ເມື່ອບໍ່ດົນຜ່ານມາ ຫ້ອງການແຜນການ - ໂຍທາທິການ ແລະ ຂົນສົ່ງ ເມືອງຊໍາໄຕ້ ໄດ້ຈັດກອງປະຊຸມໃຫຍ່ ຄັ້ງທີ 1 ຂອງຕົນ ຂຶ້ນຢູ່ທີ່ຫອງປະຊຸມຂອງຫ້ອງການສຶກສາທິການ ແລະ ກິລາເມືອງຊໍາໃຕ້ ພາຍໃຕ້ການເປັນປະທາງຂອງ ທ່ານ ທອງຫວັງ ຄູນທອນຮຸ່ງມີໄຊ ຄະນະປະຈຳພັກເມືອງ ຮອງເຈົ້າເມືອງ ເປັນກຽດເຂົ້າຮ່ວມມີ ທ່ານ ເພັດໄຊ ວິໄລທອງ ຄະນປະຈຳພັກເມືອງ ຫົວໜ້າຄະນະຈັດຕັ້ງເມືອງ ມີຜູ້ຕາງໜ້າເລຂາສະມາຊິກພັກຫ້ອງການອ້ອມຂ້າງ ເລຂາຄະນະໜ່ວຍພັກ ຕະຫຼອດຮອດສະມາຊິກພັກພາຍໃນໜ່ວຍເຂົ້າຮ່ວມຢ່າງພ້ອມພຽງ.
ຜູ້ເຂົ້າຮ່ວມກອງປະຊຸມໄດ້ຮັບຟັງບົດລາຍງານການເມືອງທັງສອງພາກຈາກ ສະຫາຍ ສຸກກະເສີມ ຄອນສະຫວັດ ເລຂາໜ່ວຍພັກແຜນການ - ໂຍທາທິການ ແລະ ຂົນສົ່ງ ເຊິ່ງບົດລາຍງານການເມືອງພາກທີ 1 ໄດ້ຍົກໃຫ້ເຫັນ ດ້ານດີຜົນງານການາຊີ້ນຳນຳພາຂອງຄະນະພັກຊຸດເກົ່າຍາດມາໄດ້ ເຊັ່ນ: ວຽກງານການເມືອງ, ແນວຄິດ, ວຽກງານວິຊາສະເພາະ, ວຽກງານຄົມມະນາຄົມຂົນສົ່ງ, ວຽກງານພະລັງງານໄຟ້າ ແລະ ບໍ່ແຮ່, ວຽກງານໄປຊະນີໂທລະຄົມ, ວຽກງານນ້ຳປະປາ, ວຽກງານເສດຖະກິດ, ວຽກງານການຈັດຕັ້ງ - ພະນັກງານ ແລະ ວຽກງານອົງການຈັດຈັ້ງມະຫາຊົນ. ຄຽງຄູ່ກັບດ້ານດີກໍມີດ້ານອ່ອນຂໍ້ຄົງຄ້າງ ເຊັ່ນ: ວຽກງານແນວຄິດການເມືອງ ການສຶກສາອົບຮົມແນວຄິດໃຫ້ສະມາຊິກພັກຍັງບໍ່ທັນເລິກເຊິ່ງຂາດດ້ານທິດສະດີ, ຂອບເຂດຄວາມຮູ້ມີຈຳກັດ, ຍັງມີແນວຄິດຈົ່ງຈຽມເລົ່ານີ້ເປັນຕົ້ນ.
ກອງປະຊຸມຍັງໄດ້ເປີດໂອກາດໃຫ້ສະມາຊິກພັກ ລວມທັງແຂກທີ່ເຂົ້າຮ່ວມພ້ອມກັນປະກອບຄຳຄິດຄຳເຫັນ ຢ່າງກົງໄປກົງມາ ຜ່ານການສະຫຼຸບຕີລາຄາລວມວຽກງານ ບໍ່ວ່າຈະເປັນວຽກພັກ ລວມເຖິງວຽກລັດແມ່ນໄດ້ມີການວາງແຜນການຈັດຕັ້ງປະຕິບັດ ໂດຍເລີມແຕ່ປີ 2018 ຈົນເຖິງ ປີ 2022 ແມ່ນຈະໃຫ້ບັນລຸຕາມຄາດໝາຍ ແລະ ປະກົດຜົນເປັນຈິງໃນ ທຸກໆ ຂົງເຂດວຽກງານ.
ກອງປະຊຸມໄດ້ຮັບຮອງເອົາບົດລາຍງານການເມືອງທັງສອງພາກ ກອງປະຊຸມໄດ້ຜ່ານມະຕິຕົກລົງ ສະບັບເລກທີ 25 ຊຳໃຕ້ ວັນທີ 13 ມີນາ 2018 ວ່າດ້ວຍການແຍກໜ່ວຍພັກແຜນການ - ໂຍທາທິການ ແລະ ຂົນສົ່ງອອກເປັນສອງໜ່ວຍພັກ ຄື: ໜ່ວຍພັກໂຍທາທິການ ແລະ ຂົນສົ່ງ, ໜ່ວຍພັກແຜນການ ມອບໃຫ້ພາກສ່ວນທີ່ກ່ຽວຂ່ອງຮັບຜິດຊອບ ຈາກນັ້ນທັງສອງໜ່ວຍພັກໄດ້ເປີດກອງປະຊຸມຄັ້ງປະຖົມມະລືກຂຶ້ນ ບັນດາສະຫາຍສະມາຊິກໜ່ວຍພັກພາຍໃນໜ່ວຍໄດ້ໃຊ້ສິດປະຊາທິໄຕເລືອກຕັ້ງເອົາຄະນະພັກຊຸດໃໝ່ ມີໜ່ວຍພັກລະ 5 ສະຫາຍ ເລືອກເອົາໜ່ວຍລະ 3 ສະຫາຍ.
