ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ລົງພົບປະ ແລະ ໂອ້ລົມພະນັກງານຫຼັກແຫຼ່ງຂະແໜງການເງິນ ແລະ ຂົງເຂດເສດຖະກິດຂອງແຂວງວຽງຈັນ ຢູ່ທີ່ສະໂມສອນໃຫຍ່ຂອງແຂວງ. ໃນນີ້ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ຮັບຟັງການລາຍງານຫຍໍ້ຈາກ ທ່ານ ຄຳເຫຼັກ ທອງສະຫວັນ ຮອງຫົວໜ້າພະແນກການເງິນແຂວງວຽງຈັນ ກ່ຽວກັບສະພາບການຈັດຕັ້ງ,ການເຄື່ອນໄຫວຂອງຂະແໜງການເງິນ ແລະ ການປະຕິບັດແຜນງົບປະມານແຫ່ງລັດ ງວດທີ 01 ປີ 2018 ເຫັນວ່າແຂວງວຽງຈັນ ສາມາດເກັບລາຍຮັບເຂົ້າງົບປະມານໄດ້ລື່ນແຜນງວດ 01 ທີ່ໄດ້ວາງໄວ້ ເຊິ່ງມັນສະແດງອອກໃຫ້ເຫັນວ່າ ບັນດາພະນັກງານຂະແໜງການເງິນທົ່ວແຂວງ ໄດ້ເອົາໃຈໃສ່ຈັດຕັ້ງປະຕິບັດກົດໝາຍວ່າດ້ວຍງົບປະມານແຫ່ງລັດ, ຄໍາແນະນໍາກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2018 ແລະ ລະບຽບການອື່ນໆທີ່ກ່ຽວຂ້ອງຢ່າງເຂັ້ມງວດ ແລະ ຍ້ອນບັນດາຂະແໜງ ການປິ່ນອ້ອມໃຫ້ຄວາມຮ່ວມມື ຈຶ່ງເຮັດໃຫ້ສາມາດຍາດໄດ້ເຖິງຜົນງານດັ່ງກ່າວ.

ເພຶ່ອຮັບປະກັນໃຫ້ການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2018 ບັນລຸຕາມແຜນການທີ່ວາງໄວ້, ພ້ອມທັງເຮັດໃຫ້ບັນຫາ ແລະ ຂໍ້ຄົງຄ້າງຂອງວຽກງານໄດ້ຮັບການຈັດຕັ້ງປະຕິບັດທັນຕາມກຳນົດເວລາ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ມີຄຳເຫັນຊີ້ນຳບາງບັນຫາຕົ້ນຕໍ ເປັນຕົ້ນແມ່ນຕ້ອງເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກພັກ,ພະນັກງານ-ລັດຖະກອນ ໃຫ້ມີແນວຄິດຫຼັກໝັ້ນ,ເຊື່ອໝັ້ນຕໍ່ແນວທາງນະໂຍບາຍຂອງພັກ, ເອົາໃຈໃສ່ບຸກບືນ ແລະ ສູ້ຊົນເກັບລາຍຮັບໃນໄລຍະເວລາທີ່ຍັງເຫຼືອ ໃຫ້ໄດ້ຕາມແຜນການ ຫຼື ລື່ນແຜນການຍິ່ງເປັນການດີ, ເອົາໃຈໃສ່ຄຸ້ມຄອງຖານລາຍຮັບ, ສ້າງຖານລາຍຮັບໃຫ້ມີຄວາມເຂັ້ມແຂງ, ໝັ້ນຄົງ ແລະ ສາມາດຕິດຕາມກວດກາໄດ້, ເອົາໃຈໃສ່ຈັດຕັ້ງປະຕິບັດການຈົດຮັບ-ຈົດຈ່າຍ ແນໃສ່ໃຫ້ສາມາດປະຕິບັດທັນຕາມກຳນົດເວລາ ແລະ ເປັນປົກກະຕິ, ເອົາໃຈໃສ່ການແກ້ໄຂລົດນຳເຂົ້າບໍ່ຖືກຕ້ອງ ໃນຈຳນວນທີ່ຄົງຄ້າງໃນໄລຍະຜ່ານມາ ໂດຍໃຫ້ຫັນມາປະຕິບັດຕາມກົດໝາຍພາສີ, ລະບຽບການທີ່ກ່ຽວຂ້ອງ ແລະ ເຂັ້ມງວດ ບໍ່ໃຫ້ເກີດຂຶ້ນອີກໃນຕໍ່ໜ້າ, ເອົາໃຈໃສ່ວຽກງານກວດກາ ແລະ ຄຸ້ມຄອງສິນຄ້ານຳເຂົ້າຜ່ານດ່ານທ້ອງຖິ່ນ-ປະເພນີ (ດ່ານບ້ານວັງ ແລະ ຊະນະຄາມ), ເອົາໃຈໃສ່ປະຕິບັດລາຍຈ່າຍຢ່າງເຂັ້ມງວດໃຫ້ເປັນໄປຕາມກົດໝາຍ ແລະ ລະບຽບການ, ໂດຍຖືເອົາການເບີກຈ່າຍເງິນເດືອນ, ເງິນອຸດໜູນ ແລະ ລາຍຈ່າຍຮັບໃຊ້ການເຄື່ອນໄຫວວຽກງານຂອງກົງຈັກພັກ-ລັດ ໃຫ້ເປັນບູລິມະສິດຕົ້ນຕໍ, ໃຫ້ກະກຽມການຂຶ້ນແຜນງົບປະມານປີ 2019 ແຕ່ຫົວທີ ເພຶ່ອໃຫ້ທັນກັບສະພາບການຕົວຈິງ

Editor: ກຳປານາດ ລັດຖະເຮົ້າ