ກອງປະຊຸມ ຝຶກອົບຮົມວຽກງານສັງລວມ - ຫາງສຽງສັງຄົມ, ຂອງຫ້ອງການໂຄສະນາ-ອົບຮົມ ເມືອງຊະນະສົມບູນ ຊຸດທີ 1. ໄດ້ເປີດຂຶ້ນໃນວັນທີ 7 ພຶດສະພາ 2018 ຜ່ານມາ ແລະ ສຳເລັດລົງຢ່າງເປັນທາງການ ໃນວັນທີ 8 ພຶດສະພາ 2018 ນີ້, ຢູ່ທີ່ສະໂມສອນຂອງເມືອງດັ່ງກ່າວ ເຊິ່ງໄດ້ດໍາເນີນຢູ່ໃນກາງບັນຍາກາດທີ່ທົ່ວພັກ - ທົ່ວລັດ ພະນັກງານ ທະຫານ-ຕໍາຫຼວດ ພໍ່ແມ່ປະຊາຊົນບັນດາເຜົ່າຊາວເມືອງຊະນະສົມບູນ, ພວມຢູ່ໃນໄລຍະຂຸ້ນຂ້ຽວສືບຕໍ່ຈັດຕັ້ງຜັນຂະຫຍາຍ ມະຕິ 10 ສະໄໝທີ 7 ຂອງກອງປະຊຸມຄົບຄະນະບໍລິຫານງານພັກເມືອງ, ແລະ ກໍ່ໄດ້ສຳເລັດການສະເຫຼີມສະຫຼອງຕ້ອນຮັບປີທ່ອງທ່ຽວລາວ 2018 ເມື່ອບໍ່ດົນມານີ້.
ໂດຍໃຫ້ກຽດເປັນປະທານກ່າວເປີດ ແລະ ຜ່ານເອກະສານຂອງ ທ່ານ ສົມບູນ ເຮືອງວົງສາ ກຳມະການພັກແຂວງ ເລຂາພັກເມືອງ ເຈົ້າເມືອງໆຊະນະສົມບູນ, ຜູ້ຊີ້ນຳວຽກງານແນວຄິດຂັ້ນເມືອງ, ພ້ອມດ້ວຍ ທ່ານ ສົມຈິດ ແພງສະຫວັດ. ຮອງຫົວໜ້າຄະນະໂຄສະນາ - ອົບຮົມ ແຂວງຈຳປາສັກ, ມີພະນັກງານການນຳຫຼັກແຫຼ່ງ ວິຊາການມາຈາກຄະນະໂຄສະນາອົບຮົມແຂວງຈຳປາສັກ, ນັກສໍາມະນາກອນ ຫ້ອງການອ້ອມຂ້າງເມືອງ, ກົມກອງທະຫານ - ຕຳຫຼວດ ພື້ນຖານ ກຸ່ມ - ບ້ານ ເຂົ້າຮ່ວມ 52 ທ່ານ, ຍິງ 6 ທ່ານ.
ທ່ານ ສອນໄຊ ກໍລະກັນ ຫົວໜ້າຄະນະໂຄສະນາ - ອົບຮົມເມືອງຊະນະສົມບູນ, ໄດ້ຜ່ານຂໍ້ຕົກລົງຂອງທ່ານເຈົ້າເມືອງໆຊະນະສົມບູນ, ວ່າດ້ວຍການອະນຸມັດເປີດຊຸດຝຶກອົບຮົມ, ວຽກງານຕິດຕາມ, ເກັບກຳສະພາບແນວຄິດ. ຫາງສຽງ - ສັງຄົມ ປະຈໍາປີ 2018 . ກອງປະຊຸມ. ໄດ້ພ້ອມກັນສືບຕໍ່ຄົ້ນຄວ້າຮ່ຳຮຽນເອກະສານ ບັນຫາພື້ນຖານກ່ຽວກັບວຽກງານຫາງສຽງ - ສັງຄົມ, ເອກະສານວິທີເກັບກຳ ແລະ ນຳໃຊ້ຫາງສຽງ - ສັງຄົມ, ວຽກງານຫາງສຽງສັງຄົມເຂົ້າໃນວຽກງານການເມືອງ - ແນວຄິດ, ຕາໜ່າງເພື່ອນຮ່ວມງານ, ວຽກງານຄົ້ນຄວ້າສັງລວມ, ແລະ ວຽກງານຄົ້ນຄວ້າແກ້ໄຂຂໍ້ຂ້ອງໃຈ.