ຜ່ານການປ່ອນບັດຄັດເລືອກໄດ້ເລຂາຄະນະພັກຊຸດໃໝ່ ໄດ້ເລຂາຄະນະພັກໂຍທາທິການ ແລະ ຂົນສົ່ງ ເລືອກໄດ້ 3 ສະຫາຍ, ຍິງ 1 ສະຫາຍ, ສະຫາຍ ອຸທິດ ອຸ່ນຄຳວິເຮືອງ ເປັນເລຂາ ສະຫາຍ ນາງ ພຸດແສງ ພິມວົງສາ ເປັນຮອງເລຂາ ແລະ ສະຫາຍ ແກ ພິມໂຍວົງ ເປັນຄະນະ ສ່ວນເລຂາຄະນະພັກແຜນການເລືອກໄດ້ 3 ສະຫາຍ ຍິງ 1 ສະຫາຍ, ສະຫາຍ ຍອດ ສີດາວົງ ສະຫາຍ ນາງ ທອງ ສຸໄລພອນ ສະຫາຍ, ສອນທະສັກ ມາລາວັນ
ໃນຕອນທ້າຍກອງປະຊຸມ ທ່ານ ທອງຫວັງ ຄູນທອນຮຸ່ງມີໄຊ ໄດ້ມີຄໍາເຫັນໂອລົມຕໍ່ກອງປະຊຸມ ທ່ານໄດ້ກ່າວຍ້ອງຍໍຊົມເຊີຍຕໍ່ຜົນງານທີ່ຄະນະພັກຊຸດເກົ່າ ພ້ອມທັງສະມາຊິກພັກໃນໜ່ວຍ ຍາດມາໄດ້ ແລະ ທ່ານຍັງໃຫ້ຄຳເຫັນເນັ້ນຫຍ້ຳຕື່ມກ່ຽວກັບການສະຫຼຸບຕີລາຄາລ່ວມ, ການສະຫຼຸບແມ່ນໃຫ້ຮູ້ຈະແຈ້ງ, ສັງເກດຕີລາຄາ, ບໍ່ໃຫ້ມີແນວຄິດຈົ່ງຈຽມບໍ່ກ້າສະແດງອອກ, ມີແບບແຜນວຽກຂອງຕົນລະອຽດ ແລະ ອື່ນໆ... ນອກນີ້ທ່ານຍັງໄດ້ຮຽກຮ້ອງໃຫ້ຄະນະພັກຊຸດໃໝ່ທີ່ໄດ້ຮັບເລືອກ ຈົ່ງເອົາໃຈໃສ່ເຊື່ອມຊຶມບັນດານິຕິກຳໂດຍສະເພາະວຽກງານພັກ ກໍຄືວຽກງານການເມືອງ, ມີແບບແຜນການຊີ້ນຳນຳພາໃນຂົງເຂດວຽກງານທີ່ຕົນເອງຮັບຜິດຊອບ, ສຸມໃສ່ສ້າງໜ່ວຍພັກເຂັ້ນແຂງ, ປອດໄສ ແລະ ໜັກແໜ້ນນຳເອົາແນວທາງຂອງພັກຂັ້ນເທິງ, ລະບຽບກົດໝາຍຂອງລັດມາເຜີຍແຜ່ເຊື່ອມຊຶ່ມໃຫ້ພະນັກງານໃນຂອບເຂດທີ່ຕົນຮັບຜິດຊອບ, ກ້າເຮັດກ້າຮັບຜິດຊອບ, ເອົາໃຈໃສ່ວຽກງານວິຊາສະເພາະ, ເປັນແບບຢ່າງໃນການປະຕິບັດທຸກຂໍ້ກຳນົດກົດລະບຽບຢ່າງເຄັ່ງຄັດ, ມີການປະສານງານຢ່າງເປັນປົດກະຕິກັບຂະແໜງການທີ່ກ່ຽວຂ້ອງ ເພື່ອຄວາມສະດວກສະບາຍໃນການຈັດຕັ້ງປະຕິບັດ ເພື່ອໃຫ້ວຽກງານນັ້ນໆ ສຳເລັດຕາມກຳບົດເວລາ ບັນລຸຕາມຄາດໝາຍທີ່ວາງໄວ້.
ກອງປະຊຸມດັ່ງກ່າວໄດ້ດຳເນີນໄປເປັນເວລາ 1 ຕອນ ແລະ ສຳເລັດລົງຢ່າງຈົບງາມ
Editor: ກຳປານາດ ລັດຖະເຮົ້າ
