຊ ທົ່ວປວງຊົນຮອບດ້ານ ແລະ ສ້າງໃຫ້ຄະນະພັກ, ອໍານາດການປົກຄອງບ້ານເພີ່ມທະວີຄວາມຮັບຜິດຊອບເອົາໃຈໃສ່ຕໍ່ວຽກງານໃຫ້ມີຄວາມຮູ້ຮອບດ້ານໃນວຽກງານປ້ອງກັນຕົວ ແລະ ພ້ອມທີ່ຈະເປັນກຳລັງສຳຮອງທີ່ເຂັ້ມແຂງໃນການປົກປັກຮັກສາ ແລະ ສ້າງສາປະເທດຊາດ ອີກຕື່ມ
ແຫລ່ງຂ່າວ ທີມຂ່າວເມືອງຫົງສາ, ແຂວງໄຊຍະບູລີ
Editor: ກຳປານາດ ລັດຖະເຮົ້າ