ທ່ານ ສົມບູນ ເຮືອງວົງສາ ກຳມະການພັກແຂວງ ເລຂາພັກເມືອງ ເຈົ້າເມືອງໆຊະນະສົມບູນ ໄດ້ໂອ້ລົມເນັ້ນໜັກ ເຊິ່ງຄຳເວົ້າບາງຕອນໄດ້ຍົກໃຫ້ເຫັນ, ຄວາມສຳນຶກກ່ຽວກັບຫາງສຽງ - ສັງຄົມ ແລະ ຂ່າວລື, ຫາງສຽງ- ສັງຄົມເກີດຂຶ້ນມີ 4 ໄລຍະ ຄື: ໄລຍະຮັບຮູ້ຂໍ້ມູນຂ່າວສານ, ໄລຍະເກີດຄວາມຄິດ, ຄວາມເຫັນຂອງບັນດາບຸກຄົນ, ໄລຍະການແລກປ່ຽນຄວາມຄິດ, ຄວາມເຫັນລະຫວ່າງບຸກຄົນ, ໄລຍະສັງລວມບັນດາຄວາມເຫັນຫາງສຽງ-ສັງຄົມ, ປັດໃຈທີ່ສົ່ງຜົນກະທົບ ຕໍ່ການກຳເນີດຫາງສຽງ - ສັງຄົມ ມີ 2 ປັດໃຈ ຄື: ປັດໃຈຄວາມຮັບຮູ້, ປັດໃຈສັງຄົມ, ຈາກນັ້ນຫາງສຽງ - ສັງຄົມແບ່ງອອກເປັນຫຼາຍຂົງເຂດ, ເຊິ່ງມີ ຫາງສຽງຕໍ່ແນວທາງນະໂຍບາຍຂອງພັກ ແລະ ລະບຽບກົດ ໝາຍຂອງລັດ, ຫາງສຽງຕໍ່ແຜນການວຽກງານຂອງສຳນັກງານ - ອົງການ ອໍານາດການປົກຄອງທ້ອງຖິ່ນ, ຫາງສຽງຕໍ່ຂົງເຂດເສດຖະກິດ, ການເມືອງ, ວັດທະນະທໍາ ສຶກສາ, ສາທາລະນະສຸກ, ປກຊ - ປກສ, ຫາງສຽງຕໍ່ກັບບັນດາເຫດການຕ່າງໆ ທັງພາຍໃນ ແລະ ຕ່າງປະເທດ, ດ້ານຕັ້ງໜ້າຂອງຂ່າວລື, ດ້ານຫຍ້ທໍ້ຂ່າວລື, ຖ້ອຍທຳນອງບິດເບືອນ ສັດຈະທຳຂອງຫາງສຽງ - ສັງຄົມ, ລັກສະນະຫຼາຍຮູບຫຼາຍສີ ແລະ ມີຄວາມສັບສົນອື່ນໆ.
ຕອນທ້າຍກອງປະຊຸມ ທ່ານ ສົມບູນ ເຮືອງວົງສາ ເລຂາພັກເມືອງ, ເຈົ້າເມືອງໆຊະນະສົມບູນ ກໍໄດ້ໃຫ້ກຽດມອບໃບຢັ້ງຢືນ ໃຫ້ແກ່ນັກສໍາມະນາກອນທີ່ໄດ້ເຂົ້າຮ່ວມຝຶກອົບຮົມໃນຄັ້ງນີ້ ຈຳນວນ 52 ທ່ານ, ຍິງ 6 ທ່ານ, ຂຶ້ນຢ່າງສົມກຽດ ແລະ ໄດ້ສໍາເລັດລົງໄປດ້ວຍບັນຍາກາດຢ່າງຈົບງາມ
Editor: ກຳປານາດ ລັດຖະເຮົ້າ
