ຄະນະຈັດຕັ້ງ ກວດກາ ເມືອງຊໍາໄຕ້, ແຂວງຫົວພັນ ໄດ້ນໍາເອົາມະຕິ, ຄຳສັ່ງ ຂອງກົມການເມືອງສູນກາງພັກ ມາເຜີຍແຜ່ເຊື່ອມຊືມໃຫ້ພະນັກງານສະມາຊິກພັກ ທີ່ສະໂມສອນຂອງເມືອງ ໂດຍພາຍໃຕ້ການເປັນປະທານຂອງ ທ່ານ ຮິນທອງ ດວງຈັນສຸກ ກຳມະການພັກແຂວງ ເລຂາພັກເມືອງ ເຈົ້າເມືອງຊໍາໃຕ້, ເຂົ້າຮ່ວມມີ ຄະນະປະຈໍາ, ກໍາມະການພັກເມືອງ, ຫົວໜ້າ -ຮອງຫົວໜ້າຫ້ອງການ ແລະ ພະນັກງານສະມາຊິກພັກເຂົ້າຮ່ວມທັງໝົດ 131 ທ່ານ, ຍີງ 34 ທ່ານ.
ໃນກອງປະຊຸມ ທ່ານ ພອນຈັນ ຂະທຸມພົມ ຮອງເລຂາພັກເມືອງ ຮອງເຈົ້າເມືອງຊໍາໄຕ້ ໄດ້ຂື້ນຜ່ານເນື້ອໃນມະຕິເລກທີ 030, ເລກທີ 031 ແລະ 032 ຂອງກົມການເມືອງສູນກາງພັກ, ວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ, ວຽກງານຄຸ້ມພະນັກງານ ແລະ ວຽກງານສ້າງແຜນກຳນົດພະນັກງານນຳພາ-ຄຸ້ມຄອງ. ນອກນັ້ນ, ຍັງໄດຮັບຟັງເນື້ອໃນຂໍ້ກຳນົດ ເລກທີ 05 / ຄກສພ ວ່າດ້ວຍ: ການຕິດຕາມກວດກາ ການຈັດຕັ້ງປະຕິບັດຜົນຂອງການກວດກາ, ບົດແນະນຳເລກທີ 27, ເລກທີ 04, ແລະ ເລກທີ 36 ຂອງອົງການກວດກາລັດຖະບານ ກ່ຽວກັບການດໍາເນີນຄະດີການສໍ້ລາດບັງຫຼວງ, ສິດຕົກລົງວິໄນຂັ້ນກ່າວເຕືອນ, ປ່ຽນແປງ ຫຼື ລົບລ້າງຮູບການວິໄນ ຂອງຄະນະກວດກາພັກຂັ້ນເມືອງ ແລະ ທຽບເທົ່າຂື້ນໄປ ແລະ ການກວດກາ ຕາມຜົນຂອງການກວດສອບ.
ກອງປະຊຸມຄັ້ງນີ້ ທ່ານ ຮີນທອງ ດວງຈັນສຸກ ເລຂາພັກເມືອງ ເຈົ້າເມືອງຊໍາໃຕ້ ຍັງໄດ້ໃຫ້ກຽດມອບໃບຢັ້ງຢືນຂອງຄະນະປະຈຳພັກແຂວງ, ເປັນໜ່ວຍພັກແຂງຮູ້ນໍາພາຮອບດ້ານໃຫ້ 27 ໜ່ວຍໃນທົ່ວເມືອງ, ພ້ອມທັງ ຜ່ານບົດແນະນໍາເລກທີ 01/ກມສພ ວ່າດ້ວຍການເພີ່ມທະວີ ການກໍ່ສ້າງ ໜ່ວຍພັກປອດໃສ, ເຂັ້ມແຂງ, ໜັກແໜັ້ນ. ທັງນີ້ກໍ່ເພື່ອ, ເປັນການຜັນຂະຫຍາຍເນື້ອໃນມະຕິຂອງກົມການເມືອງສູນກາງພັກ ລົງສູ່ຮາກຖານ ພະນັກງານສະມາຊິກພັກ ເຂົ້າໃຈໃນການກຳນົດຂື້ນແຜນກໍ່ສ້າງພັກ ແລະ ຄຸ້ມຄອງພະນັກງານ
ແຫລ່ງຂ່າວ ຈາກຫ້ອງການຖະແຫຼງຂ່າວ ເມືອງຊຳໃຕ້
Editor: ກຳປານາດ ລັດຖະເຮົ້າ
