ກາງເດືອນພຶດສະພາ 2018 ນີ້, ສະມາຊິກສະພາແຫ່ງຊາດ ເຂດເລືອກຕັ້ງທີ 7 ແລະ ສະຊິກສະພາປະຊາຊົນ ແຂວງໄຊຍະບູລີ ໄດ້ລົງຕິດຕາມກວດກາ, ການຈັດຕັ້ງປະຕິບັດມະຕິກອງປະຊຸມສະໄໝສາມັນ ເທື່ອທີ 2, ເທື່ອທີ 3 ແລະ ເກດ 4 ຂອງສະພາປະຊາຊົນແຂວງໄຊຍະບູລີ ຊຸດທີ 1 ຢູ່ທີ່ສະໂມສອນເມືອງຫົງສາ ຊື່ງນໍາໂດຍ ທ່ານນາງ ອິດມະນີ ຈັນທະຄູນ ສະມາຊິກສະພາແຫ່ງຊາດ ເຂດເລືອກຕັ້ງທີ 7 ຮອງປະທານສະພາປະຊາຊົນແຂວງໄຊຍະບູລີ, ມີ ທ່ານນາງ ດາວິນ ລາດຊະກິດ, ຮອງເຈົ້າເມືອງໆຫົງສາ, ມີບັນດາທ່ານສະມາຊິກສະພາປະຊາຊົນແຂວງໄຊຍະບູລີ ເຂດເລືອກຕັ້ງເມືອງຫົງສາ, ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ, ຮອງຫົວໜ້າຫ້ອງການ-ອົງການ; ກົມກອງ; ພະນັກງານຫຼັກແຫຼ່ງ,ບໍລິສັດ ລັດວິສາຫະກິດ ແລະ ນັກທຸລະກິດຜູ້ປະກອບການພາຍໃນເມືອງເຂົ້າຮ່ວມຢ່າງພ້ອມພຽງ.

ໃນໂອກາດດັ່ງກ່າວ ທ່ານນາງ ດາວິນ ລາດຊະກິດ ຮອງເຈົ້າເມືອງໆຫົງສາ ກໍ່ໄດ້ຂື້ນລາຍງານການຈັດຕັ້ງປະຕິບັດວຽກງານຮອບດ້ານຢູ່ພາຍໃນເມືອງ, ໃນໄລຍະຜ່ານມາເສດຖະກິດພາຍໃນເມືອງຂະຫຍາຍຕົວໃນລະດັບ 11,3 ສ່ວນຮ້ອຍ ຕໍ່ປີ, ລວມຍອດລາຍຮັບທັງໝົດໄດ້ 539,92 ຕື້ກີບ ສະເລ່ຍໃສ່ຫົວຄົນໜື່ງໄດ້ 18 ລ້ານກວ່າກີບ, ເທົ່າກັບ 2.350 ໂດລາສະຫະລັດ, ໜື່ງປີຜ່ານມາເມືອງຫົງສາ ສາມາດຈັດເກັບລາຍຮັບເຂົ້າຫົົົົົົົົົົົົົົົົົົົົົງບປະມານໄດ້ທັງໝົດ 16,66 ຕື້ກີບ, ປະຕິບັດລາຍຈ່າຍທັງ ໝົດ 12,96 ຕື້ກິບ. ປະຈຸບັນສາມາດຈັດເກັບລາຍຮັບເຂົ້າງົບປະມານ 6,29 ຕື້ກິບ, ໃນປີ 2018 ໄດ້ສືບຕໍ່ຈັດຕັ້ງປະຕິບັດໂຄງການລົງທຶນຂອງລັດ ຈຳນວນ 7 ໂຄງການ, ມູນຄ່າ 27,48 ຕື້ກີບ, ໃນນີ້ໂຄງການລົງທຶນຂອງລັດ ຈຳນວນ 4 ໂຄງການ ມູນຄ່າ 6,82 ຕື້ກີບ, ເຊິ່ງປະຈຸບັນທົ່ວເມືອງຫົງສາ ມີບ້ານວັດທະນະທໍາ ແລ້ວ 27 ບ້ານ, ບ້ານປອດຄະດີ ຈໍານວນ 34 ບ້ານ, ບ້ານປອດຢາເສດຕິດ ຈໍານວນ 16 ບ້ານ, ບ້ານແບບຢ່າງປ້ອງກັນຊາດເຂັ້ມແຂງ ຈໍານວນ 34 ບ້ານ, ບ້ານແບບຢ່າງປ້ອງກັນຄວາມສະຫົງບດີ ຈໍານວນ 28 ບ້ານ, ບ້ານແບບຢ່າງສາທາລະນະສຸກ ຈໍານວນ 28 ບ້ານ ແລະ ບ້ານແບບຢ່າງແມ່ຍິງ 3 ດີ, ພ້ອມນັ້ນຍັງບັນດາຜູ່ເຂົ້າຮວ່ມໄດ້ຮັບຟັງການຊີ້ແຈງຂອງຂະແໜງການ ທີ່ກ່ຽວຂ້ອງເມືອງ ຕາມການເຈາະຈີ້ມຂອງສະມາຊິກສະພາປະຊາຊົນແຂວງ, ເປັນຕົ້ນແມ່ນ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, 13 ຄາດໝາຍສູ້ຊົນຂອງຂົງເຂດສຶກສາ ທິການ ແລະ ກິລາ, 10 ຄາດໝາຍສູ້ຊົນຂອງຂົງເຂດສາທາລະນະສຸກ, ສະພາບການແກ້ໄຂປະກົດການຫຍໍ້ທໍ້ໃນສັງຄົມ, ການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ແລະ ຮັບຟັງລາຍງານການຄຸ້ມຄອງການນໍາເຂົ້າສານເຄມີຮັບໃຊ້ກະສິກໍາຂອງເມືອງ, ວຽກງານຂົງເຂດວັດທະນະທໍາສັງຄົມ, ວຽກງານຂົງເຂດເສດຖະກິດ ແລະ ຂົງເຂດການເມືອງໃນໄລຍະຜ່ານມາ ຍົກໃຫ້ເຫັນ ດ້ານດີ, ດ້ານອ່ອນ, ຂໍ້ຄ້າງ ແລະ ບົດຮຽນທີ່ຖອດຖອນໄດ້.

