ກອງປະຊຸມຄົບຄະນະບໍລິຫານງານພັກເມືອງຫົງສາ ຄັ້ງທີ 12 ສະໄໝທີ 7, ໄດ້ອັດລົງຢ່າງເປັນທາງການ,ໃນຕອນເຊົ້າຂອງວັນທີ 9 ພຶດສະພາ 2018 ຜ່ານມານີ້, ຢູ່ທີສະໂມສອນໃຫຍ່ຂອງເມືອງ, ພາຍຫຼັງທີ່ໄດ້ດຳເນີນມາເປັນເວລາ 1 ວັນເຄິ່ງ, ພາຍໃຕ້ການເປັນປະທານ ຂອງ ສະຫາຍ ຄໍາເພັດ ພົມມະລາດ ເລຂາພັກເມືອງ ເຈົ້າເມືອງໆຫົງສາ, ມີຄະນະປະຈໍາພັກເມືອງ, ກໍາມະການພັກເມືອງ, ເລຂາຄະນະພັກຮາກຖານ, ເລຂາໜ່ວຍພັກ,ຫົວໜ້າຫ້ອງການ, ກົມກອງ, ອົງການ ເຂົ້າຮ່ວມທັງໝົດ 33 ສະຫາຍ

ໃນກອງປະຊຸມຄັ້ງນີ້, ໄດ້ພ້ອມກັນຄົ້ນຄວ້າເປັນເອກະພາບ ຮັບຮອງເອົາ ບົດສະຫຼຸບຕີລາຄາການຊີ້ນຳ-ນຳພາ ຈັດຕັ້ງປະຕິບັດມະຕິ ກອງປະຊຸມຄົບຄະນະບໍລິຫານງານພັກເມືອງຫົງສາ ຄັ້ງທີ 11 ສະໄໝທີ 7 ໃນ 3 ເດືອນຜ່ານມາ ແລະ ທິດທາງແຜນການໃນຕໍ່ໜ້າ, ບົດສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 3 ເດືອນຜ່ານມາ ແລະ ທິດທາງແຜນການໃນຕໍ່ໜ້າ,ບົດລາຍງານການເກັບກູ້ພືດລະດູແລ້ງ ແລະ ແຜນການກະກຽມຜະລິດລະດູຝົນ ຕິດພັນກັບການວາງແຜນຕ້ານແລ້ງ-ຕ້ານຖ້ວມ, ໃນຕະລອດໄລຍະການຊີ້ນຳ-ນຳພາຂອງຄະນະບໍລິຫານງານພັກເມືອງ 3 ເດືອນຜ່ານມາ, ໄດ້ສຸມໃສ່ສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ ທະຫານ-ຕຳຫຼວດ ແລະ ປະຊາຊົນບັນດາເຜົ່າ, ໂດຍການນໍາເອົາແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມູນເຊື້ອວັນສຳຄັນຂອງຊາດ, ຈັດຕັງເຜີຍແຜ່ເຊື່ອມຊືມໃຫ້ທົ່ວເຖິງ, ໄດ້ເຮັດໃຫ້ເມືອງຫົງສາ ມີສັດຖຽນລະພາບ ທາງດ້ານການເມືອງທີ່ໜັກແໜ້ນ, ມີຄວາມສະຫງົບ ແລະເປັນລະບຽບຮຽບຮ້ອຍໂດຍພື້ນຖານ, ເສດຖະກິດ ມີການຂະຫຍາຍຕົວຕໍ່ເນື່ອງ, ການຂຸດຄົ້ນຈັດເກັບລາຍຮັບເຂົ້າງົບປະມານໄດ້ທັງໝົດ 5,33 ຕື້ກີບ ເທົ່າກັບ 42,84 ສ່ວນຮ້ອຍ ຂອງແຜນການປີ, ປະຕິບັດລາຍຈ່າຍທັງໝົດ 3 ຕື້ກວ່າກີບ, ເທົ່າກັບ 21,85 ສ່ວນຮ້ອຍ ຂອງແຜນການປີ, ບັນດາໂຄງການກໍ່ສ້າງພື້ນຖານໂຄງລ່າງໄດ້ຮັບການສຶບຕໍ່ຈັດຕັ້ງປະຕິບັດ, ການຜະລິດລະດູແລ້ງ ປະຕິບັດໄດ້ 568 ກວ່າເຮັກຕາ ເທົ່າກັບ 51,02 ສ່ວນຮ້ອຍ, ຂອງແຜນການ, ພືດສິນຄ້າ 88,9 ເຮັກຕາ, ພືດອຸດສາຫະກຳ 118 ກວ່າເຮັກຕາ ແລະ ສະໜອງຊີ້ນປາໄດ້ 162,48 ໂຕນ, ສຸມໃສ່ ຈັດພິທີເປີດນຳໃຊ້ແຫຼ່ງທ່ອງທ່ຽວຢູ່ພາຍໃນເມືອງ 9 ຈຸດ, ມີ 15 ແຫ່ງ ແລະ ປຸກລະດົມການຊ່ວຍເຫຼືອປະຊາຊົນ ທີ່ປະສົບໄພພິບັດຕ່າງໆ ໄດ້ຢ່າງທັນການ. ກອງປະຊຸມກໍ່ໄດ້ຮັບຟັງການປະກອບຄໍາຄິດ ຄໍາເຫັນຈາກທຸກພາກສ່ວນ ຕໍ່ຜົນງານການນຳພາ, ດ້ານອ່ອນ ຂໍ້ຄົງຄ້າງ ແລະ ກໍານົດວິທີແກ້ໄຂ ຢ່າງກົງໄປກົງມາ ດ້ວຍຄວາມຮັບຜິດຊອບສູງ.

