ເພື່ອຈັດຕັ້ງຜັນຂະຫຍາຍມະຕິ ກົມການເມືອງສູນກາງພັກ ສະບັບເລກທີ 032/ກມສພ, ລົງວັນທີ 3 ມັງກອນ 2018 ແລະ ບົດແນະນຳຂອງຄະນະສູນກາງພັກ ສະບັບເລກທີ 292/ຄຈສພ, ລົງວັນທີ 26 ເມສາ 2018 ວ່າດ້ວຍວຽກງານສ້າງແຜນກຳນົດພະນັກງານ ນຳພາ-ຄຸ້ມຄອງ.
ໃນວັນທີ 21 ພຶດສະພາ 2018 ຢູ່ທີ່ສະໂມສອນກະຊວງຍຸຕິທຳ ໄດ້ຈັດກອງປະຊຸມສ້າງແຜນກຳນົດພະນັກງານ ນຳພາ-ຄຸ້ມຄອງ ຂຶ້ນ ໂດຍການເປັນປະທານຂອງ ສະຫາຍ ໄຊສີ ສັນຕິວົງ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງຍຸຕິທຳ, ມີບັນດາສະຫາຍກຳມະການຄະນະພັກກະຊວງ, ຮອງລັດຖະມົນຕີ, ເລຂາຄະນະໜ່ວຍພັກ ພ້ອມດ້ວຍສະມາຊິກພັກ ທີ່ຢູ່ໃນການຄຸ້ມຄອງຂອງໜ່ວຍພັກ, ພະນັກງານບຳນານອະດີດຮອງລັດຖະມົນຕີ ທີ່ຂຶ້ນກັບກະຊວງຍຸຕິທຳ ແລະ ທ່ານຜູ້ຕາງໜ້າຈາກຄະນະຈັດຕັ້ງສູນກາງພັກ ເຂົ້າຮ່ວມທັງໝົດ 121 ສະຫາຍ.
ຈຸດປະສົງກອງປະຊຸມໃນຄັ້ງນີ້ ເພື່ອເປັນການສ້າງແຜນກຳນົດພະນັກງານ ນຳພາ-ຄຸ້ມຄອງ ຂອງກະຊວງຍຸຕິທຳ ຊຶ່ງເປັນວຽກງານໜຶ່ງ ທີ່ມີຄວາມໝາຍສຳຄັນພື້ນຖານຂອງວຽກງານກໍ່ສ້າງພະນັກງານ, ຮັບປະກັນການຫັນວຽກດັ່ງກ່າວໃຫ້ດຳເນີນຕາມລະບຽບແບບແຜນ ເພື່ອຕອບສະໜອງໜ້າທີ່ການເມືອງຂອງພັກ-ລັດ ໃນສະເພາະໜ້າ ແລະ ຍາວນານ, ເປັນການຫັນຍຸດທະສາດ ກ່ຽວກັບວຽກງານພະນັກງານ, ການສ້າງໂຄງການສັງລວມພື້ນຖານໃຫ້ແກ່ການສ້າງແຜນກໍ່ສ້າງ-ບຳລຸງພະນັກງານ ໃຫ້ມີຄວາມຮູ້, ຄວາມສາມາດທາງດ້ານວິຊາການກົດໝາຍ ແລະ ມີຄວາມໜັກແໜ້ນທາງດ້ານແນວຄິດການເມືອງ ສາມາດຄາດຄະເນສັບຊ້ອນ ແລະ ຈັດວາງພະນັກງານ ຢ່າງສົມເຫດສົມຜົນ ແລະ ຮັບປະກັນຕາມທິດຫັນເປັນໝຸ່ມເທື່ອລະກ້າວ.
ໃນກອງປະຊຸມ ສະຫາຍ ໄຊສີ ສັນຕິວົງ ປະທານກອງຊຸມ ໄດ້ໃຫ້ກຽດເຜີຍແຜ່ ມະຕິກົມການເມືອງສູນກາງພັກ ສະບັບເລກທີ 032/ກມສພ ວ່າດ້ວຍ ວຽກງານສ້າງແຜນກຳນົດພະນັກງານນຳພາ-ຄຸ້ມຄອງ ແລະ ມະຕິສະບັບເລກທີ 030/ກມສພ ວ່າດ້ວຍ ມາດຖານຂອງພະນັກງານນຳພາ-ຄຸ້ມຄອງ. ພາຍຫຼັງທີ່ໄດ້ຮັບຟັງການເຜີຍແຜ່ແລ້ວ ກໍໄດ້ດຳເນີນການທາບທາມ ຊຶ່ງການທາບທາມ ປະກອບດ້ວຍ 3 ຮອບ ຄື: ການທາບທາມຮອບທີ 1 ແມ່ນຂັ້ນຫົວໜ້າພະແນກຂຶ້ນໄປ ມີສິດປ່ອນບັດທາບທາມ; ຮອບທີ 2 ແມ່ນຂັ້ນຄະນະໜ່ວຍພັກຂຶ້ນໄປ ມີສິດປ່ອນບັດທາບທາມ ແລະ ຮອບທີ 3 ແມ່ນຂັ້ນຄະນະພັກກະຊວງ.
ຫຼັງຈາກນັ້ນ, ຈະໄດ້ສັງລວມ ແລະ ເຜີຍແຜ່ຜົນການທາບທາມ ຄັ້ງທີ 3 ໃຫ້ຄະນະປະຈຳ ແລະ ຄະນະກະຊວງຊາບ ເພື່ອກຳນົດຈຳນວນພະນັກງານນຳພາ-ຄຸ້ມຄອງ ເຂົ້າໃນແຜນການກໍ່ສ້າງພະນັກງານ ຂອງກະຊວງຍຸຕິທຳ ໃນຂັ້ນຕໍ່ໄປ. ກອງປະຊຸມໄດ້ດຳເນີນເປັນເວລາ 2 ວັນ ແລະ ຈະປິດລົງ ໃນວັນທີ 22 ພຶດສະພາ 2018.
Editor: ກຳປານາດ ລັດຖະເຮົ້າ