ໃນຕອນທ້າຍ ກອງປະຊຸມ ທ່ານນາງ ອິດມະນີ ຈັນທະຄູນ ກໍ່ໄດ້ໃຫ້ກຽດໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ອົງການປົກຄອງເມືອງຍາດມາໄດ້ ໃລຍະຜ່ານມາ, ຄຽງຄູ່ກັນນັ້ນ ທ່ານຍັງໄດ້ເໜັ້ນໜັກໃຫ້ສືບຕໍ່ສຶກສາອົບຮົມການເມືອງ-ແນວຄິດ ໃຫ້ແກ່ຖັນແຖວພະນັກງານ, ເອົາໃຈໃສ່ສືບຕໍ່ຈັດຕັ້ງປະຕິບັດບັນດາຄາດໝາຍສູ້ຊົນໃຫ້ບັນລຸ ເອົາໃຈໃສ່ໃນການປະຕິບັດລະບຽບກົດໝາຍຂອງລັດ ໃຫ້ເຂັ້ມງວດ, ສືບຕໍ່ເອົາໃຈໃສ່ສະກັດກັ້ນ ແລະ ຕ້ານທຸກປະກົດການຫຍໍ້ທໍ້ໃນສັງຄົມ ໃຫ້ຫຼຸດນ້ອຍຖອຍລົງ ແລະ ຮຽກຮ້ອງໃຫ້ອົງການປົກຄອງເມືອງ ຈົ່ງສືບຕໍ່ເອົາໃຈໃສ່ຕິດຕາມກວດກາ, ຊຸກຍູ້ການຈັດຕັ້ງປະຕິບັດໂຄງການລົງທຶນຂອງລັດໃຫ້ເຂັ້ມງວດ, ທັງນີ້ ກໍ່ເພື່ອເປັນການລົງເກັບກໍາຂໍ້ມູນ ເພື່ອຊຸກຍູ້ການຈັດຕັ້ງຜັນຂະຫຍາຍບັນດາມະຕິກອງປະຊຸມສະໄໝສາມັນ ຂອງສະພາປະຊາຊົນແຂວງໄຊຍະບູລີ ຊຸດທີ 1 ໃຫ້ໄດ້ຮັບຜົນສໍາເລັດຕາມຄາດໝາຍ ແລະ ເພື່ອເປັນການກະກຽມຂໍ້ມູນໃຫ້ແກ່ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ 8 ທີ່ຈະໄຂຂື້ນຢ່າງເປັນທາງການໃນຕົ້ນເດືອນມິຖຸນາ ທີ່ຈະມາເຖີງນີ້

Editor: ກຳປານາດ ລັດຖະເຮົ້າ