ໃນຕອນທ້າຍຂອງກອງປະຊຸມ ກໍ່ໄດ້ເປັນກຽດຮັບຟັງ ການໂອ້ລົມ ຂອງ ສະຫາຍ ຄໍາເພັດ ພົມມະລາດ ເລຂາພັກເມືອງເຈົ້າເມືອງໆຫົງສາ, ປະທານກອງປະຊຸມ, ຊຶ່ງກອ່ນອື່ນ ສະຫາຍກໍ່ໄດ້ສະແດງຄວາມ ຍ້ອງຍໍຊົມເຊີຍ ຕໍ່ຜົນສຳເລັດ ຂອງການນຳພາ ຈັດຕັ້ງປະຕິບັດວຽກງານດ້ານຕ່າງໆທີ່ຍາດມາໄດ້ໄລຍະ3ເດືອນຜ່ານມາ, ພ້ອມດຽວກັນສະຫາຍກໍ່ໄດ້ເໜັ້ນໜັກໃຫ້ຄະນະພັກ, ຄະນະນໍາທຸກພາກສ່ວນ ຈົ່ງເຊີດຊູຄວາມເປັນເຈົ້າການ ເປັນແບບຢ່າງນຳໜ້າໃນທຸກດ້ານ, ພ້ອມກັນຈັດຕັ້ງຜັນຂະຫຍາຍ ນຳພາປະຕິບັດມະຕິກອງປະຊຸມຄົບຄະນະບໍລິຫານງານພັກເມືອງ ຄັ້ງທີ 12 ສະໄໝທີ 7 ນີ້, ໃຫ້ເກີດມີໝາກຜົນຕົວຈິງ, ພ້ອມກັນສ້າງເມືອງຫົງສາ ພັດທະນາເຂັ້ມແຂງຮອບດ້ານ, ຕາມທິດ ສູ້ຊົນໃຫ້ເປັນເມືອງອຸດສາຫະກຳ ຕິດພັນກັບການບໍລິການ ການທ່ອງທ່ຽວ ທີ່ເປັນມິດກັບສິ່ງແວດລ້ອມ

ທີມຂ່າວ ເມືອງຫົງສາ

Editor: ກຳປານາດ ລັດຖະເຮົ້າ