ພາຍຫຼັງເສັດສີ້ນ ພິທີເຊັນບົດບັນທຶກມອບ-ຮັບ ແລະ ພິທີທາງສາສະໜາຂອງລາວ ດັ່ງນັ້ນມາໃນວັນທີ 7 ພຶດສະພາ 2018 ຜ່ານມານີ້, ຢູ່ທີ່ສະໂມສອນປົກຄອງແຂວງບໍລິຄໍາໄຊ ຄະນະປະຕິບັດງານພິເສດ ແຂວງບໍລິຄຳໄຊ-ແຂວງຮ່າຕິ່ງ ກໍ່ໄດ້ຈູດທູບທຽນໄຫວ້ອາໄລ ຄັ້ງສຸດທ້າຍ ໃນການຈັດພິທີ ສົ່ງອັດທິທະຫານ ອາສາສະໝັກ ແລະ ຊ່ຽວຊານ ຫວຽດນາມ ທີ່ເສຍຊີວິດໃນປາງສົງຄາມຢູ່ ສປປ ລາວ ຢ່າງເປັນທາງການ ແລະ ສົມກຽດ ເຊິ່ງມີຈຳນວນ 13 ອັດຖິ, ໃນນັ້ນມາຈາກນະຄອນຫຼວງ 3 ອັດທິ, ໃຫ້ກຽດເຂົ້າຮ່ວມພິທີຂອງ ທ່ານ ສຸວັນນີ ໄຊນະນະ ຮອງເລຂາພັກແຂວງ, ປະທານສະພາປະຊາຊົນ ແຂວງບໍລິຄຳໄຊ, ມີ ທ່ານ ດັ້ງ ກວັກ ວິງ ຄະນະປະຈໍາພັກແຂວງ, ຮອງປະທານຄະນະກຳມະການປະຊາຊົນແຂວງຮ່າຕິ່ງ ສສ ຫວຽດນາມ, ມີທີມງານຄະນະປະຕິບັດງານພິເສດ ແຂວງບໍລິຄຳໄຊ-ຮ່າຕິ່ງ ທັງສອງຝ່າຍເຂົ້າຮ່ວມຢ່າງເປັນຂະບວນທີ່ຄຶກຄື້ນຍິ່ງໃຫຍ່.
ຈາກນັ້ນກໍ່ໄດ້ເຄື່ອນອັດທິ ອອກຈາກສະໂມສອນປົກຄອງແຂວງບໍລິຄໍາໄຊ ໄປຕາມເສັ້ນທາງເລກ 4 ເບ ສູ່ເສັ້ນທາງເລກທີ 13 ໃຕ້, ໂດຍມີພະນັກງານຈາກກໍາລັງປ້ອງກັນຊາດ-ປ້ອງກັນຄວາມສະຫງົບ, ພໍ່ແມ່ປະຊາຊົນລາວບັນດາເຜົ່າ ຕະຫຼອດຮອດນັກຮຽນ-ນັກສຶກສາ ເຂົ້າຮ່ວມຄອຍ ຮັບສົ່ງຕາມເສັ້ນທາງເທດສະບານພາຍໃນແຂວງ, ໂດຍການໂບກມື, ຍົກທຸງຊາດລາວ-ທຸງຊາດຫວຽດນາມຢ່າງເປັນຂະບວນ, ດ້ວຍຄວາມໂສກເສົ້າ, ອາໄລອາວອນ ເຖິງວິລະບູລຸດ ທີ່ຈະໄດ້ກັບຄືນສູ່ບ້ານເກີດເມືອງນອນ ຂອງຕົນເອງ. ຕະຫຼອດຕາມສາຍທາງຈາກເທດສະບານແຂວງ-ຫາຊາຍແດນດ່ານສາກົນ-ນໍ້າພາວ ປະຊາຊົນຕາມບ້ານຕ່າງໆຕາມສາຍທາງ ຈະອອກມາຄອຍຢືນຮັບ-ສົ່ງ ເປັນການຈາລຶກບຸນຄຸນ, ຄຸນງາມຄວາມດີຂອງຜູ້ສະຫຼະຊີວິດ ຕໍ່ປະເທດຊາດ ຕໍ່ປະຊາຊົນທັງສອງຊາດລາວ-ຫວຽດນາມ
ແຫລ່ງຂ່າວ ທີມຂ່າວຈາກ ແຂວງບໍລິຄໍາໄຊ
Editor: ກຳປານາດ ລັດຖະເຮົ້າ
